#العروس_والسحر_
#بقلم_زينب_عبد_المطلب
#البارت_العشرين
#الناشربارق_العراقي
عفتها وطبينه اني ورهف للغرفه همزين تعرف امي واطباعها كان تخزيت
__نجمه ممكن تسمعين مني
__كولي رهف شنوو
__اريد انصحج نصيحه واتمنى تسويها
__ااي
__ شوفيلج شقه واجريها ولمي بناتج وكعدي هنا
تره الشقق مزبلات والايجارات رخيصه ولحمدلله وضعج ممحتاجه احد
تريدين اني الاشيل الاجار عنج هم ما عندي مانع والله انتي بنت خالي
وغصبا عني اساعدج بس تره كافي بناتج شنو ذنبهم كل شوي و امج
مخبلتهم بالعياط ولتنسين تره اعرف طبع امج متتحمل الواحد ابداا وما
دام بلشت هيجي تصرخ بهالطريقه يعني متريدكم بعد
__صح كلامج و اصلا هذا لبالي اخذ بيبي واطلع
__وبعد متنتقلين هم الكي شي تلتهين بي و عيشي واشتغلي وفتحيلج
مشروع كافي عاد
تره اعرف بيج عايش جواج رعب حسين وتحكمه وقوانينه
مسالتي نفسج ليش مناسيته لحد الان وتفكرين بيه وبصفاء
لان هو ممتلكج ومخليج محبس بايده
صدكي اغلبيه الضباط يعتبرون المره والسلاح نفس الشي محطوطين بجيبهم
ومحد يكدر يطلق الزناد مالتهم غيره بس هو
وكذلك يعتبرج كجندي عنده ولازم كل الاوامر تنفذ عنده بالحرف الواحد
نجمه تره مقصد كلامي اني مو اكولج حسين محبج بالعكس تره كل وحده تتمنى واحد مثله
يحبها ويدللها بس انتي عيبج هو كسرتي شخصيتج كدامه وشيكول تكولين
حااضر بدون نقاش حتى لو كان الشي الي يطلبه غلط هم تسكتين
لدرجه هو منفصل عنج يعني صح احنه الي نعرف هالطلاق باطل بس هو يعرف
انتي هسه طليقته بس رغم كل هذا هو يتحكم بيج وبكلشي يخصج لحد الان
وحنطيج مثال صار اليوم
انتي شفتي شكلح ليوم من عيط وصرخ وفشر بالتلفون
وجهج تغير نكلبتي ليمونه ليش خايفه كافي حبيبتي
تره كلنه سمعنه غلطه وفشاره والمفروض مو انتي الي تخجلين المفروض هو
نجمه صيري قويه واعتمدي ع نفسج وتحملي مسؤليه قرارج متعرفين منا للولاده
شنو حيصير يجوز ترجعين ويجوز هو حيبلش حياه جديده متعرفين مستقبلا شنو حيصير بس هسه ركزي ع الحاضر واعتمدي ع نفسج
__كلامج صح واني من باجر ادور على مكان صدقا كنت محتاجه احد يدفعني
__اوك اني هم حخلي مصطفى يشوفلج هو هم يعرف اهوايه اماكن وشقق مفروشه للايجار
__الله كريم والله متعرفين وجودج يمي شلون مريحني
__حبيبتي احنه حسبه خوات لتكولين هيجي وامانه شتحتاجين اني حااضره
__فدوه لاحلى اخت
بقينه نسولف لحد ما اخذتنه الغفوه ونمنه
بيومها رهف باتت يمنه
نمت مرتاحه واحس فعلا حبدي بدايه جديده
لان كلام رهف كلش ريحني
صار فتره معرفنه وضع حسين او بالاصح مسولفتلكم عن حسين
حسين كان وضعه ميختلف عن نجمه من الضياع والانهزام والخوف
قضى ايامه بين الشغل والنوم يروح للدوام ويرجع للبيت
الي وياه بالدوام اغلبهم كرهو لان تعامله وياهم بكل قسوه
ومن يرجع للبيت ميقبل يسمع صوت اي طفل او اي احد بالبيت
امه وكل الي بالبيت بوجوده يضوجون
بيوم وهو كان بالدوام كانت ام صفاء جايه ع امه تشتكي منه لان تاركها
وهاملها من اخر مره متصله عليه ورايح ضاربها وطالع وتريد حل لهالوضع
__ولا يهمج هسه اخابر وانعل والديه وميكون خاطرج الا طيب
أنت تقرأ
العروس والسحر بقلم زينب عبدالمطلب الناشربارق العراقي
Chick-Litقصه واقعيه حقيقيه لفتاه تتعرض للسحر وتصل للجنون بعد زواجها فهل تتحمل ما حصل لها ام تبدا بحياه جديده تابعوو معي الناشربارق العراقي
