قبل كم يوم اكو ولد صاحبنا شوية رافع خشمة ... عباله الانسان يعلى بالشهايد و الدراسة ... علساس هو فد شي و كل مينفتح نقاش يكوم يضرب امثال و اسماء انكليزية و عربية ...
طبعا اني مجنت حاضر هذا الموقف بس الولد خلف الله عليهم حجولياه ..
عدنا ولد صاحبنا اسمه ثائر .. عنده جمبر مال جكاير على الشارع العام .. هذا الناس كلها تعرفه و شباب المنطقة كلهم يعرفوه .. صاير نيشان بشارعنا ... اذا تريد تدلي واحد على مكان تكله يم ثائر ابو الجكاير ..
حتى الغربة مو من المنطقة مرات من يتيهون بسيارتهم يطبكون على ثائر يسألوه على مكان وهو يدليهم .. ولد حباب و من أهل الله ..
ذاك اليوم الشباب كاعدين بالحلاقة مال كريم العنقرجي .. و انفتحت مواضيع و من ضمن الكاعدين ثائر و صاحبنا الثاني الرافع خشمه ...
صار نقاش على عدة مواضيع ..
النقاش كله ثائر ساكت مفتح حلكه ابد ..
الولد الرافع خشمه كام يسأل الحاضرين سوأل عن واحد من العلماء .. وصل يم ثائر كاله انت اطبك على صفحة ..
ثائر ابتسم .. كاله تسمحلي احجي كلمتين كدام الشباب قبل ما اطبك على صفحة ..
الرافع خشمه كاله كول ؟
كاله اول شي انت المصطلحات الانكليزية الي دعبلتها على الولد كلها غلط .. و كلها تلفظها غلط .. و كل الاسماء و التواريخ الي دعبلتهم هم غلط ..
صارلك ساعة تسفط حجي على الشباب كله غلط ...
و اني اعتذر لان حجيت وياك بهل الفظاظه بس انت شفتني ساكت و ما احب اشارككم الموضوع مو لان اني ابو جمبر جكاير و ما افتهم شي بالموضوع الي طرحته ..
بس لان اني ما احب اشارك اصلا ,,,, احب اسمع دائما و اتعلم من الصغير قبل الجبير .. و احب اخذ معلومات تخدمني .. بس بعد مره اكلك انت معلوماتك كلها غلط ومجرد تسفيط ..
كاله شلون اثبتلي ..
ثائر وكف .. كالهم هذا تلفون بي انترنت .. انتو صدكتو بكلام الولد لان واثقين من عنده دارس و عنده شهايد و لاب لاب لاب ..
.. بس خلي نجي نبحث عن الاسماء الي كالها و عن السوالف الي حجاها هنا .. و صدك قارن عن طريق الانترنت بالاسماء طلعت كلها غلط و ثائر معلوماته طلعت صح ..
كل الشباب الكاعدين ضحكو على الرافع خشمة ابو الشهايد ...
ثائر اعتذر من الرافع خشمه كدام الشباب .. كاله ياخوية مو شرط الشهادة تسوي الانسان و تخلي نيشان بنص العالم ..
اني المقابيلك هسة .. اشتغل ابو جكاير و ما اعرف ليش انت كلت اطبك على صفحة .. يعني شغلتي عيب مثلا لو جاهل اني !!!!!
لو شغلتي شبيها .. زين انت تشوفني دائما كاعد بالجمبر .. تعرف اني امتحن خارجي و ادرس علوم سياسية ... تعرف اني بوكت انت تتلفظ الثانيكو .. تانكيو اني عندي ماستر انكليزي .. ..
شبيك بعد نافش ريشك بشهادتك الي متعين بيها واسطة .. و كاعد صارلك ساعة تسفط عالشباب كال برنادشو و كال شكسبير و كال نيوتن و انت اصلا ملكط اساميهم من الانترنت ..
يكولون الشباب فد خجل الرافع خشمه و معرف يجاوب صار لونه احمر طماطه .. و غلس و هو طبك على صفحه ..
بس تصدكون ولا واحد من الشباب الكاعدين صدك ان ثائر ابو الجكاير صدك يدرس علوم سياسية و صدك عنده ماستر ..
تدرون ليش
..
لان هذا واقعكم
لان هاي حقيقتكم ...
لان هاي سوالفكم .....
تشوفون المظاهر و متهتمون للجوهر .......
و راح تبقون هيج تقيسون الدنيا طول عمركم .............
بس الحقيقة اعمق من جمبر جكاير لو بسطية مخضر بسوك شعبي ..
الحقيقة اعمق من عامل بناء و شوية هدوم ملطخة بالتراب و الجص ....
الحقيقة اعمق من مكينة خياطة و ظهر مكسور ....
و الحمدلله على كل حال ...
انتهى
أنت تقرأ
روايــات واقـعيه قـصيره ❤️
Contoلقصص حقيقيه 100/100 قصص عراقيه حقيقيه واشعار وخواطر💕رومانسيه 💕 جميله 💕 امسيه سعيده مع zahraa_hamed 💕💕💕💕💕💕💕💕💕💕
