- الصحاب ...
- اللي حوالينا دول مش صحاب ، لالا ، دول اشباه صحاب ، الشات الملون و القلوب و الورود ، دول مش صحاب
الصحاب مش اللي بننام معيطين بالليل و بنصحى نكتبلهم و نشيت و نهزر ، و هما ميعرفوش ، الصحاب بتدبل سوا و بتنضج سوا ، زي اغصان الشجر ، سوا ف نفس الشجرة ، بيمروا بنفس الظروف .
أنزل بوست أقول اني لوحدي ، يقولوا و انا رُحت فين ..
لكن دا مجرد كومنت بس !
أنا اقرب صحابي الى الان ميعرفوش عني سوا ملامح شخصيتي ، لكن حاسة بايه ، محتاجة ايه ، محدش لأ ..
اتسألت مرة :
لو وقعتي ف مشكلة مين من صحابك اول واحدة هتتصلي بيها !
- مفيش ..
اه مفيش ، كله فـ حياته ، كله راسمني ع ورقة بيتباهى بيها إني صاحبته .
الصحاب المفروض مفيش بينهم مين سأل عن مين الاول ، مفيش بينهم ماهي معاها رصيد تكلمني انا ممعيش ، لا الصحاب ان شالله يكلموا بعض ع النوتة !
كان نفسي يبقا ليا الصاحبة اللي اعرف اتصل بيها ٣ الفجر ترد و صوتها رايح م النوم عمالة تفوق نفسها عشان تسمعني .
مش اللي لو اتصلت بيها ٣ العصر ترد بعدها ع النت ؛ معلش ماشوفتش التلفون ساعتها ، خير ؟
كان نفسي لما اكون بمر بمشكلة لو محدش عارف هي ايه وانا مش عاوزة احكي يجروا ع صاحبتي يسالوها هي مالها ، عشان عارفين اني بحكيلها و مبخبيش عنها حاجة .
كان نفسي تكون ليا اللي لما اغلط تهزقني عشان ارجع عن غلطي ، و ميهمهاش ازعل المهم تفوقني .
كان نفسي فـ واحدة اعملها منشن ف كل بوست يعجبني من غير ما استنى هترد ولا لأ .
كان نفسي فـ واحدة اعرف اقولها انا مخنوقة دلوقتي و هقفل تقفل والاقيها بتكلمني ، الاقيها نطالي ف اوقاتي ، الاقيها مبتسبنيش .
كان نفسي ف واحدة تكون صاحبتي بجد ،
بس انا معنديش
🌚💔
أنت تقرأ
كلام على ورق
Non-Fictionمجرد كتابات اكتبها لملئ فراغي و ربما تصف حالة البعض💁 ان وجدت تشابه بين كتاباتي وكتابات اخري فهو مجرد مصادفه لا اكثر🙈❤
