وعد بالقسوة

جزء ٣٣

الفصل الاخير

ريم: لما شفت سامح قدامي وهو واقف مع جميله...قربت منها ومسكت ايديها جامد كاني كنت خايفه انه ياخدها مني ومقدرتش اقول غير....ازيك ياسامح....
كان بيبصلي بذهول لكن عيونه كانت بتقول مليون حكايه وقصه....وقبل مايتكلم باسم اخد باله وقرب مننا بسرعه وقال...سامح...انت...
وبصلي بدون مايكمل....فقال سامح..انتي كل ده مع باسم وايه اللي جرالك...انتي تعبانه....
سكت لكن باسم بصلي وقالي...ريم افتكر ان سامح من حقه تقعدي معاه شويه.....
مشيت مع سامح لحد طرابيزة في اخر المكان هاديه وبعيده عن الأنظار...وقعدنا...بص سامح ل جميله وقال...هي دي بنتي؟؟!
رديت...ايوه بنتك...
حسيت كأن سامح هيبكي لكن مسك نفسه وقال..انتي مشيتي ليه...سيبتيني ليه ياريم...
قلت...معرفتش اسامح ولا انسى واللي تاعبني اكتر اني حبيتك...ممكن لو مكنتش حبيتك كنت عرفت اعيش معاك....لكن لما حبيتك معرفتش اسامحك...
رد...بس الحب المفروض كان يخليكي تسامحيني...الحب معجزة....تخليكي تنسي اي حاجه...
سكت كانت حجتي قويه قدام نفسي لكن قدام سامح مكنتش قادرة ادافع عنها.....
بصلي سامح وحط ايده على ايدي وقال....انا محتاج اتكلم معاكي بعيد عن هنا....
رديت...الكلام مبقاش هيجيب نتيجه ياسامح خلاص ايامي في الدنيا بقيت معدوده خلاص....
قال بأستغراب...متقوليش كده...انتي فيكي حاجه..لأ ارجوكي متقوليش كده....
سكت شويه وقلت...سامح انا عندي سرطان والأمل ضعيف....
فتح سامح بقه لكن مكنش قادر يتكلم وفجاه صرخ لدرجه ان الناس كلها في المكان بصتلنا وقال...سرطان...لأ انتي بتضحكي عليا...عاوزه تسيبيني تاني...
رديت بمراره...مع الأسف المره دي هسيبك غصب عني...
كان شكل سامح مش مستوعب لقيت باسم جاي علينا وقال ل سامح ...افتكر اننا ممكن نروح مكان تاني نتكلم فيه....
بصله سامح وكان كأنه مغيب وقال...باسم انت انسان محترم قولي ارجوك هي فعلا عندها سرطان...
رد باسم بحزن...مع الأسف ياسامح ....
قام سامح وقف ومسك ايدي وقال...خلاص انا مش هسيبها هتتعالج...انا هروح لأكبر الدكاترة لازم تتعالج....اكيد في امل....
وقبل مايكمل كلامه سمعت صوت حقير عمري ماتوقعت انها تظهر في حياتي دلوقت...بتقول...الله الله ده الحبايب متجمعين وانا معرفش...كانت رشا....
بصتلها بذهول وكان سامح مخضوض لكن قال...مش وقتك يا رشا ارجوكي سيبينا في حالنا دلوقت...
ضحكت وقالت...ولما هو مش وقتي اتفقت معايا نتقابل هنا ليه ونسافر نقضي يومين حلوين على رأيك....
لقيت سامح ميل على جميله وشالها ومسك ايدي اليمين بقوه وقال....رشا انا معايا مراتي وبنتي دلوقت ومش عاوز حاجه من الدنيا غيرهم...
وشدني عشان نمشي لكن رشا كان مرسوم على وشها بصه شر كنت حاسه ان ده مش اخر دور ليها في حياتي....
..................

