في بعض الحروف اللي الناس بتعتقد انها غلط و بتكتبها على حسب الطريقة اللي بتكتبها بيها في لهجتها ، مع احترامي لكل القراء سواء كان الأمر دا بينطبق عليهم أو لا هتكلم في الموضوع دا شوية.
دلوقتي لما تيجي مثلًا تكتبي (جوجل)
في ناس ممكن تيجي تكتبها (قوقل) ،(غوغل)
انا هتكلم في النقطة دي بقا ، دلوقتي الأمر دا بيختلف من دولة عربية لأخرى باختلاف اللهجات و بالتالي بتختلف طريقة الكتابة .
فمثلًا احنا كمصريين بنكتب حرف الـ'ج' عادي و بننطقه زي ما هو ، بينما حرف الـ'ق' او الـ'غ' ليهم نطق مختلف تمامًا ، و تحديدًا لما نقول كلمة بالعامية بنكتبها ازاي؟ مش المفروض بنكتبها حسب طريقة نطقنا!؟
ايوا بظبط هو دا اللي هتكلم عليه.
دلوقتي لما تشوفي واحدة كاتبة كلمة أجنبية و فيها حرف g و تقوم كتباها بحَسَب لهجتها بيكتبوها ازاي فيها ، سواء 'ج' أو 'ق' أو 'غ'
متجيش انت تتفلسفي عليها و تقوليلها ( لا انت بتكتبيها غلط المفروض تكون بحرف الـ'ق' /الـ'غ' )
لأن أولًا بكل اللهجات هي تعتبر صح و هتدي نفس المراد في النهاية،لأنها كدا ولا كدا مش كلمة عربية و ليكي الحق تكتبيها بالطريقة اللي انت متعودة عليها .
يعني مثلًا انا مرة كنت بتكلم في الستوري/الحالة _بتاعتي_ و ف نص الكلام كنت كاتبة كلمة (بانجتان) كدا بحرف الـ 'ج' ، المهم في واحدة جت اتشاكلت معايا و شتمتني بوقاحة عشان كنت كتباها 'بانجتان'بدل 'بانقتان' 🙃.
نو كومنت.
احم ننتقل للي بعده.
بالنسبة لحرف الياء ..
مين اللي قال انك لما تكتبي حرف الياء "ى" كدا من غير نقط يعتبر غلط؟
زي مثلًا في 'ثاني ، دراسي ، قاضي ، هاني ...إلخ' في بيكتبوها كدا 'ثانى ، دراسى ، قاضى' كدا بالياء اللي من غير نقطتين.
انا بس عايزة أقولك ان دا مش غلط في اللغة العربية من الأساس ، لأننا ممكن نكتب كل الكلمات من غير نقط أو همزات أصلًا ..
النقط و الهمزات دي بس وظيفتها هي التسهيل على القارئ التفرقة بين ألف الوصل و همزة القطع و حرف الياء و الألف المقصورة 'ى' و هكذا ، و احنا كعرب أظن متمرسين في اللغة العربية كفاية عشان نقدر نفرق ما بينهم ، فَمتجيش تقولي ان حرف الياء مينفعش يتكتب من غير نقط ،بدون ما تتأكدي إن كان كلامك صح أو غلط.
و الدليل ان في كُتَّاب كبار و خبيرين كتير بيكتبوا حرف الياء من غير نقاطها عادي .
و الإثبات الأكبر بقا هو ان في القرآن الكريم ،حرف الياء بيتكتب فيه من غير نقط.
فَ في النهاية موضوع النقط والهمزات دا أمر لا يؤخذ عليه في اللغة العربية و فيكي انك تحطيه أو لا ،دا مش هيضر كتابتك.
بينما الغلط فعلًا هو في الألف المقصورة زي في (سلمى/بُشرى) و اللي المفروض عند نُطقها بتُنْطَقْ ألف ممدودة، في ناس بقا تقوم كتباها بالطريقة دي (سلمي/بشري)، لا دا غلط تمامًا لأن في فرق بين الألف المقصورة'ى' و اللي بتُلفَظ ألف الممدودة و الياء اللي بننطقها في (رامي) مثلًا .
فَ دايمًا أثناء الكتابة تاخدي بالك من الأمر دا ، و متتفلحسيش على حد و انت مش متأكدة من كلامك.
و بس كدا ،آسفة لو طولت عليكم بس دا كان موضوع مهم كنت عايزة اتكلم فيه من فترة.
إلى اللقاء 🙆♀️
أنت تقرأ
نصائح برتقالية
Non-Fictionعلى مدار أربعة أعوام أمضيتها في ذلك العالم البرتقالي ،إستخلصتُ لَكِ تلك النصائح و الملاحظات التي أُرجح عليكِ اتباعها كَمُستخدِمَة واتباد. ||130519||
