صغيرة باعوني لهجة عراقية

الفصل السادس

#صغيرة_باعوني

كتابه رؤى صباح مهدي

الفصل السادس

ما عرفت شجاوبها يعني هم اولاده شردوا من عندة وتخلصوا من عاداته الكريهة بس اني شلون اكدر اتخلص منه وهو ما يريد يعوفني؟ . شلون ياربي راح اخلص من هالضيم. الخوف كل ليلة لا يجيني ويموتني خلاص. والخدمة اللي ما حسبت الها حساب وعبالي لعب بس كلما تمر الأيام وتفكيري ينضج احس بالضياع، ضياع من كل الجوانب يعني الدراسة راحت علية وشبابي انتهى وية رجال اضعاف عمري واهلي ممنوع ازورهم ويزوروني وباقية على الاتصالات لحد ما الله يفرجها ومحبوسة بالبيت وعلية حارس. وفوك هذا كلة اشتغل خدامة وممرضة ممنوع افك حلكي او اناقش او امتنع عن اي شئ يكوله.

بقت عفاف يمنة ذيج الليلة ونامت بغرفة أمها لاول مرة من دخولي لهذا البيت اكو نفس جديد يتنفس وياية. ما اعرف ليش حسيت بذيج الليلة بشوية امان وراحة كاني بوجودها محمية لان ابوها مراح يسوي شئ وهي بالبيت. بس هالامان انتهى الصبح لان من الفجر طلعت قبل حتى لا يكعد ابوها تنفيذا لاوامره وبعيونها الف دمعة لان تمنت تظل يم امها بعد كم يوم وما خلاها ابوها.

كعد مغوار وما تريك طلع بلا حتى ميصبح حتى وجهه ميكصة الطبر ما اعرف السبب. وبقيت اني كالعادة لروتيني القاتل وتقريبا الساعه بال10 سويت جاي وريوك وكلت خل اعزم اياد مرة لخ يتريك وياية على الأقل اسولف وية بشر احسن ما اتخبل وحدي. مديت راسي من الشباك القريب علي وصحتلة وهو ما عاند رأساً اجة يركض وعلى وجهه ابتسامة وكعدنة نتريك سوة فسالته بفضول رغم اني خمنت معظم الاجابات بس ضوجة وردت التهي ويا:

-انت هم متزوج؟ اشو ليل نهار هنا ما عندك بيت يعني حاليا.

جاوبني وهو يحط مربى على اللفة اللي دياكلها:

-ما عندي احد كتلج اني يتيم وفقير والنسوان يريدن زنكين وحلو واني مثل ما تشوفيني ماعندي لا فلوس ولا شكل

باوعت علي وسألته لان اشوفه ما يزين ولا يغسل ولا يهتم بنفسه:

-زين انت متعود يعني تهمل روحك بهل الشكل؟

خنزر علية وكال:

-شنو قصدج؟

كتلة بس بتردد لان حسيته مثل الي نفر من كلامي:

-يعني متغسل مثلا او تنظف نفسك؟ متزين شعرك متكص اظافرك؟ دشداشتك متغسلها ؟ هالشغلات البسيطة يعني

جاوبني واصلا ما اهتم لانتقادي:

-اني رجال هاي السوالف خليتها الجن النسوان تحبن تنظفن وتعدلن وتعطرن.

ضحكت من هيج كال وجاوبته:

-تعرف ليش ماعندك احد؟ اقصد مرة يعني؟ مو لان النسوان يركضن ورة الحلو او الزنكين لا.. بس لان يريدن واحد صاك والصاك مو الزنكين ترة الصاك هو المرتب نفسة بحيث يبين حلو وزنكين بينما هو لا هاي ولا هاي