سامح....يوم مالقيت ريم مكنش عندي ادني استعداد اخسرها تاني كنت ماسك ايديها خايف تهرب مني تاني...اما بنتي جميله كنت حاضنها ومش راضي انزلها...كاني انا اللي كنت تايه وروحت لحضن حبيبتي وبنتي.....
خرجنا بره الاستراحه لقيت ريم بتقولي...انت رجعت ل رشا ....
قبل ما ارد لقيت باسم بيقول...خلاص ياريم العمر مبقاش فيه وقت للعتاب...
وقالي...سامح ...هات جميله ...خد ريم واتكلمو واتفاهمو...كان لازم ده يحصل من زمان....
حضنت جميله وبصتها وقلتلها...حبيبتي الجميله خلاص عمرنا ماهنبعد عن بعض تاني..هتفضلي طول عمرك في حضني...
مكنتش عاوز اسيبها لكن كنت عاوز اتكلم مع ريم ....ناولتها ل باسم...ومسكت ايد ريم وروحت بيها عربيتي وحكتلي كل حاجه....
مكنتش قادر امسك دموعي وانا بسمع حكايه ريم بعد ماسابتني...يالله قد ايه اتعذبت...حتى وهي بعيد عني كانت بتتعذب...كان وجودي في حياتها كان نحس عليها واتكتب عليها تتعذب من يوم مادخلت حياتها...
سكتت ريم بعد ماحكتلي كل حاجه وكملت...انا كتير كنت بفكر اكلمك لكن مكنتش عاوزه اعذبك معايا احنا الاتنين اذينا بعض كتير عشان كده كنت مقررة اني امشي بهدوء وكان باسم هيكلمك يوم ما..
قاطعتها بسرعه...متقوليهاش اكيد في حل....
اخدتها في حضني وكملت..انا واثق ان في حل...ارجوكي تسامحيني وتسامحي كل حاجه هو ده الحل...
ومسحت دموعها وقلت...انتي وجميله هتيجو معايا هنبتدي تاني من جديد هنشوف احسن دكتور في الدنيا واكيد في أمل...
وفعلا بعد خمس ساعات كانت ريم قاعده جنبي في العربيه وشايله جميله على رجلها متوجهين احنا التلاته لحياه وبدايه جديده...لكن. مكنتش ااعرف ان رشا لسه متمسكه بالقديم وناويه على غدر...
......................

ريم: بقالي اسبوع عايشه مع سامح...في الاول مكنش متقبل فكرة اني مريضه وبموت كان فاكر اني بضحك عليه...لكن لما شافني لما بتعب او مبقدرش اشرب شويه ميه الا واتقيئ ابتدى يستوعب ويفهم مرضي...سامح محاولش يضغط عليا في اي حاجه ولا طلب مني اي حاجه غير اني اكون جنبه وبس...كان بيخاف ينزل ل يرجع ميالاقنيش وامشي تاني...لكني في يوم اقنعته بالنزول ل شغله وقلتله...سامح انا خلاص تعبت ومش هروح اي حته...انا خلاص مش مستعده اموت الا في حضنك...
يومها زعل وقالي...هتفضلي في حضني لكن مش هتموتي...
عدت الأيام وكنت فرحانه لما بشوف سامح مع جميله...حبه ليها وحبها ليه كان كبير...
كان يوم سبت...كان سامح وراه اجتماع مهم...نزل من الصبح بدري...وديت جميله الحضانه...وانا راجعه في سكتي قررت اتمشى كانت الحضانه قريبه من البيت...
كنت بعدي شارع وفجأه وقفت قدامي عربيه...وقبل ما احس بأي حاجه كان حد رش حاجه في وشي..واغمى عليا.....
فتحت عيوني كنت في مكان شبه معتم وكنت سامعه صوت زي صوت قطر ماشي على قضبان حديد..لفيت بعيوني ولقيت رشا قدامي بتبتسم بوقاحه...
صرخت فيها...رشا...
ضحكت وقالت...طبعا رشا كنت فكراني هسيبك...بجد ياريم ليه مصره تاخدي مني سامح كل ما بلاقيه ..
رديت عليها...انتي مش قادرة تفهمي لحد دلوقت انه مابيحبكيش...
قاطعتني...حتى لو مبيحبنيش انا عاوزا وانتي دورك خلص خلاص وهو خد فلوسك سيبهولي بقى...
رديت بسخريه....مفيش فايده عمرك ماهتتغيري خلاص سيبه وعيشي حياتك خلي عندك كرامه...
قامت وقفت وقالت...انا فعلا هعمل لنفسي كرامه النهارده هيكون اخر يوم في عمرك وعمر سامح لومكنش سامح ليا مش هيكون لأي واحده غيري...
............

