مقدر في السماء

3

الحلقه التالته
ف اوضه نهله مامت مهاب كلمته : مهاب رخامه بلاش منها البنت مستنياك 8 سنين ها عاملها كويس بدل ما هتشوف معامله غير مننا
مهاب قلب الموضوع هزار : يعنى شايفانى بضربها .. هى ال خفيفه اوى
يلا انا هروح اوضتى ارتاح وهغير
نهله: تمام اشوفك الصبح بقى
مامتهم: مش هتتعشى
مهاب: لا هفطر الصبح معاكوا بقى
لانى اكلت وانا راجع ماانا مش هستنى كل دا
مامته: تمام يا حبيبى روح ارتاح
خرج مهاب من الاوضه و رايحه لاوضته فتح الباب اتفاجئ بال شافه ,,,
مهاب : ايه دا كله
دخل مهاب الاوضه وشاف ورد ف كل حته ال لفتت نظره ال زرعها مع رقيه والاوضه زى ماهى الا السرير اتغير بواحد كبير راح لاقى ع المكتب كارت مكتوب فيه
**حمد الله ع السلامه نورت مصر والبيت والدنيا الورد ال زرعته كان مستنيك ومبسوط انك جيت .. روكا **
بص ع الكارت وابتسم ولقى صوت ف ضهره : رقيه ال جهزت كل حاجه
بص لقاها مامته : بتقولى ايه
قفلت الباب ومشيت خطوتين ناحيه مهاب: رقيه ال وضبت اوضتك وكانت لمده 8 سنين ال بتنضفها مش كانت بتسمح لحد يدخل هنا غيرها ... هى ال حطتلك الورد والحاجات الحلوه دى كلها
مهاب بيص حواليه : فعلا حاجات حلوه
مامته: حاجات حلوه من انسانه روحها وكل حاجه فيها حلوه
مهاب بيضحك: بلاش اوفر يا زوزو ولا علشان بنت اختك
رقيه عاديه جدااا زى اى بنت مصريه .. غير كده مش شايفه انها تخينه شويا
مامته بنفس اللهجه: وانت مش شايف نفسك طويل شويا
وايه تخينه دى ليه شايفها بتتدحرج قدامك ولا مش عارفه تمشى هى مليانه عادى يعنى ولا لازم تكون عصايه زى سهر
مهاب بيغز لمامته : وماله العود الفرنساوى حاجه كده
مامته قاطعته: المصرى يغلب الفرنساوى وانت مصرى وهتشيل المصرى يلا ارتاح
خرجت مامته وهو معرفش يتكلم وتنح مكانه بيبص حواليه فى الاوضه وفتح الشباك وشم هوا وبيسترجع ذكريات زمان ...!!!
______________________________________
تانى يوم الصبح صحى مهاب ع صوت دوشه بره اوضاه وصوت حاجات وناس
لقى حد خبط ع باب اوضته رد عليه: اتفضل
كانت رقيه فتحت الباب ودخلت باابتسامه : صباح الخير
مهاب ماسك راسه: صباح الصداع
رقيه ملامح وشها اتغيرت : انا ازعجتك ..انا خبطت ع الباب وانت قلت ادخل
مهاب ضحك: لالا مش انتى طبعا .. صوت الدوشه دا ال بره
رقيه ابتسمت: دا جيرانا ومعارفنا بنجهز بقى علشان كتب الكتاب والقعده ف الحديقه تحت
مهاب ماسك راسه: اها .. طيب
رقيه: تحب اجبلك الفطار هنا ولا تنزل تفطر تحت
مهاب بااسلوب تناكه: لا ابعتهولى هنا وفطارى ماما او نهله عارفينه ومعاه النسكافيه البلاك
رقيه باابتسامه: حاضر
خرجت رقيه ونزلت بسرعه حضرت الفطار لانها عارفه هو بيفطر ايه وواخدت الصينيه وطلعت بيها للاوضه لمهاب :
خبطت ع الباب ومهاب رد وقال: ادخل
فتحت رقيه وع وشها ابتسامه: الفطار
مهاب باصص لرقيه: وتعبتى نفسك ليه يعنى اى حد كان ممكن يجيبه
رقيه بكسوف: وهو انا اى حد
مهاب: اى حد شغال ف البيت ولا انتى شغاله ف المطبخ انهارده ولا انتى بتحبى المطبخ من منظرك وال شايفه انتى من غاويين يناموا فيه
استغربت من الكلام رقيه وبصتله: مش فاهمه
مهاب : لالا متحطيش ف بالك .. شكرا ع الفطار
رقيه : عاوز حاجه تانى
مهاب: لا شكرا لو عوزت هنزل بنفسى
رقيه: انا موجوده ف اوضه نهله معاها لو احتجت حاجه عرفنى
مهاب: اوك