#قصه رمانه@جزء14
..
آخر شئ توقعته احد يجي يخطبني واني بعد هالسنين بعدني على ذمه هشام ومافكرت انفصل عنه شرعا وبعد اختفاءهم منعرف شي عنهم عدلين لو ميتين واني ولا ببالي اتزوج اصلا
توجهلتي نظرات قاسيه والف سؤال من الكل اجتمع بينه عمي محمود بالديوان وطلب رائيي بالموضوع بعد ماافتهم الكل بالسالفه
أمي ماجان الها دور ولا رأي كل اللي يكوله الزلم مطاع
اللي جان متعارف ميخطبني غريب لازم من العائلة
ماعرفت شلون ارد عليهم بقيت ساكته وسلمت أمري الهم
سألني عمي كتله بكيفكم ودنكت ..
اتفقوا اني اكمل هالسنه عمري 17 جان وعلى السن القانونية اقرر بقضيه الانفصال عن هشام والزواج مرة ثانية
دخلت لغرفتي وخفت
حسيت بفراغ بداخلي اكو شئ يمنعني من التفكير بغير رجال
شغلني تصرف سيف ماانطاني خبر ولاتوقعت هيج نيته وياي بقيت احسب الساعات لباجر اشوفه وافتهم منه
أمي بليل اجت يمي بالغرفه وبقت تحجيلي عن أبوي وذكرياتها كلش جانت تحبه لابويه وبعد موته حسيتها نكسرت
افتهمت من تلميحها اني ابقى على هشام حتى لو مات ومافرط بنفسي واتزوج
صدك حسيت بمهانه وكأنني بعدني تحت رحمتهم وماعدي قرار مارديت عليها وسكتت مااعرف أرد بشنو !
الصبح رحت للدوام وقبل كلشي رحت لغرفه سيف شفته دا يرتب اوراق بدولاب وكفت يمه ارتبك وعاينلي بخجل
سيف ..ممكن نحجي !
عن شنو !
سوة نفسه مامهتم
لزمت ايده عاينلي صفح
سيف لازم نحجي أنتظرك بعد الدوام بسيارتك
درت وجهي وطلعت بس دكات قلبي عشرات عشرات من الموقف يمكن تجرأت بس لازم يعرف كلشي عني ويقرر اذا كان بعده يريد يخطبني لو لا
طلعت نهايه الدوام لكيته منتظرني دخلت السياره حرك وطلع يمشي بطئ وماحجه ولا كلمه
سيف ممكن نروح مكان خاص
هز برأسه ..
طلعنه لبيتهم وكف السياره تفضلي ست راميه هذا مكان خاص انزلي وجوة نحجي
استغربت ..
سيف من كل عقلك جايبني لهنا واهلك !
لعد وين تريدين اخذج !
ماكو مشكله الكل يعرف ولا مادزيت اختي وامي وفشلتيهم انتي واهلج وامج تكول ماعدنه نسوان للزواج
سيف ارجوك ممكن تسمعني
شفته يتأفف ومعاجبه الوضع
سيف اذا مالك خلك رجعني هاي هيه خلص ماعدي شئ اكوله
لزم ايدي حيل
انتي شنو ماعدج إحساس !
اني دزيت امي واختي يخطبوج مثل الاودام شنو ردج !
جريت ايدي منه وجعني وصرخت
سيف اني متزوجه
رجع لورة واندهش
شنوووو !!!
تتشاقين !!
لا ليش اتشاقه
اني متزوجه واهلي انصدموا من جيت امك واختك والمفروض تنطيني خبر مو تفاجأني مثل مافاجأتني قبل كم يوم بسالفه التلفون
توتر كلش .. بقى يبلعم ووجهه اصفر صار
حرك السيارة وساق سريع
سيف هدي بالسياقه ح تموتنه هيج
اسمعني خليني اكمل
هه .. شتكملين بعد طلعتيني زوج معدل
اني ماوعدتك بشي انته دخلت بدون استئذان
لابالله ! شلون يعني تريدين استأذن ؟
سيف اني متزوجه وزوجي انفقد بحرب الكويت قبل ثلاث سنوات
من كلت هيج شحط بالسيارة ووكف
بقى ينافت
عاين ببوجهي بدهشه ..
اي سيف زوجي ابن عمي مفقود وماعرف اذا كان عدل ولاميت
ليش مكلتي من قبل ؟
ما حجيتي من البداية !!
المن اكول يعني .. ماحب احجي بخصوصياتي
وبعدين انته فاجأتني متوقعت عدك رغبه بالزواج مني
راميه اني حبيتج .. اريدج زوجه وام لاطفالي
من كال هيج تحركت عدي مشاعر غريبه لان امنيتي يصير عدي اطفال وهشام ماانطاني حقي كزوجه وام
رجفت لزم ايدي شبيج راميه !
هاا ..
لا ماكو شئ ..
جر ايدي وباسها وعيونه تبرق
توترت اكثر
سيف رجعني للبيت ارجوك
ضحك ..
ماشي ارجعج بس بشرط
تخابريني انتظرج
اريد تحجيلي التفاصيل حتى اساعدج
ماوعدك ..
ليش !
يعني التلفون بالديوان ويكون الكل مجتمع هناك
اذا هيج اجيبلج تلفون بغرفتج
سيف بمرور الأيام تعرف كلشي رجعني هسه
ماشي راميه عندي استعداد انتظرج ..
بقى سيف متأمل بيه أكثر من قبل ومن رجعني كلي انتظر منج اتصال
بقيت محتارة بأمره
رجعت تغديت وحجيت ويه امي
يوم الولد رايدني كزوجه وماغير رأيه من عرف بيه متزوجه وعلى ذمه رجال مفقود
شفتها ضاجت قرارج مو بيدج ولازم متنطين مجال لا اله ولا غيرة
يوم انتي ليش هيج الله يخليج
يجوز الدنيا انطتني فرصه واحس بانوثتي وياه ويصير عدي اطفال منه ..
بيومها امي جانت معانده كلش ومقنعت عكس عمتي هدى اللي جانت متساهله وبالعكس شجعتني وطلبت مني اشوف مستقبلي
استمرت علاقتي بسيف عشت وياه احلى ايام يسمعني كلام حلو ويعاملني باحترام وعطف
احسه يحبني من صدك ويهتم بيه وحجيتله مختصر عن حياتي ووعدني يكلف محامي ويساعدني بالقضيه
بقيت خايفه من رفض أمي واخواني للموضوع
أنت تقرأ
#قصة رمانة
General Fictionطفله صغيره تتزوج وهيه في عمر ال12 من قبل ابن عمهه وهل يا ترئ ينجح الزواج ان كانت الزوجه والزوج في مرحله المراهقه 💔 تابعووو
