تحدي العشق " الجزء الثالث من سلسلة العشق "

البارت الخامس والاخير

نوفيلا
تحدي العشق
الحلقه الخامسه (الاخيره )
*********************
دخلوا المملكه وراسهم مرفوعه بانتصارهم العظيم اللي حققوه ف الحرب مع بعض وقفت عشق وغيث قصادهم وع وشهم ابتسامه رضا نزلوا من الاحصنه ووقفوا قدام اهلهم بشبه ابتسامه
عشق : كان عندي ثقه كامله ان الحياه الشخصيه امراء المملكه يقدروا يفصلوها عن ارض المعركه وشئون المملكه
ليث بجديه : ده واجبنا يا مولاتي تاجه المملكه مادام احنا افراد فبها
غيث بابتسامه فخوره : النهارده بس اثبتوا انكم تصلحوا لعرش المملكه .. بالمناسبه دي بعد اسبوعين من دلوقتي هيتم اعلان ولي العهد المستقبلي للمملكه .. ودلوقتي وزعوا الغنيمه ع الشعب وما تبقي خلوه ف بيت المال
دخلوا جو كلهم وكل واحد راح ع جناحه الخاص بصمت مر شهرين ع غياب وعد وريحانه من المملكه والاميرين اتغيروا وبقي ف حاله من السكوت والعصبيه فيهم وكل واحد فيهم نفسوا يرجع بالزمن لحظات بس مش نافع...
دخلت عشق الجناح ع ليث ولقته واقف وماسك سيفه المميز وبيبص عليه بشرود بصت عشق بحزن ع ابنها وراحت ناحيته وحطت ايدها ع كتفه والتفت ليها بسرعه ورسم شبح ابتسامه ع وشه
ليث : ماما .. اتفضلي
عشق : بتعذب نفسك لي يا ليث
سكت ليث وكان هيرجع السيف بس عشق مسكته منه وبصتله : لو انت عايزها لي مش عندها دلوقتي
ليث : مش فاهم انتي بتتكلمي ع اي يا مولاتي
عشق : ما دام قولت يا مولاتي يبقي انت فاهم كويس انا بتكلم ع اي يا ليث .. بتكلم ع اللي من ساعه ما مشيت من شهرين من القصر ده وحالك اتبدل .. بتكلم ع اللي غيرتك وخلتك عصبي ومبتسمعش لحد وبارد بعد ما كنت كتله ف الاستفزاز
ليث بجمود : هي اختارت تمشي ومتسمعنيش يبقي خلاص براحتها
عشق : وانت امتي عاملتها كويس يا ليث
بص ليها باستغراب وهي اتكلمت : متبصليش .. انت امتي كلمتها كويس مش انت بنفسك اللي منعتها من انها تحبك .. مش انت بنفسك اللي قولتلها تبعد وتتصرف بعقل مش ده اللي حصل
ليث : مكنش ف مشاعر ناحيتها
عشق بهدوء : انت اللي صورت لنفسك كده .. بس المشاعر دي كانت جواك يا ليث فاكر ولا تحب انا افكرك ,, كرهك لشادي اللي انت بتقول ملوش مبرر اجبلك مبرر دلوقتي .. اقولك انه بسبب وعد وانه كان بيتقرب منها .. اقولك انه كان بيحب دايما يقعد مع وعد وده اللي مخليك مش طايقه
ليث بضيق : مولاتي ملوش لازمه الكلام ده .. خلاص انا لا ميت ف بعدها ولا انا مكسور ونفسي اخدها ف حضني واقولها افضلي جنبي
عشق بغضب من برود ابنها : لا انت ميت ف بعدها يا ليث .. ميت ومكسور ونفسك تاخدها ف حضنك وتقولها خليكي جنبي وف حضني نفسك تعمل حاجات كتير بس ده
شاورت ع عقله : انشف من الحجر مش راضي يتنازل بس شويه صغيرين عن الكبرياء اللي فيه هتفرح لما تشوفها مع غيرك
بص ليها بعيون حاده جواها غضب وهي اتكلمت بسخريه : مالك بتبص كده لي .. وعد ف النهايه بنت واميره ومش بس كده دي بنت الملك عمر والملكه المستقبليه للمملكه شوف كام واحد نفسه يحصل عليها
ليث بعصبيه : ماما كفايه
عشق : لا مش كفايه انا فضلت ساكته وقولت انك هتفهم لوحدك وهتروحلها بس واضح اني مبقتش زي ما كنت ومبقتش بقدر الامور صح .. مش هسمحلك تكسر قلبك بايدك ولا تكسر قلبها اكتر من كده
ليث : هتغصبيني
عشق : مقدرش اغصبك لانك مش صغير .. انت فاهم وعارف انت عايز اي بس محتاج انك تفكر شويه بقلبك وهتكسب
بصت للسيف وحطته ع رقبته وهو بص ليها بزهول واستغراب وهي اتكلمت بنبره ذات مغزي : ابقي امسح الدم اللي ع سيفك يا .. سمو الامير
ومسكت ايده وحطت السيف فيه ومشيت بهدوء زي ما دخلت بنفس الهدوء وهي يواثقه ان كلامها هيغير كتير ف حياة ابنها وتفكيره .. مسك السيف وبص عليه وحط ايده ع الدم بشرود وهو بيفتكر لما جرحها من غير ما يقصد ونسي يمسح الدم لحد ما نشف ع السيف ورفض انه يحارب بيه تاني عشان دمها ميروحش من ع السيف ويتلوث بدم الاعداء!!
