الايام_ما_ترحمش
🍃☘اجزاء الكاتبه زهور جمال الدين 🍃☘
بعنوان 👈#جنان_حوشنا 🌹🌻
❣الجزء الاول ❣
من لما امهم عمتك فاطمه قالت لبناويتها عندنا خطابين ل هبة وهما يجرو وهما يوتو وفرحانين
طق الباب ..طلع محمد خوهم فتح ..
خشت المراءة اللى جايا تخطب ..ايقولولها عمتك تومية .. وجايبه معاها اختها محبوبة جاها ..
خشو النساوين وقعمزو ...الحق هوا الحوش بسيط هلبا ...حال الارملة اللى تعانى فى عويله ...
لكن تومية عجبوها.. لان الناس اللى بعتوها شكرو فى البنت هلبا.. فماهمهاش حالتها المادية ..وتبو الحق بعد ماخشت وهدرزت عليهم حتى عمتى فاطمه عجبتها هلبا ...هدرزتها رزينه وكلامها كله واضح
خشت هاجر شادة فى ايديها سفرة العصير: السلام عليكم ..
لابسه سروال امريكانى لاصق وتيشرت وردى وقايمه شعرها فوق بالتوكة ديل حصان ...
-النساوين : وعليكم السلام
مدتلهم العصير والشوكولاته..وخدو منها
بعد ماشربو العصير ..قعدو النساوين ايهدرزو .
وهاجر اتوتى فى الشاهى فالمطبخ ...وهبة قلبها ايطق لابسه قونه كحلة استريت وبلوزة موف هادى وفاتحه شعرها كاري.. وحاطه بودرة واحمر خدود
-تومية: انا ولدى بيسكن معاى فالدور الثانى .. زى خوته ..كلهم سكنو معاى واللى دار حوش طلع
-فاطمه : ربي يحفظك ليهم .. اهو حتى انتى دايرتلهم حل
-تومية : انا الحق ماعندى مانقول فيكم يافطومه يااوخيتى ... لكن هما يشبحو بعض كانا عجبها وعجباته نتوكلو .. راهو انا وياك غير بيش نكملو بس..الراى الاول والاخير عندهم هما الزوز
-فاطمة: انا بناويتى لين مات بوهم وهوا مربيهم عالدلال.. ومايفرض عليهم فى شى ..عاطيهم حريتهم وشخصيتهم وقراراتهم ياخدو فيها بقناعتهم
-تومية : هيا كانا اطيح فى ولدى جلال ..ماخلى ربي ماعطاها ..زين ومال وشخصيه
وخشت هاجر تمد فالشاهى ....
خدت كل وحدة طاسه شاهى بالصحن ومعاها ثلاث انواع حلويات
-التوميه : ماشالله عالمقروض يدوب فالفم دوبان منين واخدينه
-فاطمه : المقروض دايراته هاجر ..فالحة فيه
-التوميه : يسلمو يدياتها تقولى خدمه معمل
-هاجر: الله يسلمك ويحفظك
محبوبة تتفرج على هاجر وخلاص
-توميه : محبوبه خيرك ساكته ..شاركينا
-محبوبه تشبح لهاجر واشرت عليها بصبعها : انا عجبتنى اهيا👈
هاجر انصدمت وفرحت فى نفس الوقت😍
-فاطمه تلفتت للتومية : نحسابكم جايين لهبة ولا
-تومية متفاجئة : ايه انا جاية للكبيرة
-محبوبة : انا منتكلمش على جلال ولد اختى ..انا نتكلم على مراد ولدى
-توميه : ااه مراد.. شنو انتى جايه تخطبى حتى انتى شورك منغير مانعلم 😅
-محبوبة : لا والله ماهى فالنيه..لكن احنا الحق مراد ولدى هالايام رخى شوى وقالنا دورولى ..
-هاجر بكل خفة نطت : وانا موافقه
-فاطمه تحشمت وتفنص فى بنتها 😳: شنو موافقه
.. انتى غير ديري امتحانك متع الشهادة الثانوية
-هاجر: الامتحان مازاله شهر ونص ..عادى
-فاطمه تفنص فيها : بري نادى اختك تجى تسلم على عمتك التومية يلا
-هاجر مش قادرة ادس فرحتها : باهى يا ماما
