الطيبه صفه حلوه ... والفقر مش عيب ... ولو خدمنا هلنا اجرنا عند ربي كبير ... والصبر اجمل سلاح لمواجهة ظروف الحياه ... والادمان ع السكير والمخدرات مش حل بيش تنسى همك ... ولما تخدم امك وبوك الي روسهم اشتعلو بالشيب مش ح يضحك عليك الناس بالعكس ح يشكروك وحتكون كبير في عيونهم ... ولو اشتغلت وجمعت فلوس احسن من انك تخنب او تنصب ع الناس ... الشغل مش عيب ولو كنت عامل نظافه
صح كلامي ولا؟؟؟
سمعتو بي فولان الي حط امه وبوه في دار العجزه لانه مرته متبيش تخدمهم؟؟ ، وفلانه الي خلت راجلها ينقلب ويكره امه الي رباته وتعبت عليه هالسنين كلها؟؟؟ ، وفلان المدمن الي روح للحوش سكران وماليها للمليون ضرب امه ولما جي بوه بيضربه قتله وهو مش واعي؟؟ ، باهي سمعتو بي "الصاحبه" الي خانت صاحبتها مع حبيبها؟؟ وسمعتو بي اتنين اصحاب من طبقه متدنيه نصبو ع صاحبتهم الي من الطبقه الغنيه؟؟ خاطري نعرف .....
هوا كيف طاوعه قلبه يلوح هله في دار العجزه ويقعد بعيد عنهم؟؟
وهيا ماخافتش من كناينها مستقبليا انه يديرولها نفس الشي؟؟
وهداكا كيف قتل بوه؟؟وكيف قدر يعيش بعد هالكاينه؟؟
والصاحبه هدي كيف خانت صحبتها مع الانسان الوحيد الي حباته؟؟
وباهي الاصحاب كيف نصبو ع صاحبتهم المسكينه وخذو فلوسها؟؟ مش ساد انهم حرقولها قلبها ايزيدو ينصبو عليها؟؟؟
ديما في حاجه خلوها في بالكم انه مهما درت ح يدور عليك قانون الدنيا وهوا كما تدين تدان ، وماتحاولش تنتقم من حد لانه دارلك شي ماتخافش حقك مش ح يضيع لانه عدالة الله أجمل ربي الواحد العادل ح ياخذلك حقك ماتخافش ، الله القهار ح يقهرهم زي ماقهروك ، الجبار زي ما كسروك ربي ح يجبرك ، ربي قادر ياخد حقك من الي وجعوك وقهروك وضلموك ماتخافش اطمن بس💗
___________
ساره : هادو اصحابي مستحيل يديرو فيا شي
فاعل خير : اني فاعل خير وحذرتك ، ولاخر مره انقولك راهم مش اصحاب وهما يبو ينصبو عليك وياخذو منك فلوسك وبسس
ساره : تي برا العب بعيد وماتنسااش الفتنة اشد من القتل
فاعل خير : مشعارف كيف توثقي في ناس حتى في هلهم مافيهم خير (وصكر الخط ، اما ساره كانت واثقه في اصحابها وماحطتش موضوع فاعل الخير هدا في بالها بكل)
......
رؤى معصبه : اووووووف تي توا دخلتك للحمام
امها تبكي : الله يربحك يابنيتي
رؤى : واااكك واااكك من هالعيله ، بنمنع عليك الاكل والشرب شكلي
امها تبكي : حرام عليك يابنيتي شن ذنبي اني شن درتلك اني بيش اتعامليني هكي
رؤى : ذنبك انك اتزوجتي واحد فقيييرررر وعيشتيني في هم
امها تبكي وترعش : سامحيني يا ابنيتي سامحيني
رؤى : هففف هيا ندخلك للحمام
امها نزلت راسها وتبكي
رؤى : لاااا ما اتقوليليش درتيها تحتك
امها تبكي وخايفه من بنتها : ايه💔
رؤى عصبت زياده : ووووكك منك وووك امتى ربي ياخدك ويفكني منكك (وضربتها برجلها وقعدت كل ما ترفعها ولا اديرلها شي تضرب واتهزب💔 لاحول ولا قوة الا بالله💔)
_______
بوه : ياولدي بطل سكير الله يهديك
فارس : اششش
بوه : شن اشش هدي بطل ياولدي را هذا سمم سمم
فارس عصب : خطااااني ياشايب النحس وانت ع الطالعه والنازله اتهزب اسكككت اسككككت را انسل بلعومك من وين ما نبت
بوه : تكلم بادب اني باتك
فارس فك حزام سرواله وقعد يضرب فيه بوحشيه وهو مش واعي لروحه : اني لما انقول اسكت يعني اسكككت يافقرري يامشلووول
بوه يعيط ع طول حسه ينااري الضرب حاار💔نين خشو ولاد الجيران طلعوه برا الحوش وضربوه
امه جت لراجلها اتساعد فيه و تبكي : لا حول ولا قوة الا بالله ياريتني عقمت وما جبته ياريتني متت وماولدته
باته قعد يبكي حتى هوا : حسسبي الله ونعم الوكيل حسبي الله ونعم الوكيل اجعنك ماتربح
(وياا موعر دمعت الاب والام دموهم يبكو الحجر💔 حسبي الله ونعم الوكيل💔)
________
ساره باست راس امها وبوها : ياصباااح الورد ع احلى ورد بالكون
امها ضحكت : لحمامه زاهيه اليوم هههه
ابتسمت ساره وحظنت امها من ورا : وعلاش ما تزهاش ، مش اليوم عيد ميلاد مامتها الحلوهه؟؟؟
امها ابتسمت وقعدو ساره وبوها يغنولها💗
(زي ما في ناس مش كويسه لا مع هلها ولا عربها في غيرهم اكويسين ويحبو الخير ليهم ولي غيرهم بالزايد💗)
______________________
هاا شن رايكم ف المقدمه؟؟
حزينه صح💔
أنت تقرأ
عدالة الله أجمل🥀
Short Storyقال الله تعالى : "ووصّينا الإنسان بوالديه حَملته أمه وَهْناً على وهن". "و بالوالدين إحسانا". "ووصينا الإنسان بوالديه إحساناً حملته أمه كُرهاً ووضعته كُرها وحملُه وفصاله ثلاثون شهراً". "وَقَضَى رَبُّكَ أَلاَّ تَعْبُدُواْ إِلاَّ إِيَّاهُ وَبِالْوَال...