&&&&&&&&&&&&&&&&&&&&&&
دخل جناحه ورمي السيف ع السرير وقرب من الشباك ووقف قصاده وهو بيبص للدم اللي ع ايده وافتكر ف الفتره اللي كانت ريحانه فيها قبل ما تمشي
#فلاش
دخل القصر بسرعه وهو متعصب بعد ما عرف حقيقه كارمن كلها هو وليث وابتدا يتدرب جامد بالسيف لدرجه جرح دراعه بدون قصد وكمل اللي كان بيعمله وهو بيفتكر ان كان ممكن الملكه تموت بسبب مراته هو!!
عدت من قصاد مكان التدريب بس لمحته وهو بيتدرب وقفت بهدوء وهي بتراقبه بصمت بس لفت نظرها الجرح اللي موجود ف دراعه جحظت عينها بصدمه وراحت بسرعه جابت مطهرات وقماش ورجعت تاني
ريحانه بصوت عالي : سمو الامير .. دراعك بينزف
وقف مراد وبص ليها بغضب بس هي مهتمتش بغضبه ده وراحت بسرعه وقطعت الكم جامد بايدها عشان تقدر تشوف الجرح وابتدت تنظفه وهو بيبص عليها باستغراب وغضبه ابتدا يروح بهدوء ونظفت الجرح وعقمته وبعدين بعدت واتكلمت باعتذار
ريحانه : اسفه سمو الامير ع تدخلي بس دراعك كان بينزف .. بعد اذن سموك
وكانت هتمشي بس هو مسك ايدها وهي اتجمدت مكانها بدهشه ولفت راسها ببطء ناحيته وهو بص ليها بعيون جامده مفهاش مشاعر وبعديت ابتسم ابتسامه خبيثه
مراد : خايفه عليا ها!
ريحانه بهدوء كاذب : طبعا سموك .. لانك سمو الامير وولي العهد المستقبلي اي حد مكاني كان هيعمل كده
مراد : بس مش اي حد مكانك كان يقدر يتحداني ع قلبي
سكتت ريحانه بارتباك وهو ضحك بشماته وهمس : عشان تعرفي ان انا صح
ريحانه : مينفعش سموك منظر سموك قصاد الخدم والحرس .. لو الاميره كارمن عدت
قاطعها : انتي واقفه معايا .. ولو ده اللي مضايقك اوي كده تعالي
وشدها من ايدها ومشي بيها بعيد لاخر القصر ووقف
مراد : وادينا بقينا لوحدنا وبعيد عن العيون .. ها وبعدين
ريحانه : وبعدين اي
مراد : المهله بتاعتك مش فاضل فيها غير اسبوع
ريحانه : اسبوع ويومين
مراد باستغراب : ده انتي حاسبهم بالظبط بقي
ريحانه : طبعا لاني مستنيه اشوف نتيجتي
مراد : نتيجه اي .. انتي معملتيش اي حاجه يعني النتيجه صفر
ريحانه بابتسامه : بالعكس انا شغلت ده
وشاورت ع عقلها وهو بصلها باستغراب وهي كملت : شغلت عقلك وخليتك تفكر فيا 24 ساعه وتتوقع انا ممكن اعمل اي وتتفاجئ اني مبعملش ولا حاجه فترجع تفكر تاني .. فاانا سيطرت ع ده فالطبيعي هكون سيطرت ع قلبك يا سمو الامير
مراد باعجاب من تفكيرها : يعني انتي قاصده اللي بتعملهي
ريحانه : طبعا .. وع العموم مش فاضل كتير وهتعرف ان كلامي كان صح يا .. سمو الامير مراد
ومشيت وسابته وهو بص مكانها بحيره من البنت الغريبه اللي دخلت حياته بطريقه اغرب وبص ع مكان القماشه ع كتفه وابتسم بشرود وهو بيفتكر وهي بتربطها ع ايده بلهفه وخوف حس بيهم جدا ومشي تاني عشان يرجع لجناحه
#باك
مسح الدم  اللي ع ايده بعصبيه وحس بإن ف حد موجود معاه بص وراه بسرعه وكان غيث اللي واقف
غيث : اقدر اقعد معاك!!
مراد  بسرعه : طبعا جلالتك اتفضل مش محتاج تسألني
قعد غيث ع الكرسي ومراد جيه قعد جنبه وابتسم
غيث : مبتسم لي
مراد : عاده الملكه عشق هي اللي بتيجي
غيث بمرح : قولت اغير ف الادوار عشان متملش .. وبعدين الملكه وراها اشغال تانيه ولا انا منفعش
مراد : لا طبعا جلالتك العفو
غيث : تعرف يا مراد .. انا ومامتك كانت قصتنا غريبه
مراد : ازاي
غيث : كل القصه بتاعتنا كانت لعبه .. حبينا بعض من خلال لعبه صغيره
مراد باهتمام : اي هي؟!
