من اول نظرة ٣-
كان مازن و ضيوفه علاء و لؤي جالسين يتكلموا متى يروح مازن للكلية و يقدم اوراقه
طالعوا في مازن اللي عاقد حواجبه يفكر في اي يوم يروح حس بدقه في كتفه طالع في اللي دقه
علاء : إِيش بك ؟ الظاهر عصرت مخك علشان تطلع يوم يناسبك
مازن بحرج : لا مو كده بس كنت أفكر اذا هذا الاسبوع يناسب ما ابغى اروح هناك لحالي
علاء : انا مشغول هذا الاسبوع بس عايدي أجي معاك اذا قدرت و اذا ما قدرت في لؤي هوا دايماً متنقع هناك
لؤي : ايوا يا مازن و لا يهمك اذا ما قدر علاء انا موجود في الخدمة
مازن بابتسامة : مشكور
قام علاء و أشر للؤي علشان يقوم زيه
علاء : يلاَّ يا لؤي مشينا ورانا طريق طويل
طالع مازن في لؤي بعدين رجع طالع في علاء : بدري لسى ما قعدت معاكم كويس
حط علاء يده على كتف مازن : بكرة نتقابل ان شاء الله فلا تطالع فينا كده و بعدين ما ابغى ازعج عمتي أكتر
نزل مازن راسه و حس انُّو الفراغ بدا يتملكه من جديد ما صدق لقى احد يونسو في هذا البيت
لؤي اللي كان من وقت ما دخل بيت مازن و هوا ما شال عينه من مازن .. ما قد حس بهذا الشعور من قبل مع اي احد كل اللي حاس فيه انُّو لازم يكون اقرب له
مشي علاء للباب و وراه لؤي و مازن اللي حيوصلهم للباب الخارجي .. خرج اول علاء و راح يشغل السيارة ..
وقف لؤي و لف على مازن ..
ابتسم مازن : شكراً على الزيارة و من جد تشرفت بمعرفتك
قرب لؤي وهوا مبتسم لمازن و بدون اي كلمة مسك يده و قربها من شفايفه .. تفاجأ مازن من الحركة و قبل ما يبعدها
شد لؤي مسكته .. سلَّم على أطراف أصابعه و تركها حس مازن بحرارة في جسمه و انُّو وجهه تلون و دقات قلبه سريعة
لؤي : نتقابل مرة تانية .. تصبح على خير
خرج لؤي و راح يركب السيارة طالع فيه علاء و خزه بعيونه
علاء : ما كان لك داعي تسوي له كده
ريح لؤي نفسه على الكرسي : لا .. له داعي كنت ابغى اشوف ردة فعله
رفع حاجبه علاء : و كيف كان ؟
لؤي وهو مبتسم : زي ما ابغى و احسن كمان
