#قصة رمانة

بآرت 13

#قصه رمانه@/جزء13
..
رتبت نفسي الصبح وطلعت ملهوفه شفته مثل كل يوم وجانت البسمه ماليه وجهه المشرق احس برجولته واهتمامه بيه يجذبني اله ..
كملت الدوام الساعات تمشي ببطء
حاولت اخلص من وكت طلعت لكيته منتظرني ورحنا لمطعم شكد حبيت الموضوع فعلا إحساس حلو ما عشته
من يسحب الكرسي واكعد وبعدين يكعد يمي طلبلي اكل وبدينا نسولف حسيته منطلق كلش وكل شويه يعاين بعيوني
تمنيت بلحظه لو تعرفت عليه من زمان
مشى الوقت بسرعه
شكد حسيت بأمان وياه وعاملني بلطف واحترام وتقدير عجبني كلش
كلي .. راميه انطيني رقم تلفونكم اخابرج
سيف ماعدنه تلفون بالبيت
شنو ..!
معقوله !
طلع ورقه وقلم كلي انطيني عنوان بيتكم بسرعه
ترددت انطي العنوان بس ظل يلح
شبيج راميه اطلع شفت عمال يشدولكم تلفون ارضي بالبيت
ماادري شرد
انطيته العنوان وطلعنه رجعني للبيت
ماببالي شي بعد اللي صار بيننا دخلت لغرفتي والكل مشغول شكد حسيت بمشاعر وفد اشياء اول مرة احس بيها
ثاني يوم رحت للدوام دوامي مستمر بس يوم الجمعه عطله ومثل كل يوم اشوفه لسيف ويصير بيننا سلام وكلام ونظرات اعجاب يمكن هو اكثر مني لأن احس بنفسي متحفظه وخجلانه عكسه
مرت الايام على هالحال تفاجأت بيوم رجعت من الدوام لكيت اهلي فرحانين تلكني نسوان اخواني واخوتي من الباب يكولون اجو جماعه شدوا تليفون وكالوا انتظروا كم ساعه وتجي الحرارة بي جان باعتقادهم اني اللي دزيت العمال
إني هم مثلهم تفاجأت انتظرت بلهفه اروح للدوام ثاني يوم وأسأل سيف
شفت إخواني فرحانين يكولون راح يصير شغلنه كله بالاتصال ويه المزارعين والتجار ويسهل علينا الشغل وحفظوا الرقم حتى ينطوا لجماعتهم
ثاني يوم تحمست اشوفه لسيف بس مالكيته منتظرني مثل كل يوم
انتظرت فرصه من الدوام ورحت سالت عنه بغرفته
لكيته ديشتغل شافني دخلت الغرفه كام رحب بيه
الموظفين اللي يمه انتبهوا خجلت سويت نفسي أسأله عن عمال الصيانه
طلع وياي لبرة شافني ارتبكت لزم ايدي سحبتها
اسف راميه ..
شنو ردتيني بشغله !
هاا .. اي .. لا بس ..
عيونه تبرق وعاين لحلكي
بلعت ريكي كتله شكد اجور التلفون اللي شديته البارحه ؟
لا ... هذا من الدائرة اعتبري لان نحتاج نتصل بيج
طلع من جيبه ورقه بيها ارقام
هاي محضرها الج وهذا رقمي بالبيت اتصلي من تفرغين غمزلي وراح
اخذت الورقه وخفت مااعرف شكول لأهلي واني مو وحدي الكل موجود بالبيت وخاصه نسوان اخواني ميطلعن
المهم بقيت محتارة
رجعت للبيت وضميت الورقه وتصرفت عادي مثل كل يوم مكدرت اتصل خفت ..
مرت الايام وبيوم شفت سيف منتظرني من طلعت من الدوام جان كلش ضايج ومقهور طلب يوصلني صعدت بسيارته واخذني لمكان غريب
هاي شنو سيف وين ماخذني !
وكف السياره وصرخ ببوجهي نززني
انتي شنو حجر ليش متحسين بيه
العفو سيف شبيك ماافتهم على شنو تقصد !
لا ... تفتهمين ..
اني انطيتج رقمي هنا بالدائرة وبالبيت ليش مااتصلتي !
اذا على الاتصال تقصد مكدرت لأن مو وحدي بالبيت عايشه شكول منو هذا وعلى شنو اخابرك !
تحسر بألم
ماشي يبت الناس رجع بسيارته ورجعني لمنطقتنه وراح
نزلت وحسيت بي ضاج ماادري شبي وليش هيج يتصرف بس أعتقد رادني ابادله المشاعر واخابرة واسولف وياه
بس شدعوه مكبر للموضوع هالكد ! ومشت الايام ..
وبيوم رجعت للبيت لكيت نسوان اثنين غريبات سلمت عليهم صاحوني وبقوا يبوسون كأنما يعرفوني من زمان وفرحانيين بيه كلش شفت نسوان اخواني لونهم مخطوف وامي وجهها اصفر وعمتي هدى بالدوام جانت ماافتهمت شي بالبداية
بعدين ترخصت ودخلت لغرفتي
لحكتني مرت احمد واختها مرت سجاد يملخن بخدودهن ويكولن رمانه ذولي النسوان خطابه عليج ...
...
يتبع ...