غيث : مامتك بسهوله عملت نفسها انها فقدت الذاكره عشان تكشف خاين كان ف مملكتها .. وطبعا انا كنت عارف كل حاجه وعارف مين الخاين ده بس مامتك لا .. هي مثلت انها فاقده الذاكره وانا مثلت اني جوزها اللي هي متعرفوش لانها طبعا فاقده الذاكره زي ما بتقول وكانت الملكه هيام عارفه بالخطه بتاعتي .. مامتك لانها مش فاقده الذاكره طبعا كانت معترضه وكانت متعصبه جدا بس مقدرتش تكشفني لاني كنت بشخصيه انسان عادي .. بس لما حست ان ف حاجه غلط سألت ودورت لحد ما عرفت اني ابن عمتها والملك المستقبلي للمملكه .. وجمعت العيلتين ببعض من تاني بعد ما كان كل حد ف حاله .. ومشيت قصادها ومع اني كنت واثق ان ف مشاعر ناحيتها تجاهي بس هي كانت ومازالت عنيده ومشيت من غير ما تعمل اي حاجه .. بس كانت بتغير جدا ع فكره ومره رسمتلي صورتي ع الحيطه بالسكاكين انتقاما مني اني كلمت اميره
ضحك مراد : معقوله .. انت بتتكلم عن الملكه نفسها ولا حد غيرها
غيث بابتسامه : هي الملكه العاقله الحكيمه القويه اللي قصادكم دي هي نفسها اللي بتغير وتحب وتتجنن وتقتل اي حد لو جيه ع حد من عيلتها .. انت عارف انا بحكيلك لي اصلا
بصله مراد باستغراب وهو كمل : عشان اعرفك ان انا كنت ف نظر عشق لما حبتني مجرد انسان عادي .. هي محبتنيش لكوني امير لا هي حبتني غيث الشخص العادي اللي اقتحم حياتها فجأه بدون استئذان .. زي ما ريحانه اقتحمت حياتك وقلبك من غير استئذان يا مراد
بصله مراد بجمود ولف وشه الناحيه الثانيه واتكلم ببرود : لا هي استئذنت تعمل كل اللي هي عايزاه وانا سمحتلها
غيث : انت بجد مصدق اللي انت بتقوله يا مراد .. مصدق انك انت اللي سمحتلها انها تدخلك حياتك .. انت اه وافقت ع شئ صغير اوي بس الباقي مكنش بايدك ولا هيكون بايدك .. الباقي كله هي اللي كانت مسؤله عنه .. هي اللي خلت عقلك قبل قلبك يتعلق بيها ولا فاكرني مش فاهم انت بتفكر ازاي يا مراد .. انت ابني واول ابن ليا اول فرحه حسيتها معاك .. عارف تفكيرك ازاي وعارف بتحس باي .. يمكن انا مش زي عشق وباجي اسأل عن صحه ده وصحه ده بس انا عارف انتوا عايشين ازاي وعارف كل حاجه بتحصل هنا
مراد : والمفروض اعمل اي
غيث : دور عليها يا مراد .. هي قريبه منك وف نفس الوقت بعيده وخد بالك انك هتتصدم
مراد باستغراب : هتصدم من اي
غيث بابتسامه : لو لقيتها هتعرف .. دور عليها لان هي دي البنت اللي تستحقك واللي تستحق تكون زوجه الامير مراد
مراد : بس دي خدامه
ابتسم غيث ومردش عليه وقام من مكانه وطلع ومراد بص مكان ما طلع باستغراب من رده فعل والده وفكر كويس ف الكلام اللي هو قاله .. وقرر ف نفسه انه لازم يدور عليها بس بعد الحفله اللي موجوده ف ممكله شادي !!
&&&&&&&&&&&&&&&&&&&&&&&&
اصابت الخمس اسهم مره واحده الهدف من ع بُعد بص شادي ليها بصدمه ممزوجه بالدهشه بينما ف ابتسامه ثقه بسيطه ع شفايفها اتعدلت ف وقفتها ونزلت القوس ومدت ايدها بيه اخدته منها الخادمه وبصت لشادي
شادي : بجد يا وعد انتي كل مره بتصدميني كل مره بتزودي ف عدد الاسهم ومفيش غلطه
وعد : اهم حاجه التركيز .. ركز ع هدفك وانت هتقدر تصيبه يا سمو الامير
شادي : ما شاء الله احسنتي يا سمو الامير
ابتسمت بهدوء وبعدين مسكت سيفها  : نبدأ!!
شادي باستغراب : انت متعبتيش
حركت راسها بنفس وهو مسك سيفه وضحك : استعدي للهزيمه يا اميرتي الحلوه
هجمت عليه فجأه وهو صدها باعجوبه وبص عليها بصدمه اتكلمت بصوت كفحيح الافاعي : قولتلك اهم حاجه التركيز والكلام الكتير هيشتت تركيزك .. دافع
ورفعت سيفها من تاني ونزلت بيه وهو رفع سيفه وصد هجمتها عليه للمره الثانيه ضربت السيف عند رجله بس هو نط بسرعه وحرك السيف عند رقبتها بس هي اتفادته بسهوله وهي مش شايفه قصادها غير صوره ليث وبس وازاي ضحك عليها بالطريقه دي واتحول شكل شادي لشكل ليث وابتدت تضرب بعصبيه وكره وهو متفاجئ من ردها الغريب ده وفضل يصد ف هجماته لحد ما وقع منه السيف من كتر التشتت وهي وقفت سيفها ع رقبته وهو رفع ايده باستسلام
شادي : انا اسف .. انا من هنا ورايح مش هتدرب معاكي تاني
فاقت وعد لنفسها وابتسمت ونزلت السيف : مش الامير وعد اللي تنهزم بسهوله يا سمو الامير
شادي : بس انتي كنتي غريبه .. بتحاربي بعداء ولا اكنك ف ارض المعركه
وعد بضحك : دخلت ف الشخصيه اوي والموضوع عجبني
شادي : بس بجد .. انتي متدربه كويس اوي يا وعد .. فعلا انتي كان معاكي حق لما قولتي ان الشخص ده تدريبه ممتاز
سكتت وعد واتمحت الابتسامه اللي ع وشها وهو لاحظ ده اتكلم  بشك : انتي كويسه!!
