العروس والسحر بقلم زينب عبدالمطلب الناشربارق العراقي

البارت الثاني

#العروس_والسحر_
#بقلم_زينب_عبد_المطلب
البارت الثاني
#الناشربارق_العراقي

لما حاولت اندار محسيت الا شي بخشمي بارد انحط وراسي ثكل وعيوني
غوشت وبعد محسيت بشي مثل النمت
ولمن كعدت حسيت نفسي اني بيت اهلي وصراخ وعياط والدنيا احسها انكلبت

امي تعيط وبيبيتي تبجي يمي وعمي يصرخ مثل المخبل
هو كلش يحبني وكان يحسبني مثل بنته ياخذني ويطلعني ويشتريلي
حتى اكو ناس عبالهم هو ابويه
وبحكم مركزه هو كعميد طلعو عبالهم يخطفوني ويهددوه بيه بس الي
صار  بعد ما خدروني جيرانه كان طالع وشافهم بوقتها كانو هوايه منتسبين
للصحوه فهو خطيه من شافني مطلع سلاحه ضرب واحد برجله والثاني ع
الصوت طفر واني واكعه بالشارع وهذا يمي مصوب
راكض عليه ومفتهمين منه انو اكو عصابه مشغلتهم يخطفون اولاد الضباط
والمسؤولين ويبتزوهم والحمد لله من مكدرو ياخذوني
فالكل من سمعو وشافو هيجي الوضع محد بعد قبل يبقى بالعراق فخلال3
ايام سوينه للكل جوازات  وقررنه نطلع لسوريا امي حلفت دين يمين متطلع وتترك اهلها
محد جبرها تجي وابويه انطاها مصرف واحنا طلعنه
رحنه لسوريا استقرينه بمنطقه اسمها جرمانه وبلشنه شوي نتعود ع الوضع
مر شهر ولهناك وامي اتصلت
__صباح فدوه ارجع بعد ما اتحمل
_شكو نهى شصاير
__اتعاركت ويه اهلي  وطردوني وبعد ما اتحمل وما اعرف وين اروح
__روحي لاحد من اقاربج راح احول فلوس الج سوي جوازج وتعالي
ننتضرج احنه
—تمام منتضرتك
وصار جواز امي واجتي يمنه ورجعت ريمه لعادتها القديمه رجعت
تغلط وتجاوز وادور مشاكل وتنفتن وتنقل كلام منا ومنا
ابويه وبيبيتي كووه متحملين هالوضع بس شيكدرون يسون يوميا عركه
بينهم وهي نفس حالها وضلينه ع هالحال سنه ونص واني صرت صف سادس
بابا واعمامي مراقبين وضع بغداد وسمعو الامور بلشت تتحسن فقررو يرجعون
ورجعنه لبلدنه واني اباوع عليهم شلون يبجون وفرحانين بلدهم بس اني اي حس
وطني ما عندي طفله ما افهم بس الي يشوفني يكول عمرها17سنه هلكد ما اني خشمه وجسمي مليان
رجعت وشفت صديقاتي موجودات هنه هنه الي راسبه والي ناجحه بالدفرات
رجعت للشله التعبانه الي بيها بنات اكبر مني ب4سنوات لان مطلعن السادس ونايمات بيه
رجعنه لبيتنه ولمدرستي رجعت اداوم لان كانت مبلشه المدارس صار شهر عليها
طبعا بيت جدي محد كان مهتم بيه لان الاهتمام مو بس الاكل والشرب
الاهتمام يكون بامور اكبر من هالشي الاهتمام من الام كصديقه وهي عمرها
محاولت تكسبني الها او تحسسني بحنانها
مكان احد يسالني منو صديقاتج ...قريتي او لا ....ليش هيجي تلبسين...
جسمج غطيه... هذا عيب وهذا حرام
هالامور مكنت اسمعها ونفس الوقت اباوع لصديقاتي وامشي وياهن وع ميهن
وشيسون اسوي مثلهم حتى لو كان الشي غلط حتى لو كنت اعرف هالشي
هم مكنت اهتم لان اعرف محد ورايه يحاسبني
كمت اسمع منهم هذه المصادقه وهذه التحب وهذه تكول يحبني وهذه تشتاق
اني هنا كمت اريد مثلهم واحس واجرب هالشي مفكرت هنه كبار ويفهمن لا
فكرت حالي من حالهن طفله ما افهم شنو السالفه ولا عندي الي ينصح
لحد ما يوم واني راجعه للبيت شفت واحد واكف يباوع عليه غمزلي ابتسمت
وفرحت واحد يغمزلي مشيت مشه ورايه وصار اسرع مني ومشى كدامي وشمر
ورقه بالكاع عرفت رقمه لان سمعت هالشغله من البنات
رجعت البيت فتحت الورقه والله صدك طلع رقم مصدكت كمت واتصلت طلع هو وطبعا بنفس منطقتنه مو غريب
كعد وسولفلي هو مخلص معهد معلمين وره الثالث متوسط ويحجيلي شلون
اذا تعين وهالامور مال دراسه اني بس اسمع ما اعرف شنو احجي اريد
بس اروح للبنات واكوللهم صادقت واحد
وفعلا ثاني يوم من الصبح كتلهم وهنه يكولن اي شكو بيها من حقج
كمت انوبه ياهي لتكول اريد اطلع اني انط من يمي واكول اني هم اريد اطلع
مثلكم وكلشي اريد اقلد
طبعا هالولدصح مكنت افتهم منه او ما اعرف احجي وياه بس انتبهت لشغله
من يحجي ويايه كانو مو ويايه يعني كلامه مكان عني كانو يحجي ويه وحده مو اني
اكوله انت ع منو قصدك يكولي عليج انتي ريم
__بس اني مو ريم اني اسمي نجمه
__لا انتي ريم وسكتي