العنوان : رانيا و عماد الدين
*الام : واش هدا وين تنوضي ي لفنيانة هدا قاع فيسبوك لي هبلك .والله غير نقول لباباك ينحيلكم الويفي هدايا خرجكم من عقولكم ..
انا : بفف ادا نضت بكري تقوليلي نضتي تكونيكتي و ادا نضت روطار تقوليلي كنتي تكونكتي بففف .. ديجا راني روطار نروح باي ..
خرجت من الدار و ركبت ف الطونوبيل و ديماغيت ،ف طريق .. معلاباليش واش صرا المهم كنت نسوق نوغمال حتى نتخابط ف طونوبيل معلاباليش من وين خرجتلي و خرج مولاها الجحش يعيط ويسب و انا طبعا لن اسكت له خرجت من طونوبيل ديالي و بديت نعيط وهو يعيط شغول رانا نتسابقو شكون يعيط كتر .. و طبعا الناس قاع حبسوا وقعدوا يقرعجوا .. هو : والله مليحة كي ولاو الدراري صغار يسوقو .. انا : واقيل راك عليا .. هو : لالا راني على لي موراك انا : ايا بيان حسبتلي راك عليا هو : لالا حاشا .. راني على البغلة مولات الطونوبيل .. انا : نتا هو البغل .. و بعد شجار دام نصف ساعة قررت انا ندخل للطونوبيل و نكمل طريقي حتى شفت هداك الجحش مورايا .. اوو راه يتبع فيا هدا لحقت لافاك ڤاريت الطونوبيل و رحت نقرا دخلت لونفي و سقمت دوزاني حتى نشوف هداك لجحش داخل .،انا تقلقت و قتلو : بن عميي تبعتني حتى لهنا .. هو مقيمنيش و راح قعد ف البيرو .. انا تشوكيت جاتني كغيز كاغدياك ف الراس .. حسبتو طالب خرجلي بروف!!! اووو مي يبان صغير .. بعد مدة دخل راجل كبير يبان هو البروف .. الراجل : نتايا واش راكً دير فل بيرو ماعلابالكش بلي هديك بلاصة تاع البروف؟؟ .... الجحش ناض بلاعقلو و قال : انا عماد الدين سعود البروف : اه سمحلي سي عماد .. المهم عماد جا قعد قدامي باغسكو مكاش بلاصة ... انا : ايه المعارف ياه .. عماد : هدي نتي ي البغلة لحقتيني حتى لهنا . مي متخميش لعشيا تتحاوزي ... انا : حسبتلك غير نتا لي عندك المعارف يمال نقولك حاجة انا بابا هو الممول الكبير لهاد لافاك عماد : و بابا هو المدير تاع لافاك !
...البروف :نتوما حبسولنا هدرة لهيه ... و بدا الشيخ يشرح و حنا نكتبو .. و الجحش قاعد يكتب بستيلواتي .. انا : نتا حط ستيلو ديالي بفف ! هو : ستيلو يدير برك الف فرنك شحيتيه عليا بييييي شحال مشحاحة .. انا : كي يدير الف فرنك علاش ماشريتش ؟! .. هو : اي خليني نكتب اومبعد نشريلك عشرة .. انا : اشريهم لعمرك .. لروحك مشريتش ستيلو جاي تشريلي ليا عشرة -_- .
البروف : اواه نتوما مراحش تسكتو واقيلا ؟ ... ايا برا اخرجوا عليا !!. خرجنا للجاغدان تاع لافاك كان فارغ الناس قاع ف كلايسهم يقراو غير انا و هاد البهلول .. هو راح حكم كرسي و قعد و انا زاحمتو قعدت قدامو .. المهم كل واحد جبد تلفونو .. انا قعدت نكونيكتي و هو قاعد يتصور ... انا : يرحم باباك وعلاش راك تتصور شايف روحك شباب ؟؟ هو : بيان سور عندك شك انا : وي !! هو: واقيل غرتي كي شباب عليك يا لموسطاشة انا : واش قلت ؟؟عاود مسمعتش !؟؟ هو : زعفتي كي قتلك موسطاشة ! انا : معليش نسلفلك لي موسطاش دياولي باش تولي راجل هو : سلفيهم ل باباك .. بون انا تقلقت و فتحت الصاك كان عندي قرعة كوكا كولا و فتحتها درت روحي حانشرب و درت ليه فرغتها فوق راسو ... انا : متدسرنيش باغسكو مزال متعرفنيش :) ! ... هو : واشبيه جدك كنت نڤصر برك مي والله تخلصيها غالية، كي جيتي طفلة لي مضربتكش .. انا : سيي زهرك .. هو : راكي حابة نحكمك نڤطعك واقيل انا : طووز ماعندك مادير -_- .
. بون نعرفكم بالشخصيات تاع لحكاية : رانيا : الفتاة المدللة 19 سنة . شعرها نواغ.. ما سمرة ما بيضا نصف نصف ،، عينيها ماغون طويلة و رقيقة ..الضحكة تاعها حلوة تاخد العقل ،، تحب تلعبها واعرة مي هيا خوافة .. مي لي يخلط فيها تشعل فيه .. تموت على الماكلة و المسلسلات التركية ، زلة و تحب تتقلش سوغتو على والديها ، باباها تاجر عندو مركز تجاري . و يماها ماكثة ف البيت ..و عندها 3 خاوتها . عبد الرحمان 29سنة مزوج و عايش ف الخارج ، امين 27 سنة شرطي متزوج تاني .. عايشة في دار غير مع باباها و يماها .. .
عماد الدين : الوسيم 19 سنة . شعرو ماغون و عندو لحية خفيفة .. عينيه عسليين يهبلو .. ميسكلي و زل .. متكبر و حاسب روحو .. تاع بنات و سهرات .. باباه مدير لافاك و يماه استاذة متقاعدة .. عندو ختو وحدا . منار 17سنة .. و عندو 3 صحابو . فاتح . زين و منصف .. قعد يخزر فيا.
. و بعدها قالي : هيا بلعي -_- ... في هاد الاثناء جاو صحابو .. منصف : واش حبيبنا من اول يوم دبرت وحدا ؟.. فاتح : راك تشوف تخليه سيلباتيغ تولي موراها ب زوج دقايق تلقاه اون كوبل .. عماد : هه عليمن راكو تهدرو ؟! زين : عليك و على هاد الزلة لي معاك .. (انا بقيت متشوكيا اووو واش راهم يالفو من ريسانهم ... ) عماد : تعميت واقيل هادي زلة ..ديجا ولش حسبتلك هبلت باش نخرج مع هادي ... انا : يا وليدي يحبلك باه تكون مع وحدة كيفي بففف -_- .
قعدنا نتداربو . هدرة تجيب هدرة حتى لحق وقت لكوغ دوزيام رفدت ساكي ورحت نقرا.. دخلت رحت حكمت بلاصة و قعدت و دخلو الجماعة تاع سي عماد و قعدو قدامي ،، بدا الدرس و كان بزااااف يعيي لدرجة اني رقدت حتى عيط عليا البروف باش نضت .. و بهدلني و الطلبة قاع يضحكو عليا ... بففف جايحين ~.~ ...
يتبع......