وعد : اه انا تمام .. انا هروح اجهز عشان حفله بليل
شادي بصوت عالي لانها كانت اتحركت : ليث هيحضر النهارده اكيد مع الملك والملكه
وقفت وعد مكانها ولفت وبصتله : وانا معنديش عداء معاه عشان اهتم اذا كان هيحضر ولا لا .. اهلا وسهلا لو حضر ومع السلامه لو محضرش
وكملت طريقها تاني وهو كلم نفسه بهمس : انا واثق ان اللي انتي فيه كله بسبب ليث .. وانك هتحضري حفله النهارده عشان ليث اولا ثم السبب الرئيسي للحفله ثانيا
&&&&&&&&&&&&&&&&&&&&&&&&&&&&&&&
مشيت بين شوارع المملكه بهدوء وابتسامه بارده ع شفايفها عشان منظرها قصاد الناس وبدون قصد خبطت ف واحده ف الشارع كانت هتتأسف بس اتفجأت وبعدين ابتسمت : الاميره المنفيه!
بصت ليها بغضب وبعدين ابتسمت بغل : ريحانتي .. وحشتيني يا روحي تخيلي بعد المده دي كلها نتقابل تاني
ريحانه : بس شوفي الفرق اللي حصل .. بقيت عاديه من عمه الشعب بعد ما الملك طردك عشان كنتي هتجيبي ليهم فضايح وتشوهي سمعه المملكه وبقيت كل شويه ف مملكه شكل مش كده
كارمن بحقد : بس بردو طلعت بحاجه ونفيتك من القصر انتي كمان وخرجتك من المملكه كلها
ريحانه بابتسامه : بجد !! يعني ده اللي وصلك!!
كارمن : طبعا .. انا شوفتك وانتي مجروحه ومكسوره حبيب القلب طلع مبيحبكيش اووبس .. لا ويا حراام سمعتيه منه بنفسك وده كان الاحسن ع فكره لان لو كنت طلعت من هناك قبل ما انتي تطلعي مكنتش هسيبك ف حالك بس شوفي ادينا اتقبلنا من تاني
بصت ليها ريحانه بنظرات خاليه من التعابير وبدون مقدمات ضربتها بالقلم بغل جامد لدرجه انها وقعت ع الارض وبصت ليها بعصبيه
ريحانه : من زمان وانا نفسي اديكي القلم ده .. لا وده كمان
وضربتها تاني وكارمن صرخت من الوجع وبصت ليها بحقد دفين
ريحانه بابتسامه : مالك يا كوكي .. ما احنا من مستوي بعض دلوقت .. ولا لا كل واحد لازم يرجع لحجمه الاصلي .. انا وانتي مش زي بعض ابدا
كارمن : انتي ازاي واحده زيك تتجرأ تضربني
وكانت هتضربها بالقلم بس هي مسكت ايدها بسرعه وثبات ولوتها ورا ضهرها اللي خلا كارمن تصرخ من الالم حطت ريحانه ايدها ع بوقها ومشيت بيها بعيد عن الناس وهي بتزقها جامد ولما حست انهم بقوا لوحدهم رمتها جامد ف الارض
ريحانه : كنتي عايزه تموتي الملكه عشق .. مش كده
وضربتها بالقلم تاني واتكلمت : كنتي بتقولي اني خدامه واني غلطانه لما اتحديتك وكنتي مغروره ف نفسكس صح
وضربتها بالقلم بدرجه اقوي اللي خلا كارمن تعيط وريحانه بصت عليها بغضب : كنتي بتلعبي لعبه قذره ع ام جوزك والملكه والمملكه كلها وانتي نايمه ف حضن الامير صح
ومسكتها من شعرها جامد وضربتها قلم ورا الثاني مره واحده واتكلمت بصوت كفحيح الافاعي : يمكن هما معملوش ليكي حاجه بس انتي جيتي تحت ايدي يا .. اميره
ولقت حاجه اشبه بالكرباج مسكتها ونزلت بيها جامد ع جئم كارمن وبعدين سكتت  وابتسمت ولا اكنها عملت حاجه وقربت منها ورفعت وشها وهي بتدوس عليه جامد
ريحانه : في حفله النهارده .. اكيد سمعتي اتمني انك تحضريها عشان تفهمي يا حلوتي
وسابتها ومشيت وهي حاسه انها هديت نوعا ما ومر بذاكرتها مراد نفضت الذكره بسرعه وكملت طريقها زي ما كانت رايحه!
