...الجزء التاسع
من الصبح انكلبت الدنيا بالبيت عمتي هدى كالت لابويه وعمي محمود وهدوا على هشام يحققون وياه
طلع هشام بالدشداشه زعلان وأبويه وعمي بقوا بالديوان كاعدين يلوجون واخواني يهدئون بيهم من دخلت يمهم عرفت متلاغين ومتعاركين كلهم ويه هشام
دخلنه كلنا للديوان أبوي صاحني خفت اجيت بست ايده وكعدت كباله
بويه راح تتطلكين من هشام وورة العدة نعقدلج على كرم
كمزت شنو !!
خنزر عليه اشرلي اسكت .. فشلني
شفت كرم كاعد نافش روحه وفرحان
وكأنني مالي رأي وماعندي قرار ولا من حقي اعترض
عاينت امي وجهها ينطي الوان وعمتي هدى متفشله ودنكت
اما اخواني مالهم دور نهائيا القرار الاول والاخير لابويه
مارديت على أبوي وكمت رجعت لغرفتي تلفلفت بالبطانيه وبقيت افكر شلون هسه شسوي احتاريت اللي صار بيني اني وهشام حلو وماعدي رغبه بغيره ولامستعده اخارب الخوان واسوي تفرقه بينهم
للعصر اجت مرت أحمد جابتلي أكل توسلت بيه كوة حطيت لكمه بحلكي مالي نفس سألتها كالت ماكو شئ بس يمكن هشام رايح لمضيف جيراننه ال بو صالح ودازين على ابوج وعمج رايحين وليهسه مجايين
ظل بالي وخفت من اللي ح يصير بعدين هسه هشام لو باقي بلا روحه للجيش جنت قانعه بي ساعه السوده من راح
دخلت عمتي هدى كالت عمه كومي لمي هدوم هشام يريد يرجع لوحدته ببغداد
كمت لميتهم بجنطه وهويته وغراضه
رادت تطلع عمتي لزمت ايدها
عمه بروح عزازج جاوبيني هشام متزوج عليه ببغداد !
ارتبكت وجرت نفس
عمه ترة هشام يحبج حاجي كدام العالم كلها وكايل ماطلك رمانه على جثتي ومتصير لغيري
يمكن فرحت بحجايتها بس جنت خايفه من سالفه المرة اللي جان و ياهه
عمه اني هم اريده وماريد لاكرم ولاغير كرم شفتها فرحت
مرت أحمد كامت خذت الاكل وطلعت
لزمتني عمتي وكالت بهمس رمانه هاي السوالف متعلمها من شكم واحد هتلي ماخذي لنسوان كاوليه ومكضي وكت اني اعرف شلون اجر اذانه وماخلي يكررها بس انتي داري يعمه خطيه راح يرجع لوحدته وماشفناه ولاكعدنه وياه تلكيناه بالصراخ والعياط لايروح يهج وبعد ميرجع
ماشي عمه يصير خير
طلعت عمتي وشويه امنت رغم ما انقهرت من سالفه النسوان الكاوليه تألمت بس ما اكدر اسوي شي محسوب عليه رجلي وماعدي حل بديل
كرم يحومي ومافات حالي وبده يلومني وكل مايشوفني يخزرني ويذب حجي
كلي بي حظ يرجعج للمدرسة مو بس شاطر مكمش بيج بالخالي بلاش
تجنبت ارد عليه بس بقت ببالي اطلب منه هالطلب
ظليت محتارة ورايحه راده بليل بباب البيت رغم كل اللي صار قلبي نغزني وتعذبت بفراكه
دخل أبوي وعمي تلكيتهم وسألت عن هشام وعيني وراهم
أبوي كلي بويه الفجر يطلع لبغداد ودخلو جوة
تلفلفت بشال ركضت لباقر بعده بالباب
اشرتله ..
ها خويه شبيج
همست باقر وديني لهشام
شنو ولج تخبلتي !
الزلم متخاربين علمودج وانتي ..
اششش ماريد اسمع وديني لو اروح وحدي
هز بيده هلا يالله دمشي خلي عباه براسج وامشي امري لله
ركضت سحلت عباة معلكه وطلعت وياه لبيت ال بو صالح جيراننه وعلاقتنه بيهم كلش طيبه
دك الباب باقر وكفت وراه كلي لفي روحج تلفلفت ودنكت
طلع ولد من ولدهم رحب بينه ودخل شوي وطلع هشام
باقر كله هاك استلم مرتك اني هنا بسرعه شوي لاتكلبون السالفه عليه
هشام استغرب من جيتي جرني من زندي ولج انتي شنو شكد جسرة
اااي هشام مو زين من جيت اراضيك
جر نفس وعض اصبعه اااخ لو بغرفتنه اكطعج دفعني وزمخ امشي امشي رجعي
صدك انهضمت شهكت بحسرة وردت اروح جر عباتي اوكفي دا احجي وياج
نزلت دموعي
أستغفر الله سكتي يالله امشي كدامي جاي وراج مسحت دموعي وهزيت براسي صار أمرك
شكد فرحت ركضت لزمت ايد باقر بقه متعجب بووووويه ولج أبوي وعمي ماراضوا صدك المرة تهز شوارب
ضحكت وضربته حباب باقر اخجل والله
بقه يضحك وحجالي اللي صار
عرفت منه أبوي وعمي متوسليله يرجع ماقبل وكلهم راجع للوحده ببغداد باجر
رجعت ركض لغرفتنه رتبتها ورشيت عطر وبدلت اسمع صوته قريب اخذت نفس وارتبكت دخل ركضت شبكته شالني وباسني حسيت بمشاعر تجاهه
ليش هيج رمانه ؟
لج أني هشام ..
كافي عتب هشام اريدك تكمل الاجازة وماتروح
نزلني وكعد عل الجربايه
وبعد شتريدين !
اريدك هشام شنو بعد شتريدين !
اشرلي تعالي
كعدت يمه خله راسي على صدره
رمانه تريدين اعوفج !
شلت راسي وعيني بعينه
انته تريد !
صاح بصوت عالي .. طبعا لا
ماشي مدام تريدني ومتمسك بيه اني هم اريدك واتمسك بيك شوكت ماتعوفني اعوفك
ابتسم وعد رمانتي !
اي وعد بس انته هم توعدني تخليني عزيزة مو تذلني وكل شويه تضربني لو هالسالفه بشرفك جايني بهيج منظر
اهووو سكتي يالله رجعنه مو منخلص لامنج ولامن اللي برة
عافني كام بدل لحكته هشام ماحاسبك بعد انته مو زغير
بس ..
كافي اريد ارتاح اليوم الكل مسوي هجوم عليه
هشام اريد أرجع للمدرسة
هالسنه ستوهة بدت بلكي يحقلي اكمل
سكت ومارد
هشام موافق لو لا
ماشي رجعي بس ابوج انتي تقنعي وديري بالج ع نفسج
غطى راسه ونام حسيت بفرحه على الاقل افتخر كدام كرم اللي تحداني
تمددت يمه وغفيت للصبح بعده نايم طلعت حضرت الريوك الكل يرحون من وكت للمدارس
دا ارجع للغرفه شفت كرم بباب المطبخ
أنت تقرأ
#قصة رمانة
Aktuelle Literaturطفله صغيره تتزوج وهيه في عمر ال12 من قبل ابن عمهه وهل يا ترئ ينجح الزواج ان كانت الزوجه والزوج في مرحله المراهقه 💔 تابعووو
