#قصه_رمانه@ جزء خامس
..
مااعرف بعد شلون اتصرف ويه هشام بقيت متفشله وكمت اتجنبه وابتعد عنه احسن من ما كل مرة يفشلني
العصر سمعت من أمي هشام راح يروح للطبيب عمي محمود ياخذه يمكن لهالسبب ضايج وممرتاح ويفرغ غضبه عليه
بقت أمي تحجيلي هواي شغلات عن العلاقات الزوجية وشلون المرة تتعامل ويه الزوج طلعنه من البيت وباقر يوصلنه بسيارته وراحت ويانه عمه هدى ومرت باقر للسوك والطريق كله من وحده لوحده استلمني مواعظ وقصص بس للامانه تعلمت بكم يوم اشياء كبرتني سنين وحسيت بمسؤؤليه وبرابط وواجب تجاه هشام ..
دخلنه محل ملابس نسائية ومكياج وعطور كتلهم والله هشام ميحب المكياج مقبلت اشتري اي شي بس عمتي هدى كالت ذني قمصان نوم يخبلنّه للرجال مشككه مااعرف راسها من ذيلها
مرت باقر بس تضحك وكالت اني هم اريد اشتري منهن واعلمج منين تلبسيهن
اخذت كم واحد عمتي هدى كالت هشام يحب الأحمر والاسود وبعد كم شغله وطلعنه لكيت باقر مشترينه (كله) حمرة
نصبوا عليه هالا هالا اليوم تعلكها رمانه بالاحمر والضحك بفلس واني اخجل يربي شكد مفضوحه العروس
عمتي اشترت كعك وكرزات وجكليت كالت تعلوله الليل ومن هالسوالف ورجعت رغم التعب حضرت كلشي بلكي يتغير شويه ويحس ويقدر
باقر وأمي أختاروا مكان معزول النه بالبستان نخلي بي الكله بحساب الجو يبدي يصير حار بالايام الجايه
رجع هشام عيونه حمر وماطايقني اخذ منشفه وراح يسبح واني مسويتله شموع وفانوس جديد وكعده حلوة بالغراض اللي شتريتهم
نزعت قميص النوم وبقيت بهذا السيت المشكك كوه عرفت البسه وبقيت منتظرة إجه هشام تمدد وماهتم
كتله هشام وتاليها ؟
بقه يعاين صفح
اشرلي تعالي
اجيت كعدت يمه يباوعلي متعجب بالسيت
رمانه حلوة طالعه كيكه لايكلج
فرحت صدك هشام !!
اصلا انتي كلش هوايه عليه تخبلين وتجننين واحلى رمانه بالبستان
خجلت ..
بالبستان بس !
هز برأسه وبالعراق كله
يالله شكد حلو كلامك كوم خلينه نتعلل مثل الحبايب
ضحك ..
ها هشام رجعنا للضحك شوفني مامخليه مكياج
كام وكومني وكعدنه نكرز حب مشكل
رمانه ساعديني حبابه الوقت صادف قبل امتحاناتي وابوج ضاغط عليه واني مااكدر واشرلي على جسمي
اششش ... سكتته
ماعدي اي مشكله صدكني هشام
لخاطرك اتحمل كلشي بس انته ..
اني شنو !
لا هيج ..
تجيت على صدرة وحضنني وبقينه ساعات خلصنه الكرزات والكعك محجيت وياه بروحته للطبيب خفت احرجه وهو ماجاب طاري
كلي الايام الجايه محتاج راحه حتى أدرس ووعدته اصبر عليه لحد ما يرتاح نفسيا ..
مرت الايام وهشام مرات يروح بالبستان يدرس ويراجع ومن يتعب يجي للغرفه واني شغلت نفسي تعلمت اطبخ وكمت اساعد نسوان اخواني والكل مشغول بنفسه وبالجهال ومسؤوليات البيت
بس نظرتي للكل تغيرت واحس بنقص من اشوف واحد من اخواني يغازل مرته لو يتشاقه وياهه
حتى من يشدون الكله بليل اسمع ضحكهم ويه نسوانهم وشقه واحنا مثل الجماد اني وهشام نشدها ونظل نتكلب لحد ماننام
اخواني قبل هم هيج جاننوا بس هسه اختلفت نظرتي الهم وبديت احس بنقص لان هشام اذا يريد يغازلني يكلي ولج تعالي مرغيلي لو نزعيني
ماادري شكثر ح اصبر عليه
أبويه واخواني مشغولين بالزرع ويبيعون المحصول بالسوك للتجار وتقريبا حياتنا طبيعيه لحد ما خلص هشام امتحانات الوزاريه الثالث متوسط بدت الامور تتأزم بسبب أبويه اللي فرض على هشام يروح يتتدرب بالمعسكر سواها علينا لغوة وبده كل ما يشوفنه يكول الجيش يطلع قلبه ويعلمه يصير رجال وهشام يتخبل يكول لعد اني شنو مرة !!
عمي محمود ماله دور نهائيا ولا أعترض
وخصوصا بعد فشلته من هشام لأنه ماصار كدها بالزواج
عمتي هدى ظلت تبجي وتكول خاف يستشهد مثل عمامه وكوه قنعت لان صادفت بال 89 خلصت الحرب والوضع مستقر والعراق منتعش وأمان
وفعلا راح هشام للمعسكر يتدرب كم شهر وياخذوا ويه دفعته لوحده عسكريه ممعروف وين بالظبط
كم شهر حسيت بيهم بشوق لهشام رغم ماجان مامقربني هالكد ومرات يضوجني منه بس اسمه رجلي وابن عمي وماعدي غيرة بعد انحسم مصيري وياه
يرجع من التدريب مكسر جسمه وتعبان واني دوري امرغ واداري واغسل هدومه واسويله اكل يأخذه وياه واكيد مغصوب جان وضايج من أبويه وميكدر يعارض بعد حكم الكبار وواجب نطيعهم
جنت أحس بي واحاول اخفف عليه بكد مااكدر وهو مافكر حتى يبوسني ويتقرب مني كأنما يعاقبني وينتقم مني برفضه اللي اذا يريد يحن عليه يشبكني على صدرة يخليني وينام
بهالايام من اطلع للبستان جان موسم الجمري يعني التمر ببدايته يصعدون اخواني وكرم يشدون كواني جوة العثك (التمر اللي بالنخل )
بديت اشوف اهتمام خاص من كرم يهتم بيه ويعاينلي بنظرة مختلفه عن قبل احاول مابين واتصرف عادي بس بداخلي أحس بي
هشام بعيد عني وحتى من يجي ميهتم بيه واني مبهذله شعري ودشداشه عاديه والبس جواها بجامه حتى اعاونهم بالشغل ولا احف ولا اتمكيج بس باجازته من يرجع ابدل واخلي كحل وانتظره بشوق ولهفه افرح من اشوفه وانتظره من الاجازة للأجازة ومن يروح ابقى أشم بهدومه واشتاق حتى لزمخاته عليه
بس هو مثل ماهو باقي كالعادة ماكو تغيير منه حتى أمي ملت بعد ما سألتني والكل جان يعرفون هشام ما كمل زواجه مني
...
بتبع
أنت تقرأ
#قصة رمانة
Aktuelle Literaturطفله صغيره تتزوج وهيه في عمر ال12 من قبل ابن عمهه وهل يا ترئ ينجح الزواج ان كانت الزوجه والزوج في مرحله المراهقه 💔 تابعووو