&&&&&&&&&&&&&&&&&&
جهز عمر الترتيبات اللازمه للمغادره وراح لنورسين اللي كانت واقفه قدام احد الاحصنه وبتحرك ايدها عليه بشرود
عمر : مالك يا نوري
نورسين : وعد
عمر باستغراب : مالها وعد يا نورسين
نورسين بحزن : انا حاسه بيها يا عمر .. وعد بتتعذب بسبب ليث يا عمر .. هي اه فاكره انها لما هتروح مع ابن عمتها انها كده مش هتحسسنا انها تعبانه بس انا حاسه بيها .. قولي هو لي بيحصل معاها كده يا عمر
قرب عمر منها وحضنها ومهتمش للي موجودين : نور حبيبتي وعد بنتنا كبرت .. وانا عارف كل اللي بتقوليه وحاسس بيه بس بايدنا اي يا نوري
نورسين : لي منقدرش نرجعهم تاني يا عمر .. لي مش عارفين نجمعهم
عمر : ع فكره حتي ليث متعذب وانا متأكد من ده .. ولا ناسيه شكله لما كان بيبص عليها وهي ماشيه مع شادي بكل برود وعدم مبالاه مصطنعه من بنتك
نورسين : واحنا دورنا اي
عمر : دورنا اننا نوضح الحقيقه قصادهم بس اذا كانوا هما مش عايزين الحقيقه دي مش هنقدر نجبرهم وبعدين انتي مش ملاحظه حاجه
بصتله باستغراب وهو ابتسم وسند براسه ع كتفها : ليث و وعد بيفكروني بينا .. ف اول علاقتنا بس اللي اختلف ان احنا كنا متجوزين انما دول لا
ابتسمت نورسين : ومراد وريحانه تحسهم غيث وعشق كده
عمر : حكايتنا بتتعاد من تاني قصادنا بس الابطال اختلفوا
نورسين : معاك حق .. يلا عشان نلحق نوصل
عمر وهو بيمسك كفها بتملك : يلا يا مولاتي
ابتسمت نورسين بحب ع رفيق دربها ومصدر سعادتها وامانها ف الدنيا وانه بكلمات بسيطه بيقدر يقنعها ويخليها اسعد واحده وتنسي حزنها بسهوله كل مره وكل يوم وكل ساعه بتتأكد انها لو كانت دورت ف كل مكان مش هتلاقي حد زي عمر ابدا اللي من اول ما دخل حياتها اتكتب ليها عمر جديد بقصه جديده خالص!!
&&&&&&&&&&&&&&&&&&&&&&&&&&&&&&&
انسدلت ستائر الليل والكل ابتدوا يتجمعوا وكانت وعد ف ابهي صورها كالعاده والابتسامه اللي اجادت رسمها باحترافيه ع شفايفها مفرقتهاش طول الحفله وجريت فجأه ناحيه الباب وهي شايفه اهلها بيدخلوا
وعد بسعاده : بابا .. ماما
حضنت مامتها جامد باشتياق وبعدين بعدت وحضنت عمر اللي ضمها بحب وحنان
وعد : وحشتوني اوي
عمر : والله اللي اعرفه انك كنتي تيجي لينا لو وحشناكي
نورسين باهتمام : عامله اي يا وعد .. كويسه ف حاجه مدايقكي او تعباكي
وعد بابتسامه صادقه : انا كويسه يا ماما اهو .. انا بنتك يا مولاتي يعني قويه
عمر بمرح : زي ابوكي
وعد : شرف ليا مولاي
ومسكت طرفي الفستان بحركه مسرحيه وهي بتحيي عمر اللي ضحك ع بنته المشاغبه وبعدين حضنها وهي ابتسمت وهتفت بسعاده : مولاتي عشق
بعدت عن عمر ونورسين بسرعه وجريت ع عشق اللي ابتسمت وحضنتها جامد لانها افتقدتها جدا ومكنش شعور عشق يختلف عنها ابدا .. قرب شادي منهم وسلم ع عمر ونورسين بحفاوه وبعدين اتجهوا كلهم لعيله عشق وغيث
وعد : طبعا مش محتاجه اقولك انك وحشتيني
عشق بابتسامه : طبعا مش محتاجه .. لاني واثقه من ده
وعد بابتسامه محببه : اهلا جلالتك
غيث وهي بيفتح ايده : اهلا بيكي يا اميرتي المدلله
حضنته وعد وبعدين بعدت عنه وشادي قرب منهم
شادي : ع فكره انا موجود معاها والله
غيث : هي وحشتنا اكتر
شادي بهزار : لا ده انا كده ازعل اوي جلالتك مكنش العشم يعني
ضحك غيث وحضنه وعشق سلمت عليه وبعدين ابتسم مراد
مراد : اهلا يا سمو الاميره
وعد : اهلا بيك يا سمو الامير .. انت كويس!
مراد : اه تمام .. مش هتسلم يا ليث ولا اي
بصت وعد ناحيته بتلقائيه وهي ساكته ونظرات الحزن اتجمعت ف عينها وهو بص ليه بنظرات مش مفهومه بس كان مركز اوي وهو بيبص ع تفاصيل وشها لسه زي ما هي مفيش حاجه اتغيرت فيها
وعد بهدوء : اهلا بيك سمو الامير
ليث : اهلا يا .. سمو الامير وعد
بعدت وعد نظرها عنه وشادي قرب منها ومسك ايدها وبص للواقفين وهو واخد باله جدا من نظرات ليث اللي هتقتله ف مكانه
شادي : خلونا ندخل جوا .. شويه وهتعرفوا سر الحفله
نورسين باستغراب : هو انتوا لي مقولتوش ع سبب الحفله
شادي بابتسامه : لانها مفاجأه .. يلا خلينا ندخل
ودخلوا جوا كلهم ومراد بيبص ف وجوه كل الموجودين يمكن يلمحها ولو صدفه بس مفيش حاجه زليث مركز مع وعد وشادي اللي سابوهم وابتدوا يرحبوا بـ باقي الضيوف وشادي مازال ماسك ف ايد وعد اللي فكر ليث انه هيقطعهالها ويقطع ايد شادي عشان لمسها!!
