من اول نظرة ٤
لؤي : إنتا فينك بالزبط على البحر انا جاي في الطريق
انتظر لؤي رد مازن اللي كان ساكت
لؤي : الوووو مازن ؟ فيك شي ؟
مازن بتوتر / لـ...لا ما فيني شي
لؤي : الحمدلله حسبت فيك شي المهم وين جالس انا وصلت
مازن / على الشاطي
لؤي : اوكي دحين أوصل للمكان
قفل الخط من عند مازن و ابتسم : وأخيرا اقدر اجلس معاه
رن جواله لمَّا شاف الرقم تغيرت ملامح وجهه للانزعاج
ما رد على اللي يتصل علشان لا يتنكد : الله يصبرني على الإزعاج ...
رِن الجوال مرة تانية لمَّا وقف السيارة
لؤي : خير !
.../ الله يجعل ايامك كلها خير
لؤي وهوا ماسك أعصابه : إيلاف ايش تبغي ؟
إيلاف / حبيبي ايش بك معصب ترى ما صار شي
لؤي : إيلاف يرحم أمك لا تتصلي قلت لك انا ما ابغاكي
إيلاف / بس انا حبيبتك و إنتا كنت دايماً تقول لي حبيبتي وأنك ما بتتركني
هدا لؤي من أعصابه : اسمعي يا إيلاف كل اللي بيننا كان صداقة اخوة يعني انا معتبرك زي اختي و اختي دايماً أكلمها زي ما أكلمك لو على طاري ما حتركك قلتها لان اعرف انُّو ما عندك اخوان مو قصدي اخليكي تفهمي تصرفاتي غلط و بعدين احنى متربيين سوا فلازم تفهمي هذا الشي
إيلاف بحزن / و الاتفاق اللي بين امي و أمك ؟ ايش حتقول لهم
استغرب لؤي من كلامها اول مرة يسمع باتفاق بين أمه و خالته : اي اتفاق ؟
إيلاف/ لؤي لا تزعل خلاص بس أمك قررت تجي تخطبني لك و احنى وافقنا
في هذي اللحظة حس لؤي انه أعصابه انفجرت كل شي عادي عنده الا انهم يتخذوا قرارات يكون له شأن فيها
لؤي : ايش تقولي ؟؟؟ و على اي أساس تقرر ؟ هي الدنيا فوضه مسَّكت معكم شي و تروحوا تقررون بدون علمي ؟!
إيلاف/ كنت أحسبك تدري الله يخليك لا تقول لهم انُّو انا اللي قلت لك
حاول لؤي يهدي أعصابه : قفلي دحين و انا أتفاهم مع امي
و خليكي ساكتة .
قفل الخط بدون ما يسمع منها اي كلام حركات أمه و خالته بدأت من يوم أمه حست بتصرفاته الغريبة لها و هي تحاول تربطه بأي وحدة من البنات اللي تعرفهم و بما انُّو إيلاف بنت خالته و متربية معاه قررت انها تربطهم ... مشي لؤي الين وصل للشاطي طالع في كل مكان الين انتبه لمازن اللي جالس لوحده على صخرة حس بدقات قلبه السريعة اللي كل ما عيونه طاحت على مازن تضطرب أخذ نفس عميق و طلعه و رسم على وجهه ابتسامة ثم مشي لمكان مازن
لؤي : مساء الخير
التفت مازن للؤي و ابتسم له : مساء النور
جلس لؤي جنب مازن التفت له مازن : كيفك لؤي ؟
لؤي: الحمدلله بخير انت كيفك ؟
طالع مازن للبحر : الحمدلله ... قالها بصوت خفيف
لؤي : عادك متضايق من سفرة اخوك ؟
ابتسم مازن و هز راسه بالنفي : لا مو متضايق بس احس فيني فراغ ما قد حسيته من قبل
حط لؤي يده على كتف مازن : الظاهر الرابط اللي بين التوأم قوي علشان كده تحس بالوحدة طيب و ريان كيف تتوقع شعوره...
ضحك مازن من كلام لؤي : ريان ماشاء الله عليه ما يفكر انُّو وحيد يمديه في اي لحظة يكون صداقات اكثر من خمسة أشخاص في وقت واحد ...
