البنات في الجيش

الحلقه الأول

في المعسكر..
يا افندم..الدفعة الجديدة وصلت..
أيوه أيوه..دفعة البنات..
أيوه يا افندم..بس اساميهم غريبة قوي أنا عمري ما سمعت الاسامي دي قبل كده.
ربنا يستر بقى لما نشوف
والساعة سبعة الصبح..يضرب بوق الصحيان..

في مكان وجود الدفعة الجديدة.....
اوووووف ايه ده..ده الجو حر قوووي
..والناموس خلاني مانمتش طول الليل..لا لازم يسيبونا ننام كمان شويا..
كده بشرتنا هتبوظ
_ فعلا يا لارا معاكى حق
سيرين..سيرين..يلا بيننا جرس الصبح ضرب يلا علشان نفطر..
..يووووه يا ماجي..ماتسبيني أنام..قوليلهم هتحصلنا كمان شويه
وعلى الساعة حداشر كده كان الحمدلله قدروا يجمعوا البنات و يوقفوهم طابور..
الظابط وهو فاتح بؤه بنظره استعجاب واندهاش..
..ايه اللي انتم لابسينه ده؟!وبص لأول واحده فى الصف..
..ايه يا افندم ده السبورتس وير..مش ده طابور الصباح
..صبااااح..صباح دي تبقى خالتك ياهانم..هنا في نظام ولازم تحترموه
وتميل شاهيناز على صافيناز و تقولها
اوووووو يا خبر ده سوفاج جدا..
الظابط بزعيق
امنع الكلام..وانتى ياانسه ايه اللي انتي لابساه ده..
ده سوليبت يا افندم..وبعدين ده نفس لون لبس الجيش اهو..بس تفصيله تليق عليا..لازم نجدد علشان مانفضلش متخلفين..لازم نبقى علي الموضه
الظابط وقد بدأت أعراض الشلل تبان عليه....
آآآ آآآه قلبي..سلوبيت ايه..حضرتك مفيش هنا الكلام ده..اتفضلي ألبسي اللبس اللي وزعوه عليكم.....وانتى يااستاذه..انتي لابسه عبايه ليه..أنا عارف انها لون لبس الجيش قبل ماتقولي..بس هنا ماينفعش تلبسي عبايات..
..يا افندم أنا محجبة ولازم البس لبس محتشم
الظابط وتقريبا كهربه مخه زادت..
صبرني يارب..لا كده كتييير..وبص لايديها وقالها يعني انتي زعلانه من اللبس ان مش محتشم وحطا مونوكير عادي
..يا افندم دي حرية شخصية وعلي فكرة بقي ده مونوكير اسلامي.....
آآآه دماغى شكلي اتشليت...
وانتى حضرتك...انتي لابسه إيه ده..صحيح هو نقشه لبس الجيش ونفس التفصيله كمان..ما شاء الله عليكي..بس حضرتك ده لون بمبي باين..
.....................
حضرتك مابترديش عليا ليه
.....................
لو سمحتي ردي عليا
..سوري مابكلمش ولاد..وعلى فكرة اسمه بينك مش بمبي
وهنا وقع الظابط من طوله..وغالبا جاتله سكته قلبيه ومات

في مكان التدريب بقي..
ظابط تاني غير المرحوم الاولاني
..إحنا هنا علشان تدربوا على عيشه المعسكر.لازم تتعلموا تواجهوا الظروف مهما كانت قاسية..أنتم دلوقتي هتتفرقوا في الصحرا دي وهيبقي فيه هيكليات كأنها حرب فعلية..طبعا دي اول سنة ينضم بنات للجيش والتدريب ده عملناه عشان نعرف هتنجح التجربة ولا لأ..يلا اتفضلوا....وطلع يجري على اخره وقال في سره....
هيييييييه أنا حي أنا حي...الحمدلله مااديتهومش فرصة ينطقوا

.....وبعد شويه.....
ايه ياحضره الظابط فين البنات. أنا ماشفتش ولا واحده فيهم..
مش عارف يا افندم..أنا قلتلهم يتفرقوا في أرض التدريب
..طب روح شوفهم لا يكون جالهم ضربة شمس وماتوا ولا حاجة
..ما بلاش يا افندم أنا ما صدقت انفد بجلدي
..يلا ياابني اعتبرهم اخواتك ده انا قلقان عليهم بقالهم يجي ساعتين مابانوش..
..حاضر يا افندم.
ووصل الظابط مكان ماساب البنات وهو حاطط ايده على قلبه ومرعوب
ومن بعيد شافته سوزي فمالت علي ساندي وقالتلها
..شوفي مش قولتلك شكله عينه منك اهو رجع تاني اهو..يابنتي طول الطابور ماشالش عينه من عليكى
ضحكت ساندي بكسوف وقالتلها..
يااااااه معاكى حق ده رجع اهو وبيبصلي كمان.
ووصل الظابط وقال..
خير مالكم واقفين ليه..وايه اللي بتدهنوه ده ..وفي سره..مصيبه ليكون جالهم جرب جماعي من نومه المعسكر..
ردت سالي
..ده صن بلوك يا افندم أصل الشمس ممكن تضر بشرتنا
الظابط وقد مات بالسكته القلبيه بس قبل ما يطلع في الروح آآآه صن بلوك..منكم لله ياكفره..هو انتم طالعين السخنه.