انخفضت الاضواء فجأه وسمعوا صوت اقدام داخله عليهم واشتغلت الاضواء من تاني وركز مراد ناحيه اللي نازله بالفستان الملكي وع وشها ابتسامه واثقه اتصدم وغمض عينه وفتحها كذا مره وهو حاسس انه بيخرف وانه اتهوس بيها لدرجه انه شايفها ف فستان اميره داخله عليهم
مراد ل ليث بهمس : اقرصني يا ليث
ليث بصوت هامس مصدوم : مش محتاج لان انا شايف اللي انت شايفه
بصوا لبعضهم فجأه : اي دددده!!!
اتكلم الملك بابتسامه : طبعا انتوا مستغربين مين اللي دخلت دي .. عايز اقولكم دي سر الحفله .. الكل عارف ان اميره مملكتي اخت الامير شادي كانت برا عشان تتعلم وهترجع بعد التعليم .. احب اقدملكم اميره المملكه ريحانه .. الاميره ريحانه
ليث ومراد بصوت واحد : اميررره!!!!
لفت ريحانه بنظرها ووقفت بنظرها ع مراد اللي مصدوم من اللي سمعه وشايف بص لاهله وشاف الابتسامه ع وجههم
مراد بصدمه : انتوا كنتوا عارفين!!
غيث : اديك مش محتاج تدور وجتلك لحد عندك
مراد : هي دي الصدمه!
عشق : دلوقتي حججك كلها بطلت يا مراد ..  هي مش خدامه هي اميره
ليث : انتوا كلكم عارفين ع كده
عمر : انت تعتقد ان الملك غيث او الملكه عشق هيدخلوا حد القصر من غير ما يكونوا عارفين هو اتولد فين وامتي
مردش مراد او مرضيش يقف يكمل كل الكلام ده وراح لريحانه بسرعه ومن غير كلام مسك ايدها وشدها وراه وهي متفاجئه من اللي هو عمله قصاد الناس ده
ريحانه : سمو الامير ميصحش كده
مراد بغضب : هششششششش ولا كلمه
وفضل ماشي بيها لحد ما وصل ف مكان بعيد ووبعدين وقف وهي بصتله بغضب
ريحانه : ممكن افهم اي اللي سموك عملته ده
مراد : انتي مش خدامه؟!
ريحانه بزهول : نعم!!
مراد : بسألك .. انتي مش خداامه
ريحانه بهدوء : لا مش خدامه
مراد : امال اللي حصل ده لي
ريحانه : اللي بيسألني الامير مراد ولا مراد الجندي
مراد بحده : ردي ع سؤالي يا ريحانه
ريحانه : عشان اكشف حقيقه كارمن .. انا كنت موجوده من ساعه ما كارمن دخلت القصر ومشيت وقت ما مشيت بس
مراد بزهول : يعني كل ده كان لعبه منك!
ريحانه : مش لعبه ده اسمه تخطيط .. كنت واثقه ان كارمن بتخطط لحاجه خصوصا اني عشت ف مملكتهم فتره وسمعت كلام الناس عنها وعن اهلها فعرفت ان ف حاجه غلط والجوازه دي مش خير ابدا فكان لازم ادخل وف نفس القوت اتحرك براحتي
مراد : يعني حتي تحديكي كان لعبه
سكتت ريحانه وهو هزها من كتفها بعصبيه : ردي عليا يا ريحانه .. كان لعبه
ريحانه بزعيق : مكنش لعبه .. ده الحاجه الوحيده اللي كانت حقيقه يا سمو الامير ارتحت
مراد : طب .. لي مقولتليش . الملك والملكه كانوا عارفين صح!!
ريحانه : ايوه كانوا عارفين وانا اللي وصلت ليكم دليل ان كارمن ورا حكايه السر .. كل حاجه كنت انا وراها ولي مقولتلكش لاني ..
مراد بترقب : لانك اي؟؟
ريحانه بحزن : لاني حبيتك .. ف المده دي نا حبيتك وكنت عايزاك تحبني بس تحب ريحانه الخدامه مش تحبني لكوني اميره .. بس انت ضيعت كل ده
مراد : انتي سمعتي كلامي مع كارمن صح؟!
هزت راسها وبعدت عنه وهو لف راسها ليه تاني : ومستنتيش تسمعي مني لي
ريحانه : مكنش ف كلام محتاج يتقال بعدها سموك
مراد : لا كان فيه .. وكتير كمان بس انتي مشيتي
ريحانه : اي كان ممكن يتقال وانت مقولتوش .. انت قولت كل حاجه ف اليوم ده
مراد بغضب : لا مقولتش .. كل اللي سمعتيه كان مجرد كدب .. كنت عايز كارمن تفضل معايا اطول وقت ممكن عارفه ليه لانها كانت ناويه تقتلك انتي كمان
بصتله ريحانه بعدم تصديق وهو كمل : اي مستغربه!! .. ف الوقت اللي انتي عايزه تحمي بيه العيله انا كنت بحميكي من نفس هدفك .. كانت هتخلص عليكي عشان متلاقيش حد يقف ف طريقها خصوصا لما حست ان انا بدأت انجذبلك هي حست وانتي لا
ريحانه : بس انت
قاطعها بهمس : انا بحبك يا ريحانه
شهقت بصدمه من جملته مع انها بسيطه بس بالنسبه ليها كبيره جدا بصتله بعدم تصديق واتكلمت بخوف وترقب : بتحب ريحانه الخدامه ولا الاميره!
