العروس والسحر بقلم زينب عبدالمطلب الناشربارق العراقي

البارت الثالث والعشرين

#العروس_والسحر_
#بقلم_زينب_عبد_المطلب
#البارت_الثالث_والعشرين
#الناشربارق_العراقي

بعد يومين
حسين كل دقيقه يتصل ع بيبي ويغلط واذا منرد يبعث مسجات ويهدد حتى نرجع  وصلت جوارات الولد وحددنه موعد سفرنه
اتصلت بيبي وكلتله باجر طيارتنه مثل هيجي وقت احنه بمطار بغداد
امي من راحت لاهلها لا اتصلت عليها ولا اعرف اخبارها
ورعد حلفت الا افضحه كدام مرته
رهف ودنيا رحت ودعتهم ورهف كالت يومين وترجع واشوفها
ومصطفى كان اكثر شخص اتاثرت بوداعه خصوصا رامي
يبجي ويكول اخذوني وياكم انتي مثل امي
يعني فعلا حسيت ابني وحتركه بس كتله فتره وارجع ياله سكت
مصطفى حنبقى ع تواصل اني وياه وخصوصا علمود المحل حيبقى شغال وهو كل  شهر يبعثلي الربح
فكرت اخلص من المحل بس قنعني انو اني ما اعرف شنو حتكون ضروفي بالعراق
بابا سلم الشقه واليوم حيبات يمنه واني بلغت صاحب العماره انو باجر مسافرين وحترك المفتاح يم مصطفى
صفيت كل شي ما اريده غير الملابس اخذت ويايه
البيت كان كئيب محد حاب يرجع لا اني ولا بابا ولا بيبي بس حكم القوي
كله صوج امي وعمري كله مراح انسه الي سوته بيه
اجه الليل ومحد نام بابا كاعد يتفرج وباله مو يم التلفزيون
بيبي ملهيه روحها ويه الجهال
واني كاعده يمهم جسد لكن روحي ضايعه ما اعرف وين
افكر شنو حيصير بحالي مكنت متوقعه هاليوم حيجي وانكشف
كنت مفكره باليوم الي حيعرف بيه حسين بالجهال حنكون اني وياه احتمال مصالحين
او متفاهمين واشرحله مكنت متوقعه انو امي تكشفني وعلمود بس تكسر خشمي من وره رعد العار
منمت وبقيت للصبح كاعده ومنتضره الكل يكعد حتى نطلع للمطار
اجه مصطفى وحمل الجنط واخذنه هو للمطار
من وصلت اذكرت باليوم الي نزلت بيه وكنت كلشي ما اعرف شنو حسوي
كان طريقي وقتها مجهول بس هسه صرت بالعكس راجعه للمجهول
ودعت مصطفى وعين تبجي وعين تضحك اول مره ما اشوف الابتسامه بوجهه
ماكو اختفت اول مره اشوف دمعه بعينه
اول مره احسه عاجز عن مساعدتي
محبيت اضغط عليه واحسسه بضعفي
طمنته انو حظل قويه وشنو احتاجه حتصل عليه

ركبت الطياره واني منكسره مدمره كل تعبي الي تعبته راااااح و رجعت لنقطه الي كنت بيها وانكس هم  رجعت لا اعرف شنو الي حيصير بيه وبجهالي ولا اعرف وين راح اعيش ولا حليت مشكله حسين وخيانته
يعني كل الي صار حاليا هو الاوراق انكشفت يعني كان مزوج بالسر صار علني وما اكدر افتحي حلكي ولا اسوي شي انحطيت كدام الامر الواقع والسبب امي

وصلنه مطار بغداد نزلنه
ديشوفون الجوازات واني ذولي خبلوني واحد اني
شايلته واحد بيبي ولبنات لازمهم بابا وميقبلون يمسكهم وبس يصرخن
__بااااباااا  بااا باااااا تركو ايد ابويه وركضو ع ابوهم وهمه يصيحون عليه

اهنا حسيت حيلي نهد نداريت واشوفه كبالي بدلته العسكريه وحمايه وراه
وبكامل اناقته واكف و وجهه ميتفسر
حضن البنات وكعد يبوس بيهن من وجهن وشعرهن وايدهن وهنه يتعاركن ع حضنه كل وحده تريده الها
واكفه واباوع عليه حاولت ابين القوه ودرت وجهي عنه ما اريده يلمحني واني اباوع عليه
كملنه واخذنه الجنط وطلعنه نمشي لصاله الخروج لان عمي العميد ابوهيثم
واكف هناك ينتضرنه الضاهر شايف حسين ومدخل وياه
مشينه بصفحه وهو بصفحه ويه البنات شايلهن ويمشي ويبوس بيهن
وطبعاا ولا سلم ع بابا ولا ع بيبي حتى ولده مسال ولا تقرب عليهم كانو بس
يعرف بناته واحنه غربه