السر القديم

3-6

#السر_القديم٣
شهد السلمان

يعرف اللي احبة واللي اكرهة
يعرف الواني اللي افضلها و الموديلات
احجي ويا نفسي واني اباوع بالمراية على فستاني الاحمر بعد ما لبستة
رتوش بسيطة واكمل مكياجي واعدل شعري حتى اكون جاهزة لسهرة محضرها ليث
كملت وطلعت من الغرفة بعدما دزلي رسالة حتى اطلع
شفت ظلمة داير مدايري بس ضوة الشموع الخفيف تبعت اثرة وصولا للصالة
مليانة بورد احمر و شمع و نشرة بسيطة تشبه النجوم من تلمع بالسما
تغزل بية وبجمال الفستان علية بعدها طبع بوسة على ايدي ومشينا باتجاه الميز مخلي بالوسط كيكة عليها اسمي واسمة بلون ابيض واحمر
ومثل كل مرة اناقتة وهو لابس البدلة السودة طاغية على كل شي
كعد مقابيلي ويباوعلي والابتسامة متفارك وجهة
- كل عام وانت مرتي وحبيبتي وبنتي وكل شي الي
- وانت بالف خير ليوثي
- طبعا اني ما امل من هالسؤال بكل سنة
مرتاحة وياية ؟
- وجوابي نفسة الك ميتغير مرتاحة الحمدلله الله يخليك ويديمك
- دقيقة
مشى متوجه على الستيريو الصغير جان رابطة بتلفونة وشغل اغنية اجنبية موسيقى هادية كلش و سحب وردة حمرة قدمها الي وطلب مني اركص وياه
حوط خصري بيدة وتركت ايدية تستند على جتفة وايدة الثانية
حبيت بهاي اللحظة انسى العالم وانسى كل شي واعيش دقايق بغير جو كأنما مشهد من فلم رومانسي من بطولتة هو عيوني بعيونة تلمع وتنطق بكل الحب اللي بداخلة ولمسة ايدة دافية قربي منة يحسسني بأمان
انتهت الاغنية ببوسة على راسي وحضن منة و رجعنا كملنا احتفال
طفينا الشموع و قطعنا الكيك ومثل كل مرة استرسل ليث بسوالفة واني مستمعة جيدة الة وتفرجنا على صور عرسنا و فيديوات
جانت ليلة تختلف عن بقية السنين و يمكن لان تركت نفسي شوي حتى تعيش جو الحب ...

فتحت عيوني الصبح شفت وردة حمرة على الفراش وورقة مكتوب بيها
" صباح الورد على احلى وردة محبيت اكعدج اني بالشغل "
طويت الورقة و كمت حتى اشتغل بالبيت واحضر الغدا
صار الظهر و رجع ليث جان فرحان كلش و كانما سامع احلى خبر بالدنيا
حطيت اخر ماعون ع السفرة و هو صاحني
- دتعالي عاد دنحجي
- خير يا رب
- كل خير حبيبتي اكعدي
- اي كول
- اليوم ابوية كالي خبر كلش حلو
- يا الله
- جايين خطابة ليقين الاسبوع اليجي وحسب كلامة انه هم خوش ناس
- يا الله صدك حلو هالخبر ،يعني يقين تعرفة ؟
- طبعا لا يقين مو مال هيج سوالف بس حسب ما افتهمت من ابوية هو شايفها بعرس صديقتها وامة طالبتها
- اها الله يسعدها يا رب تستاهل يقين
- ان شاء الله يكون ابن اوادم
- ان شاء الله

سكتت لكن حجاية ليث بقت ببالي ( يقين مو مال هيج سوالف وجزمها بطبعا لا )
شيقصد بيها ؟ و ليش تغيرت نبرة صوتة من كتلة تعرفة ياترى هالشي غلط ؟ او يعتبرة عيب ؟
- ليث اسالك سوال ؟
- اي كولي حبيبي
- شنو رأيك بالحب قبل الزواج ؟
- اممم حسب ما اشوف فاشل
- زين انت مو حبيتني يالا تزوجتني !
- لا انت تقصدين علاقة قبل الزواج واني حبيتج صح بس مباشرة دزيت اهلي ما انتظرت وعلقتج وعلقت نفسي بيج يالا صارت خطبتنا تفرق هواية
- يعني غلط لو جنا بعلاقة وبعدها تزوجنا ؟
- شوفي تمارا حبيبتي هو مو غلط بس مو كل علاقة حب تنتهي بزواج واذا انتهت بزواج مو شرط يكون ناجح بعدين اكو هواية ناس استغلالية وخاصة الولد شفت وعاشرت اشكال والوان متسوى انه بنية تنطي كل مشاعرها و تعيش بقصر وهم هو بناه الها ووعود واحلام بس النهاية شنو ؟؟
حيتزوج على اختيار اهلة وميشوف اللي حبتة وعاش وياها ايام حلوة؛
طبعا اكيد اكو استثناءات واكو من يحبون فعلا يتزوجون ويعيشون حياة حلوة كلش بس الغالب هسة و بهذا وكتنا العلاقات مجرد تكضية وقت مو اكثر
- صحيح
- جنتي حابة نكون بعلاقة قبل لا نتزوج ؟
- لا جنت احب لو اعرفك من زمان
- هههههه حبيبتي انت
تروحين لاهلي؟
- اي اوكي خلي ابدل
- يلة لعد
- باوعي اكو ظرف جبير ذكريني ناخذة هذا مال ابوية
- اللي على الطبلة ؟
- اي ليش اكو غيرة ؟
- اي بالغرفة هم اكو واحد مثلة
- تمام لعد اخذهم اثنينهم الظاهر ناسي
- اوكي
- تمارا
- نعم
- احبج هواية
ابتسامة رضا عن كلمتة بدون ما ارد الكلمة او ابادلة ..