Sa una'y aayain ka sa hapag
bubusugin ang iyong mga mata
pati na ang kumakalam na tiyan
sa malinamnam at masarap
na pagkain; personal sa iyong inihanda.
Tatanggapin ang alok at hindi
na namalayang habang
sarap na sarap ka sa paglantak
ay tinataniman ka na---
ng punla; hayaan mo raw
itong umusbong.
At sa panibagong siklo ito'y
nagbunga--- kumalat
hanggang sa dumami
hindi na mabilang
kaya ang dating saganang pagkain
ngayon ay salat na;
pinilit pasaganahin itong muli
hanggang sa nawala na lang sa ulirat
winakwak hanggang sa tuluyan
nang mapunit ang balat
sinaid ang lamang-loob
hindi nakuntento hanggang sa
pagpira-pirasuhin ang dati'y buo.
Nag-agawan sa bagong natuklasan
winakwak ang isa't-isa
pinagpiyestahan ang kauri
walang itinira
muli ang siklo'y iikot; magpapatuloy
maaaring mas kagimbal-gimbal pa
ang mangyayari sa bawat henerasyong darating dahil
hindi magwawakas; ang kagustuhan natin bilang tao.
