السر القديم

11-16

القصة جديدة جنت حابة تاخذ تصويت اعلى وتفاعل اكثر فحاليا  حنشر وان شفت قلة تفاعل اوقفها

#السر_القديم١١
شهد السلمان

كل مرة يجمعنا لقاء بيني وبين عمر احس بالاشمئزاز منة خاصة لمن اشوفة قريب من يقين وهي تعاملة بكل طيب وحب وافتهمت منها انه هي حبتة كلش ودتحس ويا مشاعر غير شكل واول مرة تحسها مع انه حاولت بكل الطرق انبهها بس تلبية لرغبة ليث سكتت وكمت ما اتدخل بينهم حتى من تحجيلي اسكت وما اعلق على شي

اما بالنسبة لسهر صارت تتعمد تجي وكت اللي احنا كلنا بالبيت او بالاحرى ليث يكون موجود وحجتها انه تحب يقين وتريد تكعد وياها بحكم هي ارملة وصعب تطب وتطلع من حجي الناس وما عدها صديقات وحتى الي مصادقتني بس ممرتاحتلها ابد
تحاول تتقرب مني بكل الطرق لحد ما فد يوم حرجتني وطلبت مني رقمي مكدرت ارفض وكل مرة اتهرب منها
من رجعنا البيت بالليل اجتني رسالة منها و جنت اجاوبها
" هلو حياتي شلونج "
" هلو عيني الحمدلله وانت "
" الحمدلله ماشية ردت اسالج على لون شعرج وملحكت "
" والله اني بالصالون سويتة وهي خبطتلي بس كتلها اريدة بني شوكلاتة فاتح وكالتلي حسويلج خبطة "
" ها زين هاي يا صالون حتى اروحلها كلش حلو شغلها "
" شايفة اسواق اركان اللي براس الشارع ؟ "
" اي اللي يمة ابو مخضر "
" بالضبط بالفرع اكو صالون النور هو هذا والبنية اسمها شيماء"
" ها زين قريب لعد ، اكدر اخذج وياية ؟"
" والله ما اعرف اشوف ليث شيكول "
" ميكول شي خاصة اذا عرف رايحة وياية "
" شمعنى يعني ؟!"
" غير حمات اختة ويداريني هههههه "
" ها هههههه اي اسالة واردلج خبر "
" خوش حجي "
" تحتاجين شي بعد  ؟"
" سلامتج تصبحين على خير "
" وانت من اهلة الله وياج "

نار جواية شبت خاصة من كالت اذا درى بية ميكول لا مصرة تحسسني بينهم شي برغم اعرف هي دتخبث بس دتشتعل بكلبي نيران غيرة  واخاف ..
اول مرة اغار على ليث هيج صحيح امرة يهمني واني تعودت علي بس ما اعرف ليش اغار احس هالشي بس بين اليحبون يصير واني وليث علاقتنا تقليدية وعادية ممكن هو يغار علية ويسوي مشاكل بس اني مستحيل ..

يمكن كمت احبة او حسيت مالي احد غيرة فعلا يمكن التعود اقوى من الحب وافعالة تخليني اتمسك بي اكثر واكثر
كل اللي اريدة استقرار ومن يوم رجعة عمر للساحة واني احس نفسي مهزوزة
كطع صوت ليث حبل افكاري وكل هواجسي حجيتلة عن سهر واللي طلبتة وكالي عادي روحي وياها ترة هي لان محبوسة بالبيت وبركبتها جهال هيج تسوي تريد تلفت انتباه اي احد حسيتة متعاطف وياها وهذا الشي اللي ضوجني اكثر و اكثر
بس محجيت ولا علقت  رجعت دزيتلها رسالة حتى اذا ما عدها شي باجر نروح وناخذ يقين كالتلي يقين طالعة ويا عمر باجر ونروح وحدنا سديت التلفون ونمت ..

بالصالون جان الوضع شبيه بالقنبلة الموقوتة اسئلة سهر تجاوزت كل الحدود وكل الميانة ومشكلتي ما اعرف ارد بسرعة او ما يحضرني جواب بنفس اللحظة بعدما راحت اتفقت على السعر ويا ام الصالون رجعت كعدت يمي لان اكو ازدحام وتستلمها بعد ٣ بنات
رجعت كعدت يمي وتسولف تطلع مواضيع من جوة الكاع برغم اني ملهية نفسي بالتلفون ودا اكلب بي عشوائي المهم ما يكون بيناتنا حديث
- توتة
- نعم
- منو اختارلج لون شعرج
- اني شفتة بالنت وعجبني حسيتة ميذبل الوجه
- اي صحيح هسة انت محاطة مكياج وكلش كاعدلج اني عبالي ليث اختارة الج
- لا ليث مالة علاقة
- اها شعجب اني المرحوم جان هواية يحب الاشقر وكل ما ينزل الصبغ يكلي روحي جددي
- بعد كل رجال يختلف
- اي بس همين الرجال يعلق يعني يكول حلو او محلو خاف ممهتم من النوع البارد ههههههه
- لا هو يعلق بس عادي يعني مثلا هو يحب الميش بس اني اشوفة يتعب الشعر فاصبغ شي بسيط كل فترة
- اكيد يحب الاحمر
- شمدريج !؟
- مو ليث شوية حار
- حار شنو !!!؟؟؟
- يعني اقصد منطلق وعندة طاقة فيحب هيج الوان
- اي يجوز
- اني هم احب الاحمر كلش حلو ويجوز اسوي عشبة على كولتج الصبغ ياذي الشعر
- اوكي على راحتج
- امممم ولو سؤال شخصي بس عندي فضول اعرف
- انت شمخلصة ؟
- مخلصة اداب عربي هههههه وين الشخصي بالموضوع !
- لا هو مو هذا بس يعني ما حبيتي قبل اقصد ايام الكلية ؟
- لا
- ادري ضايقتج مو قصدي
- لا عادي بالعكس
- هو حب الكليات ترة مينجح لان بعدهم صغار ومو متوازنين واصلا بس لعب بلعب
- ما اعرف يجوز ممجربة
- اي يلا بعد انت عندج ليث يسواهم
- تسلمين
- خلي بس اكللها لام الصالون غيرت رأيي علمود الصبغ
- بس سهر منو يكول يلوكلج الاحمر اشوف البني احلالج
- لا حيلوكلي اكيد لان تغيير عن العادي مليت من الاشقر والبنيات
- يلا على راحتج