وضحه ما قدرت ترقد تفكر بهزاع ومنو الي مسيفنها قلبي
وضحه فخاطرها: هووو من امبونه جذيه يغازل ولا والحين يرمس وحدة ويحبها انا لازم اسوي شراته شرات ما يكلم وحدة انا بعد بكلم واحد ما كون وضحه ان ما خليته يندم
اليوم الثاني وضحه تمت تفكر : كيف اتعرف على واحد امممممم خلاص لقيتها ماشي غيره من الجات
اليوم الثاني دخلت غرفة الكمبيوتر وقفلت الباب ودشت الجات واتعرفت على واحد نكه مزيون العين وضافته عندها ع المسن وعقب خذت رقمه هو اسمه خالد بس سيفته خلود عشان محد يشك ويتحرونها بنيه ومرن ايام وهي ترمسه ع التلفون وع المسن وعادي عند قوم فطامي حتى عند هزاع تتخيلون !!!!!! بس ع اساس انه بنيه
وضحه كانت في الصاله ترمسه
فطامي: وضوووح منو ترمسين
وضحه: ربيعتيه خلود
فطامي: هذي الحين وايد وياج عطينيه ارمسها ابا اتعرف عليها
وضحه ارتبكت : لالالا شو تتعرفين عليها هي يالله يالله تعرفت عليه ما تحب تتعرف
فطامي: صدق حشى وين عايشه هذي فكوخ يوم ما تحب تتعرف ع حد برايها جيه ما لقيت غيرها
في شهر 4 اخر شهر ثناويه عامه انهم يداومون
في العين وبالتحديد في مدرسه الريم
مريوم:شو رايكم نروح عند الاخصائيه ونقولها نبا نروح رحله دبي
الريم: هيه والله يبالنا سيره شرات العام
شميم:انا اميه ما بتخلينيه اروح دبي ( شميم ابوها متوفي وعايشه مع امها واخوانها بس)
الريم:فديت امج يوم برمسها بطيع
شميم:هيه صح عاد هي ميته فيج ودوم تقول لو عنديه ولد عود جان خطبت الريم حقه
الريم:والله فديتها منو ما يبا تكون عمته شرات امج
مريوم:وين كنا ووين صرنا يالله نروح نزقر الشله ونروح عند الاخصائبه
وتيمعن كل الشله وروحوا عند الاخصائيه (الشله هذي دوم عند الاخصائيه من كثر ما يسون ضرابه ويشردن من الحصص)
الاخصائيه:ها بعد شو فيكن مع منو مضاربات؟
كلهن ظحكن :لا لا ما ضاربنا اليوم
مريوم : ما باقي الا كم يوم لازم نسوي صلح ويا الابلات
الاخصائية: زين والله عيل شو تبن؟
الريم: ابله نحن نبا نرووح رحله دبي عشان نذكر بعضنا وتكون لنا ذاكرة طيبه عن مدرستكم
الاخصائية: انزين مع منو تبون ترووحوون ادبي والا ويا علمي
شميم: لالا علمي ما نبا ادبي ( المعرووف ان بنات علمي ما يحبن بنات ادبي والعكس صحيح)
الاخصائية: عيل خلاص علمي 1 بيروحوون وياكم بس خلوني ارمس الوزارة قبل ... انزين وين تبون تسيروون؟
شميم: موول الامارات يمدحونه
الاخصائية : لا لازم قبل مكان علمي تسيروون يعني متحف شي جي
الريم: خلاص اوكي متحف دبي
الاخصائية: خلاص ان شاء الله انا برمس الوزارة وبرد لكم خبر
وعقب اسبوع الاخصائية راحت صفهم وقالت الهم ان يوم الاربعاء رحلتهم مع صف ثالث علمي 1
شميم : الريم وعد الحر دين لا تنسين انتي قلتي بترمسين اميه
الريم: اكييييييد فديتج من عيونيه بعد لو تبين ارمس اخوج الي في الاعداديه برمسه
شميم: لا يهالواا شونباهم بس اميه
الريم ومريوم وشميم ساروا عند الاخصائيه وهن ظاهرات شافن سلوم
سلوم توها يايه: هلا والله شو بعد مع منو متمشكليين افاا خيانه وليش ما زقرتونيه
مريووم: وين تبين شو تتحرين مصارعه
سلوم: اشوفكن ظاهرات من عند الاخصائية ومستانسات قلت اكيد اضاربتن مع حد
