روايــات واقـعيه قـصيره ❤️

قصه واقعيه!!!

اسمعن بنات اني تزوجت وعمري ب٢٠ سنه جنت بنيه البس كله على الموديل  وكشخه وجمال ودلال جنت مااهتم ل اي شي ثاني جنت شبه مغروره
زوجي يكبرني ب ٧سنوات
بدايه زواجي عشت ملكه ابيتي كلشي متوفر الي دلع الى ابعد الحدود جان زوجي ميحبني لا جان يعشقني
جان بس يباوع عليه ويكول سبحان الله الي رزقني بوحده مثلج
مرت عليه سنتين جانت اجمل سنين حياتي استغنيت بيها عن صديقات الطفوله والدراسه
حته اهلي جنت مااروحلهم ولا ازورهم لان جنت بين احضان زوجي اعيش حياه متنوصف
مو محتاجه شخص ثاني واني عندي شخص منطيني الدنيا كلها
جانت المشاكل بيناتنه شبه معدومه حياه عشتها تشبه الحلم رومانسيه ،حب ،شوق ،غيره
جنه ينضرب بينا المثل
الى ان اجه اليوم الي حملت بي جانت فرحتنا متنوصف حجزنا وسافرنا دوله هايه جانت هديتي مال بشاره الحمل رجعنه بعد اسبوعين جنت مثل الاميره ابيتي وجنت كل يوم يمر عليه احب زوجي اكثر واكثر ومستحيل استغنى عنه وزوجي نفس الشي جان يحبني حب جنوني وتعلق بيه اكثر واكثر الى ان اجه يوم ولادتي وجبت ولد وفرحنه فرحه جبيره والكل اجه وباركلنه وجانت حياتنه سعيده
وبفتره النفاس هنا جانت بدايه حزني وحسرتي اتذكر الموقف والاحداث وابجي على حضي الي هيه بفتره النفاس رحت بيها لبيت اهلي وجنت حيل فرحانه ومشغوله بمولودي
وجان رجلي كل شويه يدك عليه ويسال لو يمر عليه بعد اسبوعين من ولادتي زوجي تغير وبدل الله حاله من حال الى حال
صار كل ماادك عليه انتضار وانتضار جنت اكول يمكن يحجي ويه صديقه او امه او ابو جان يبقيني على الانتضار وميجاوب وبعدها جاوبني ولاول مره باسلوب سوقي ومنحط
انتي شتريدين اذيتيني وبعدين وياج
شفتي انتضار سدي واني اخابر
اني من الصدمه تبلعمت
زوجي حبيبي يحجي ويايه بهذا الاسلوب
وبعد مناقشات وزعل سد الخط بوجهي
واني كعدت ابجي لا يرد على مكالماتي ولا اتصالاتي ولا المسجات
الى ان اجه اليوم الي اطلع بي من الاربعين جان مواعدني نروح للبيت وحدنا انصدمت يدزلي مسج يكولي خلي ابوج يوديج للبيت
بعد نقاشات واصريت يجي للبيت ياخذني اجه واني جنت طالعه بكامل اناقتي وكل اهلي تعجبو بيه عفت ابني يم اختي  واني رحت ويه زوجي للبيت حته ناخذ راحتنه وابني مياذيني بليل
دخلت بيت عيالي كلهم تعجبو بترتيبي والكل يكول ماشالله جنت طالعه من الاربعين بشكل مميز الا زوجي جان بس يريد يعوفني ولا يباوع عليه ولا بحالي دخلنا بيتنا وسدينا باب الفرح وراناااا
كل شي بزوجي تغير لاحظت عليه التغيير اول مصعدت وياه بالسياره جانت حته عيوني ميريد يشوفها  اني بقيت ساكته
دخل هوه للحمام
واني كمت بدلت ولبست ملابس نوم وكعدت انتضره
وبغرفه النوم دخل وشافني كام يخزرني راح ولبس بجامته
وكال اني تعبان اليوم وباجر ورايه دوام لازم انام من الصدمه معرفت شسوي كمت وغيرتي ملابسي ولبست لبس عادي ونمت وكتله تصبح على خير