مراد بعتاب : انا معرفتش ريحانه الاميره دي غير من دقايق بس .. وانتي مش خدامه انتي حبيبتي
شهقه تانيه قلبها قرب يقف من كتر دقاته العاليه وهو اتكلم بابتسامه صادقه : انا دورت عليكي لما عرفت انك مشيتي من القصر عشان اعترفلك ان كان معاكي حق .. انتي سيطرتي ع كياني كله يا ريحانه .. سيطرت ع عقلي قبل قلبي وكان معاكي حق انه هيسيطر ع قلبي .. انتي دخلتي حياتي بمزاجك بس مش هتطلعي بمزاجك .. وكنت هرجع ادور عليكي من جديد بس لقيتك قدامي وابقي غبي لو بعدتك عني
ريحانه بابتسامه محببه لقلبه : مش زعلان مني عشان معرفتكش الحقيقه
مراد بغمزه : كل ده هنتحاسب عليه بعد الجواز ان شاء الله
اتكسفت ريحانه وكانت هتتحرك بس هو مسك ايدها وعدلها ناحيته وهي بصتله بنظره عاشقه وهو اتكلم بهمس : مش هتقولي بقي
ريحانه باستعباط : اقول اي
مراد بغيظ : لا والله
ضحكت ريحانه جامد وجريت من قصاده وهو ضحك عليها ورفع راسه للسما وكأنه بيشكر ربنا انه رجعها له من تاني ومشي من مكان ما جيه وهو قرر ان جوازهم لازم يتم والنهارده قبل بكره
&&&&&&&&&&&&&&&&&&&&&&
قرب منهم بغضب وهو خلاص قرر انه لازم يحط نهايه للقصه دي وللأبد
ليث بابتسامه مستفزه : هاخد منك الاميره لاخر العمر
وشدها من ايدها من غير ما يسمع حتي ردها ومشي بيها بعيد وهي بتحاول تبعد عنه ومهتمتش بالجمله اللي قاله وقف بيها برا جنب الغابه
ليث : اي ده
وعد باستغراب : اي !؟
ليث بغضب : كان ماسك ايدك يا وعد
وعد بضيق : وانت مالك يا سمو الامير انا معترضتش
ليث : بس انا معترض
وعد : لا دي حاجه ترجعلي
ليث : ها ده كان زمان .. قبل ما تسيطري ع كياني كله
وعد باقتضاب : سمو الامير ملوش لازمه الكلام ده
ليث : بطلي تقولي سمو الامير سمو الامير حفظته ليا اسم ع فكره
وعد : وانا مش ناسيه لما قولتلي اني لازم احفظ المقامات
سكت وبصلها بغيظ وهي بادلته بغيظ متبادل وهو اتنهد واتكلم بصوت حاول يخليه هادي : اسف
بصتله بعدم تصديق ان اللي قصاده ده ليث اللي اتأسف من شويه ده ليث!!
وعد بصدمه : اي
ليث : اسف يا وعد .. كانت لحظه غباء مني
وعد : ملوش داعي الكلام ده .. مش هيغير حاجه
ليث : لا هيغير انا معتذرتش من حد غير من امي والملك واحيانا مراد وبس انا مبعتذرش لحد يا وعد
وعد : انت متكبر
ليث : لا انا مش متكبر .. انا  بحبك .. ومتواضع جدا و
وعد مقاطعه : قولت اي
ليث بدهشه مصطنعه : اني متواضع
وعد : لا قبله
قرب راسه منها وهي كانت بترجع لورا لحد ما كانت هتقع وهو مسكها بسرعه قبل ما تقع وبص ف عينها واتكلم بتوهان : اني بحبك .. وبعشقك وبعشق كل تفصيله فيكي وكل حركه وكلمه بتعمليها وبتقوليها .. لا مقولتش
زقته جامد وهو ضحك بخفوت ع تعابير وشها اللي اتعصبت وكانت هتتحرك من مكانها بس هو مسك ايدها وشدها جامد وخبطت ف صدره وبعدت بسرعه
ليث : بصي انا معرفش ده حصل ازاي بس فجأه لقيت نفسي بحبك .. واني مقدرش اعيش من غيرك ومقدرش اكمل حياتي بدونك من تاني وانك هتكوني مرات وملكتي حياتي حتي لو غصب عنك انتي شخصيا
وعد بدهشه : يا سلام وانت هتتجوزني غصب عني
ليث ببراءه : لا لانك انتي كمان بتحبيني وعايزه تتجوزيني
وعد بضحكه ساحره ممزوجه بالحزن : يمكن كنت عايزه كده بس كل حاجه اتغيرت يا سمو الامير
قرب ليث منها ومسك ايدها وطبع بوسه نادمه ع ايدها : اسف يا وعدي
وعد بعدم تصديق : وعدك !!
