الحلقة الرابعه
#لم_تكن_خادمتي_(2)
لا اله الا الله محمد رسول الله
لسه حازم بيفتح التليفون سمع خديجه بتنده عليه وجايه ف رمي الفون ورجع سريره تاني وملحقش يفتح حاجه
خديجه: ايه يا حبيبي نمت
حازم: لسه هنام أهو
خديجه: لاء تعالي كل الأول
حازم: خديجه قولت عايز انام
خديجه كشرت: هو في ايه ؟! أنت بتتكلم كده ليه يا حازم
حازم قام وقف وقرب منها وهو مكشر: خبيتي عليا ليه حاجه زي دي يا خديجة خدعتيني ليه ؟
خديجه وشها اصفر وعينها دمعت: انت عرفت منين ولا كنت بتتصنت عليا
حازم بزعيق: انتي خدعتيني وجاية تقولي عرفت منين انتي اتهبلتي
خديجه بعياط: انا أسفه والله بس خفت انك لو عرفت اني عمري ما هخلف متتجوزنيش وانا بحبك
حازم متوقعش ده ومكنش يعرف اتصدم من كلامها
حازم: ايه !! مبتخلفيش ازاي؟ !
خديجه هنا فهمت أنه كان بيوقعها مكنش عرف حاجه
خديجة :.......
حازم بصوت عالي: ردي عليا ازاي
خديجة اتنفضت من صوته : حاضر هقولك
حازم بزعيق: اتفضلي
خديجه : وانا بره عملت حادثة
حازم: الهي من 4 سنين مش كده
خديجه : ايوه ومن ضمن العملية الدكتور استئصل المبيضين و كلية
حازم بزعيق : ومتعرفنيش كل ده و 4 سنين و حب وجواز و زفت علي دماغك وانا مش عارف بتضحكي عليا
خديجه بعياط : حازم انا خوفت تسيبني والله انا مليش غيرك
حازم: انتي أنانية و كدابة ليه تحكمي عليا اني مكنش اب ليييه
خديجه : انا فعلا أنانية في دي انا اتحرمت من ماما من وانا صغيرة و كنت بحلم أكون أم واتحرمت منها كمان مكنش عندي غيرك
حازم : انتي كده هتصعبي عليا يعني عشان كده علي طول غيرانه من نورا
خديجه: ااه هي خدامه ولقيت واحد زي أسر متعلم و مركز وحب و خلفت بسرعه كمان
حازم بإستغراب: انتي ازاي وحشة اوي كده وازاي مشوفتش فيكي كل السواد ده يا خديجه
خديجه بصوت عالي وعياط: ايه زعلت عشان الهانم ولا ايه
حازم خد نفس طويل : خديجه انا نازل دلوقتي وياريت لما ارجع بليل تكوني مشيتي
اتجمدت خديجه مكانها مش مصدقه وهو خد مفاتيحه ونزل بالترنج مستحملش وجوده معاها لمجرد أنه يغير
في بيت أسر ونورا كان اسر قاعد بيلاعب إبنه و نورا بتعمل الغدا اتصل أسر ب أبوه
اسر: سلام عليكم
محمود: عليكم السلام ازيك يا أسر
أسر ضحك: أسر ايه بقى انت نسيتنا خالص أهو
محمود: لا يا ابني وانا اقدر ده حازم واحشني اوي
اسر: انا هبدأ اغير أهو مبقتش تقول غير حازم ونستني
محمود : اتلهي واسكت عامل ايه مع مراتك
أسر ابتسم: كويسين الحمد لله
محمود : سلملي عليها
اسر: الله يسلمك هترجع أمتي؟ !
محمود: بعد بكره أن شاء الله
اسر: ترجع بالسلامه
قفل أسر مع أبوه وكانت نورا خلصت شغلها ودخلت تاخد دش وخرجت عشان تحضر الأكل الجرس رن
نورا: مين يا أسر
اسر: مش عارف ادخلي جوه هشوف
فتح أسر الباب وشاف حازم قدامه فرح جدا وحضنه
اسر: ايه يا عم ليك واحشه الجواز خدك كده
حازم ابتسم بسخريه: اه اوي مش شايف ؟!
بص اسر عليه وشافه بالترنج
أسر بإستغراب: ايه ده
حازم : هتدخلني ولا
أسر : اه يا عم ادخل اقعد
دخل حازم وشاف حازم الصغير نايم علي كنبه الانتريه بيلعب وبيضحك
حازم ابتسمله: قمور اوي ينفع اشيله
أسر ضحك : انت مالك بقيت محترم وبتستأذن كتير ليه
حازم ضحك : طول عمري
أسر : يا حبيبي خدوه ليك خالص بزنه و عياطه انا هدخل لنورا
دخل أسر لنورا وساب حازم شال ابنه
حازم بصله وابتسم : قد ايه انت جميل وان شاء الله ربنا يرزقني بقمر زيك