مارد عليه اني بهاللحظه كلبي كام يشتعل نار
وماحبيت اساله عن الاسباب وكلت احجي وياه من يكون شويه هادي
وهنا راح ابدي وياكم مسلسل معاناتي ويه زوجي
استمريت على هالحاله فتره جنت كل مااساله شبيك يجاوبني مابيه شي
حاولت افهم منه شنو الي غيره ماكو جواب انسان غامض ميجاوب
اتحملت لان احبه واني مااعرف شنو سبب تغيره
بحثت حاولت ماكو نتيجه
والاهمال والرومانسيه انعدمت صارت بس اهانه وغلط وضرب
اتغير ١٨٠ درجه حالتي صارت تعيسه وزني نزل وجهي ذبل
ومره من المرات طلعت وياه بالسياره اشتد الحوار بيناتنه واني من النوع الهادي مااصيح ومن يشوفني ساكته ينقهر ويزيد لزمني من شعري وكام يضرب براسي بالجامه مال السياره
رجال شافنه اجه يركض نزل على رجلي وتعارك وياه اجتي الشرطه فضت السالفه ركب السياره وعيونه تجدح نار وصلنه للبيت كال روحي لبيتج بسرعه يلا انزلي
اني نزلت بس ارجف اجه ورايه للبيت وقفل الباب ولزمني كتلني كتل مصاير وبعد ساعتين طلعت ورحت لبيت اهلي اخواني تخبلو كالو عوفي ونرفع بي قضيه ونشتكي كتلهم لا تشتكون ولاترفعون قضيه خلوو عوفو
بعد اسبوع اتصل عليه ورجعني للبيت
وبيوم من الايام الرجال تعب وتخربط اخذو اخوانه للمستشفى الرجال ميباوع بوجهي ميريدني بس اني دست على كلبي وكلت ميخالف اتحمل الدكتور طلب هويته جان مخليها بالسياره رحت اجيبها لكيت تلفون وكله مسجات من بنات وينك يالكاطع وينك متجاوب وكمت اتذكر جان يجيني وركبته حمره اساله يكلي انجرحت جان يدخل للحمام يحلق جسمه ويطلع ويجي سرحان ومتونس بعد اربع ساعات واذا شافني يكلي اطلعي بره ماريد اشوفج
كل هذا حسيت اني صدك مسكينه وحسيت انه صدك ميستاهل واخبث انسان على الارض
يعني بالوقت اني الي احتاجه بي جان يروح يمتع نفسه ويه غيري جان جسمي كوله ينتفض بس كلت خل اسكت واشوف للنهايه
وبعدها طلع زوجي من المستشفى ونام على السرير وراح بسابع نومه اخذت تلفونه وفتحته ودخلت على الصور والمسجاات ولكيت مسجات خلاعيه وصور بنات وهو ماخذ وياهم صور كمت ابجي وابجي
انتضرته يكعد من النوم وصارحته بكولشي وطلعتله المسجات والصور
تعرفون شنو رده فعله جرني من شعري وشبعني ضرب وطردني من البيت ويكلي روحي لبيت اهلج ماريدج رحت لبيت اهلي امي تباوع عليه وتبجي على حظي
رجعت بعد شهرين لحياتي الكئيبه اريد ارجع زوجي اليه اريد اكسبه
استلمت راتبي ورحت للسوك اشتريت قمصان نوم جديده وكولشي يعني جهاز عروس كامل
رحت للصالون صبغت شعري ركبت رموش دائميه سويت تاتو لحواجبي سويت كولشي يغضب الله في سبيل ارجع زوجي
الناس منو يشوفني يكول شنو هالجمال بس زوجي جان ميشوفني بعينه ولا شي
تعرفون شنو احساس المره من زوجها ميريدها
شي مو طبيعي احسلس يعذب كملت اربع سنوات واني بهالحال
خيانه وضلم ومااشوفه الا قليل صرت اكره البيت بس وراها صارت اللحظه الي غيرت حياتتي كولها حاولت اجذب زوجي بطريقه تغضب الله بس كولشي يغضب الله ميدوم
