إني رزقت حبها بقلمي دينا جمال

الفصل السادس

إني رزقت حبها ❤❤

الفصل السادس
¤¤¤¤¤¤¤¤

وضعت يدها علي شعره تمسد علي خصلات شعره برفق تهتف بخفوت : أحمد أحمد اصحي يا أحمد

همهم بضيق وهو نائم لتكمل برفق : اصحي يا أحمد عشان الصلاة

رد بنعاس يحاول فتح عينيه : صلاة ايه احنا مش صلينا الفجر

ابتسمت بحنان : الجمعة يا أحمد الساعة بقت 11

انتفض من مكانه يهتف سريعا : يا نهار أبيض 11 أنا كدة مش هحلق الخطبة معلش يا هنا حضريلي الحمام بسرعة

ابتسمت بحماس : الحمام جاهز وهدومك جوا وكويتلك الجلبية البيضا والفطار جاهز برة

ابتسم بسعادة: دا ايه الدلع دا ما الجواز طلع حلو أهو

ابتسمت بخجل تفرك يديها بتوتر : يوووه بقي يا أحمد أنا هروح اعملك شاي

فرت من الغرفة سريعا لتتسع ابتسامته قام يمط ذراعيه في الهواء بكسل تمتم بابتسامة واسعة : يا بركة دعاكي يا اما

بعد قليل كان يجلس علي طاولة الطعام الصغيرة يراها وهي تتحرك كالفراشة بخفة هنا وهناك ، تشغل أعواد البخور وتضعها في جوانب الغرفة تعيد ترتيب الاثاث المرتب  تخرج بعض الطعام من الفريزر

أحمد مبتسما: يا حبيبتي تعالي اقعدي دا انتي لسه عروسة يا هنا النهاردة لسه الصباحية يا ماما

هنا بحماس : عايزة الحق اجهز كل حاجة بسرعة قبل ما مامتك تيجي عشان تبقي فخورة بمرات ابنها

ابتسم لها بحنان : طب تعالي افطري وبعدين اعملي اللي انتي عايزاه

جلست علي الكرسي المجاور تهتف بهدوء: صحيح يا أحمد احنا ما اتكلمناش في موضوع شغلي

تنهد بهدوء : أنا قولتلك أنا مش هغصبك تسيبي شغلك لو انتي عايزه تكملي فيه براحتك بس حطي في اعتبارك أنك مش هتحطي جنية واحد في مصاريف البيت 

تنهدت بضيق : مش عارفة يا أحمد والله
ابتسم بهدوء: الي فيه الخير يقدمه ربنا ، أنا هنزل أصلي الجمعة عايزة حاجة وأنا جاي

هتفت بخجل: ممكن تجبلي شوكولاته

ضحك بمرح حتي بادت نواجزه : ومالك مكسوفة ليه كدا ، هنا حبيبتي أنا جوزك يعني اطلبي مني كل اللي انتي عايزاه من غير كسوف

ابتسمت له بامتنان : متشكرة أوي يا أحمد
قبل جبينها برفق : يا هنايا ما فيش شكر بين الراجل ومراته ، أنا هنزل بقي عشان ما اتأخرش يلا سلام عليكم

اتجهت خلفه الي أن وصل الي باب الشقة لتهتف : وعليكم السلام خلي بالك من نفسك

ابتسم بهدوء ليهز رأسه إيجابا ومن ثم رحل
______________________________