Mga Tula ng Pag-ibig

Wala

Marami na akong ginawang katha

Mga maiikling kuwento, maging tula

Awit na di na nagawang lapatan ng nota

O mga pinta na nalipasan ng panahon,

at di na natapos pa.

Habang nakatanaw ako

sa bintana ng aking kuwarto

Nag-uunahan ang mga salita

Gumagawa, bumubuo

Pinipilit akong muling balikan

Ang sining na tila aking napag-iwanan.

At ano nga ba ang nagtutulak sa akin

Na ang pagsusulat ay muling balingan ng pansin?

Sabi nga nila diba

Ang sining ay nagmumula sa damdamin

Naglalagablab, nag-aapoy

Na ang tanging lunas ay tuluyang bigkasin.

Ikaw lang naman ang tanging dahilan

Kaya ito ay muling naisipan

Dahil wala na akong ibang maisip na paraan

Upang ipaalam sa iyo ang aking nararamdaman.

Oo, ako'y duwag

Hindi masabi ang damdamin

Dahil hindi ko mahagilap

Ang tamang salitang sa iyo'y bibigkasin

Oo, walang salitang sa iyo ay papantay

Ni walang pintang sa iyo ay hahanay

Walang kanta, walang katha

Na kayang bigkasin ang iyong angking ganda

Nawa'y sa simpleng akto

Nang pagsusulat ko para sa'yo

Iyong maramdaman at mapagtanto

Ang nais kong iparating sa'yo -

Wala kang katulad, wala kang kaparis

Pagkat ang puso ko'y inangkin mo na nang labis.