جنت يوم من الايام طلعت للسوك وجنت بكامل اناقتي اجتي بنيه عليه منقبه جان تكلي اختي اريد اسالج سؤال ممكن تجاوبيني كتلها تفضلي اني عبالي تسالني على مكياج على العبايه مالتي جان تكولي
لو الله امر ياخذ روحج وانتي هسه بكامل اناقتج والشباب كلها تباوع عليج بيا وجه تقابلين ربج
اني ضليت ساكته وشريط ذكرياتي كوله مر كدامي بثواني اتذكرت اني سويت حواجبي وشم والواشم والموشوم مطرود من رحمه الله تذكرت اني اطلع من البيت ومكياج واناقه والي يفتن بي غير الناس يطرد من رحمه الله يعني صرت مطروده من رحمه الله مكدرت اجاوب البنيه ب اي كلمه كالت ماريدج تجاوبين اريدج كل ماتحتاجين شي لو تفضفضين تخابريني كتلها بس اني ماعندي مشاكل وعايشه سعيده ليش تحجين هالحجي كالتلي مبين عليج الحزن والهم مديت ايدي واخذت الرقم منها رجعت للبيت واني افكر بالحجي مال بنيه  رحت اباوع على وجهي بالمرايه مكياج وعطور وعبايه مخصره شلون الله يوفقني بعدها فهمت اني شلون عايشه الله حرمني السعاده والاستقرار لان غضبان عليه ولاول مره من خمس سنوات يلا كمت اصلي صرت اصلي وابجي واطلب من الله يهديني للطريق الصحيح شكيت همي لربي ولاول مره انام مرتاحه ثاني يوم كعدت رحت للدوام بالسياره فتحت القران كمت استغفر الف مره باليوم تعرفون شنو الف مره مثل العسل ولا احس بيها يوميآ
وبعد اسبوعين جان زوجي مينام يمي بالغرفه جان ينام بالصاله اول مره بعد اسبوعين اجه صعد للغرفه ولزمني من ايدي وكال ل ابني بابا انزل العب ويه ابن عمك. جوه جانو بيت اخو بالطابق الجوه واني ماخذه الطابق الثاني  دز ابني ننزله جوه قفل باب الغرفه واجه عليه ومااشوف اله زوجي حضني وضل يبجي مثل الطفل ويكول اني قسيت عليج اني ضلمتج اني ضايقتج ويبجي تحملتي ضربي واهاناتي اريدج تسامحيني مراح ارتاح اله تسامحيني
ياسبحان الله اربع سنين اني وياه شفت الويل وبلحضه يطلب اسامحه واول مره احس عنده مصداقيه وحضنته وعشنا ثلاث ايام بالعسل وراها بعد اسبوع جنت بالمطبخ واكفه اسوي الغده اجه عليه كلي تعالي
هذه عقد مال الشقه جانت عندي بعتها وهاي فلوسها الج وهاي سيم كارتات ٣ كدامج كسريهم وكل ماضي اسود راح امسحه من حياتي وهايه هديه الج فتحتها واشوف جايبلي حجز مال عمره اني وياه نروح من فرحتي دمعت عيوني لزمني من ايدي وحضني داحس اني اقدر انسان على الارض شلون اعوف ورده مثلج واروح على غيرها
صلاتي التزمت بيها وصارلي سنتين ولحد الان يوميه استغفر الف مره
تغيرت حياتي بعد ماغيرت كلشي بداخلي
كل الي غيرني رب العالمين والبنيه الي التقيت بيها بالسوك جانت تنصحني وتعلمني
واذكرووو ربكم ترى العين حق
اتمنى شفتو قصتي وحياتي شلون جانت وشلون صارت وشلون حليتها بطريقه صحيحه
(منقوووووله)
والاستغفار اني مجربته راااااحه نفسيه م̷ـــِْن صدك
استغفر •اللّـہ̣̥ رَبّـ❤ـيٌ واتوب اليه