حرك راسه بايجاب : ايوه من وانتي صغيره وانتي وعدي المميز والخاص .. اللي كنت بغير عليها من ابن عمتها .. اللي كنت بمنعها تختلط بالشباب بحجه خايف عليكي وكنت بكذب نفسي انها غيره .. انا بحبك ومن زمان بس كنت بكدب نفسي وبحاول اقنع نفسي اني غلط
وعد : انت جرحتني يا ليث .. كسرتني وكسرت غروري وكبريائي بكلامك عشان نفسك
ليث : وانا قدامك .. اعملي فيا ما بدالك بس متبعديش .. اعملي فيا اللي انتي عايزاه وانتقمي مني براحتك ع وجع القلب اللي سببته ليكي بس وانتي معايا ف حضني وانتي اسمك ع اسمي يا وعدي
وعد : وموضوع اليس
ليث : محدش كان عارف بيه غير ريحانه واللي اكشتفت انها اميره .. كانت شافتني مره وانا بدخل اوضتي بشخصيه اني اليس وكانت هتبلغ الملكه بس انا لحقتها وفهمتها .. انا مبحبش اعيش ف القصر بحس اني متقيد .. فاشتغلت الحاجه اللي بحبها ومراد وعمر بس اللي عارفين .. مكنش قصدي اخبي عليكي يا وعد
وعد : ودلوقتي انت عايز اي
ليث بحب وصدق : عايزك تكملي معيا لبقيت حياتي .. عايزك تبقي نصي الثاني وشريكه حياتي للابد .. عايزك تبقي كل حاجه ف حياتي .. قولتي اي
وعد : اممم .. وده طلب من الامير ولا اليس
ليث ببراءه : الاثنين بيحبوكي
غصبا عنها ابتسمت وهو ابتسم واتلكمت بوعيد : بس لو ضيقتني
ليث : قولتلك اعملي اللي عايزاه بس وانتي معايا
وعد بابتسامه : وانا موافقه يا سمو الامير
ليث : لا امير اي .. ده من اللحظه دي لو سمعتك بتقولي امير دي ممكن اقتلك عمر لاني مش هعرف اقتلك
ضحكت وعد ومشيت من قدامه وهو مشي وراها وهو بيتكلم بمرح : طب مقولتيش بردو هتقوليلي اي .. رقبة ابوكي ف ايدي
وصل الاربعه وبصوا لبعض بابتسامه كافيه تعبر هما حاسين اي دلوقتي ووقفوا قدام اهلهم
مراد : هو انا مصدوم ان كلكم كنتوا عارفين ومحدش فكر يقولي بس م مهم .. جلاله الملك جلاله الملكه انا النهارده هتجوز ريحانه .. وحالا هروح اتكلم مع اهلها لان كفايه وقت ضايع لحد دلوقتي
قبل ما حد يرد سمعوا صوت شادي وهو بيقول باستغراب : ف مأذون هنا
ليث بسعاده : ايوه ده تبعي
غيث باستغراب : تبعك ازاي
ليث : اصل الصراحه انا جايه النهارده اصلا وقولت مش ماشي غير ام اتجوز وعد
عمر : وبالنسبه ليا اي
ليث : انا حبيبك يا عمور اكيد مش هترفدلي طلب
عمر وهو بيحضن وعد : لا دي بنتي الوحيده .. روح شوفلك غيرها
ليث : والله ما يحصل انا عايز بنتك دي .. يلا عشان المأذون
مراد وهو بيمسك ايد ريحانه : حلو اوي يلا يا رحيانه
ريحانه بصدمه : يلا فين يا مراد .. انت اتجننت
مراد : انا مبقاش فيا عقل .. يلا بينا
ومسك ايدها وراح لاهلها واصر عليهم جدا وهم ضحكوا ووافقوا وهو راح للمأذون وكتب كتابه الاول بحكم هو الكبير وبعدين ليث ووعد وسط ضحك من الموجودين كلهم ع سرعه الاميرين وكل واحد وقف جنب اميرته الخاصه وجيه هادم الملاذات
شادي : يعني انتوا الاثنين اتجوزتوا البنتين الحلوين ف العيله وارتحتوا
ليث بضيق : ولااا بقولك اي اطلعمن نفوخي .. عشان مفتحش دماغك دلوقتي
شادي بصدمه : ولااا !!
مراد بنفس الضيق : واختك دي انا لسه مش متقبل الوضع فساعة ما اتقبله ابقي ساعتها كلمها وع ما اعتقد انك كده مش هتكلمها لاخر العمر
شادي : انتوا بتقولوا اي .. دول اخواتي
بص الاخيين لبعض وفجأه كل واحد شال ايمرته وطلعوا يجروا برا ناسيين مكانتهم كامراء كل اللي عايزينه يبقوا مع بعض وبس ويبعدوا عن كل العيون!!
عشق بدموع : الولاد اتجوزوا بسرعه .. من غير حتي ما يستنوا رأينا شوفت اخدوهم وهربوا ازاي
غيث بغمزه : مبيفكريش بحد
ضحكت عشق وافتكرت لما غيث خطفها ساعه الفرح وفاقت لقت نفسها ف وسط الغابه وكان نفس الشئ مع نورسين وهي بتفتكر لما لقت نفسها ف نص البحر وف الاخر بدأت حياتها ف زنزانه ف السجن وكل واحده فيهم بيفكر ياتري ولادهم هيبدأوا حياتهم فين وازاي!!
************************************
تفتكروا انتوا كمان هيبدأوا حياتهم فين !! اتمنوا تكونوا استمتعتوا بالنوفيلا البسيطه دي ونلتقي ف عمل جديد ان شاء الله
*النـــهـــايــه*
#Nemo