الريم: من متى اذا حد اضارب مع حد يستانس الا جان انتي
سلووم: تدرين عاد الريم والله من يومين هب مضاربه فخاطريه قبل لا تخلص المدرسه
الريم: عيل مريووم تقول نسوي صلح ونتي تبين تضاربين
سلووم: امحق صلح جان مع الابلات من زينهن مالت عليهن الهرمات
شميم: الله يعين الابله الي بطيح بين يدينج
الريم: اسميهن ما بيعينن خير يوم بيضاربن ويا سلوم
حمودة يايه صوبهن: هااا شو تسون مع أي ابله اضاربتن بعد لايكون النحسه بدريووه ( ابلة احيااء)
سلوم: عاد هذي امرة فخاطريه لازم اخر يوم ضاربها ابرد خاطريه ما عليه ما كون سلوم بنت سلوم (سالم) ان ما ضاربتها
الريم: والله انتي بسوينها حشى لا بويه بس نحن كنا عند الاخصائية عشان رحلة دبي
حمودة: أي رحلة بعد
مريوم: احم احم بس نحن بنات علمي
حمودة: لا والله ع راسكم ريشة الحين بروح عند الاخصائية
شميم: سيري خلاص تحددت الرحلة يعني ماشي فايده تسيروون ويانا
سلوم: صدق بنسير الرحله عيل من اليوم بشتغل تقردين بالعيوز جادها تطيع ( سلوم كل اهلها في بوظبي بس هي عايشة هنيه في العين مع يدتها )
الريم: فديت عيووزج انا لا بطيع ولا يهمج بس عليج شوي تقردنينها عاد هي امرة تحبج
سلوم: هيه صح تحبنيه هب جنه كل يوم تمرغنيه بعصاتها حشى ما اواحي ارمس بكلمه الا القاها مجهزهة عصاتها
الريم: ع قولتهم ما يضربك الا الي يحبك
سلوم: هيه انتي تقولين هالرمسة الا كذيه تعالي يلسي عندها بس
الريم: لازم ايي اتعرف على يدتج فديتها محلى سوالفها يوم تطرينهن النا
سلوم: هيه فديت عيوزيه محلى سوالفها كسر تيم ماعليهن رمسة
الساعه 8 فليل شميم دقت حق الريم وخلت امها ترمس الريم
الريم: مرحباا الساااع خالتيه
ام شميم: مرحب باقي شحالج يعلنيه افداج؟
الريم: بخير وسهاله ومن جداج خالتيه ربج الا بخير؟
ام شميم: بنعمه ربيه يعافيج ما نشكي باس .... عيل وينج الريم بنيتيه مالج شوف تولهنا عليج ما ريناج من زمان
الريم: شسوي خالتيه تعرفين ثانويه عامه ودراسة وكراف
ام شميم: هيه عسى الله يوفقن وتيبن ذيج النسبة الي ترفع الراس
الريم: امييييييين ويا شميم ياربيه .خالتيه ابا اطلب منج طلب ولا تردينيه
ام شميم: عوونج بنيتيه
الريم: عانج ربج بس بغيت اطلب منج ان شميم تي ويانا رحلة دبي
ام شميم: لالالا منقوود ماشي سيرة
الريم: خالتيه هذي اخر سنه ويمكن ما نكون مع بعض السنه اليايه وما نسير رحلات ويا بعض لا تردينيه خالووه
ام شميم: ما ردج بنيتيه لكن
الريم تقطع رمستها: عيل خلاص عشان خاطريه تخلينا تسير ويانا ونحن ما بنسير رواحنا ابلات بيكونن ويانا وانتي بس قولي تم وشميم بعيونيه بحطيها والي يقرب صوبها بحط الفرد بين عيونه
ام شميم: ونعم والله بنت حمد خلاص تم فديتج
الريم: مشكووووورة خالوه
ام شميم: يالله فديييييييييت منطووقج ياربي
الريم: علنيه ما ذووق حزنج خالتيه تسلمين
ام شميم: امييييين ولا حزنج يلا اخليج هذي ها شميم رمسيها
الريم وشميم سووو حفله ( مستانساات) بس بدوون كيك الا في التلفون
عقب كم يوم كانت امباراة العين ويا الشارجه نهائي كاس رئيس الدوله وكان ربشة من الخاطر خاصه يوم فازت العين
