اللهم اغفر لي خطيئتي وجهلي وإسرافي
_________________________________________
خلي الامل بالله موصول:
#منقول #حتي #نبعث #الأمل #في #نفوس #الرجال ❤
قال ﷺ ”إِذَا خَطَبَ إِلَيْكُمْ مَنْ تَرْضَوْنَ دِينَهُ وَخُلُقَهُ فَزَوِّجُوهُ، إِلَّا تَفْعَلُوا تَكُنْ فِتْنَةٌ فِي الأَرْضِ، وَفَسَادٌ عَرِيضٌ” رواه الترمذي وحسّنه الألباني
ده كان أول رد سمعته من حمايا رحمه الله لمّا رُحت أتقدم واخطب زوجتي، وساعتها كنت لسّه طالب في سنة خامسة طب، ومعنديش أي مؤهلات ثانية، وخصوصًا الماديّة منها كان الله وحده بها هو العليم!
لم يشترط رحمه الله عليّ إلّا شرطًا واحدًا:
لو نويت في يوم من الأيام تهين بنتي من فضلك لأ وتجيبها لي بيتي مُعزّزة مُكرّمة .. تقدر تعمل كده؟
قُلت له: أقدر
قال لي: خلاص يبقى على بركة الله!
لم يشترط عليّ شرطًا ولا مهرًا ولا ذهبًا، ولمّا حبيت أكلمه في شيئ من هذه التّفاصيل قال لي: يا بني انت لو ممعكش غير خاتم نحاس أنا ها أقبله منك!
قال ليّ الكلمتين دول كده بالنّص وهو في منتهي الجديّة.
حمايا رحمه الله زاد على كل ما سبق وأعطاني شقة أتجوز فيها لمّا لقاني مش جاهز بشقة بعد التخرج وأثناء سنة الأمتياز وكان أيامها مرتبي 105 جنيه وكنت بشتغل شفت مسائي في صيدلية بمرتب 250 جنيه فكان كل دخلي حوالي 355 جنيه ومع ذلك لم يتردد لحظة في استمرار الزواج، ولم يشق عليّ بتاتًا بطلب يُرهقني أو فوق طاقتي، وكان كلّ اللي على لسانه هو المثل الفرنسي ده ”كان بيقوله لي بالفرنساوي بنطق سَلِيم جدًا“:
petit à petit l'oiseau fait son nid
وترجمته: ”قشّة إلى قشّة يبني العصفور عشه“
كلّ الكلام والمواقف دي اتقالت، واتعملت معايا ويمكن يكون رحمه الله نسيها وموقفش عندها كثير، بس أنا عُمري ما نسيتها، ولا راحت عن بالي، ولما كان يحصل موقف ممكن بسببه أزعل من حمايا -رحمه الله- كُنت لازم افتكر له المواقف دي، وافتكر إحسانه ليّ، واترجمه مودّه ورحمة وحب لبنته، ولو كنت بحبها قيراط فكان حبّي لحمايا مائة قيراط بل يزيد.
إلى الآن كل ما افتكر حمايا دموعي تنزل وأحب زوجتي أكثر، وافتكر شرطه ليّ في أول مقابلة وأحسن إليها أكثر، وانسى واسامح عشان خاطره.
فعلاً مش دايمًا كل اللي بيجي سهل بيروح سهل، فيه إحسان وكرم بيأسروك وبيتحفروا على جدران القلب!
أنا كنت من فترة قريت الكلمتين دول، ولقيتهم معبرين جدًا ومش قادر أنساهم:
”زوج بنتك مش عدوّك، وجوازه منها عمره ما كان بيعه أو شروه ولا عمره كان صفقة؛ لازم تبني في زوج بنتك وتزرع جوّاه بإحسانك ليه الأمان ليها عشان لمّا ميبقاش ليها غيره يفتكرك ويترحم عليك ويحطها جوّه عنيه وقلبه“.
لا يضرُّكِ يا ”زوجتي“ ما فعلتيه أبدًا بعد كلمة أبيكِ لي!
الّلهمّ ارحم حمايا كما رحمني، وأحسن إليه كما أحسن إليّ، واجزه عنّي خير الجزاء وأتمّه وأوفاه، وأعنّي ما حييت على الوفاء بعهدي الذي قطعته مَعَه.. آمين يارب العالمين ورحم الله عبداً قال آمين ❤
................................. . ...................
اللهم صل وسلم وبارك على سيدنا ونبينا محمد وعلى آله وصحبه أجمعين