سامح:كنت قاعد في الأجتماع وفي رقم غريب عمال يتصل بيا بألحاح شديد مكنتش عارف ارد...في العاده ارقام كتير بتكلمني لكن مش بالألحاح ده...بعد الأجتماع لقيت رساله من نفس الرقم مكتوب فيها....
ريم حبيبتك معايا والنهارده اخر يوم في عمرها وعمرك...
في البدايه مستوعبتش...حاولت اتصل بالرقم لكنه كان مغلق...جه في بالي رشا اتصلت بيها...مردتش...اتصلت تاني...ردت اول ماسمعت صوتي ضحكت بشماته وقالت...ياه هو لازم تكون ريم معايا عشان تتصل بيا....رديت بغضب شديد...انتي ايه اللي بتقوليه ده...ريم معاكي...
ردت بسرعه ...ايوه معايا انا حذرتك من غضبي..من اربع سنين وعدتك ان نهايتكم هتكون على ايدي...
زعقت فيها...رشا اياكي تلمسي ريم انتي فهماني هيكون اخر يوم في عمرك انتي...فاهمه...
سكتت شويه وضحكت وقالت...خلاص يبقى نعمل مبادله انت في مقابل ريم تعال مكانها وانا هسبها تمشي ومش هلمسها...وملتني عنوان المكان وكملت...اي حركة غدر ياسامح هيكون مقابلها حياة ريم..انا حذرتك...
قفلت بدون ما ارد...مكنتش عارف اتصرف ازاي كلمت عمرو وفهمت منه ان في حضانه جميله كلموه وراح اخدها وانه راح البيت عندي ملقاش ريم فاخد جميله عنده...حكيتله اللي حصل مع رشا...قام قالي..خلاص انا هبلغ البوليس وجيلك حالا...قلتله..متسبيش جميله...قام رد بسرعه...جميله هسيبها مع داده المهم نلحق ريم...
رشا كانت خاطفه ريم في مخزن بتاع شركة ابوها قريب من السكة الحديد...كان الجو ابتدى يمطر كأن الشتاء اعلن عن غضبه معايا وقلقه على ريم..وصلت وكان الظلام حل على المكان...نزلت اجري من العربيه وعند باب المخزن لقيت واحد من رجالة رشا...اول ماشافني قال...مدام رشا مستنياك جوه...واصر يفتشني وقفت غصب عني كنت خايف اعمل اي تصرف ممكن يأذي ريم...بصيت حواليا مكنش عمرو موجود ولا البوليس....
دخلت المخزن وعيوني بتدور على ريم لكن ملقتاش كانت رشا بس اللي موجودة وقاعده على كرسي..قلتها...ريم فيين...
ردت ببرود...موجوده وعشان انت شاطر انقذت حياتها...سألتها...وهي فين اشوفها الأول...قامت رشا من مكانها وقالت...هنروح سوا واول مانوصل بيتي هتكلمك تطمنك على نفسها...
صرخت فيها...انا لازم اشوف ريم قبل ما امشي مضمنكيش...
قربت مني رشا وحطيت ايديها على كتفي وقالت بنعومه ...موحه دنا حبيبتك كده تجرحني وتقول مش مصدقني....
زقيت ايديها بغضب وقلت...انتي اخر واحده ممكن أأمن لها فين ريم....
اتعصبت وصرخت فيا...ريم ريم ريم...خلاص زهقت منك ومن ريم...
وولعت سيجاره واخدت منها نفس قوي ونفثته وقالت...ريم مرميه على قضبان القطر واول قطر هيعدي هيأخد روحها زي ما أخدتك مني واخدت روحي...
زعقت فيها انتي مجنونه...ردت بسرعه...تقدر تروح تتأكد...مسكتها من كتفها وهزيتها جامد وزعقت...انتي مجنونه مريضه...ريم بتموت...وانتي مستعجله على موتها...دي مريضه...
وضربتها على وشها وكملت ...انتي اللي النهارده اخر يوم في عمرك...
ومسكتها من شعرها وكملت...هي فين ...فين ريم ...قولي...
قبل ماترد كان البوليس وعمرو داخلين من باب المخزن....اول ماعمرو شافني قال...فين ريم ياسامح...رديت وانا بجري طالع بره...المجنونه بتقول انها مرميه على قضبان القطر ...
طلعت اجري ناحيه السكه الحديد.....
كنت بجري زي المجنون.....مكنتش عارف هي راحت فين....بس كنت عارف اني أتأخرت عليها....ضيعتها بغروري وطغياني وظلمي ليها...ايوه فقت وحسيت بقيمتها بس متأخر قوي...حسيت بحبها وعرفت اني بحبها بس متأخر قوي....بس هي خلاص بتروح من بين ايديا...هخسرها للأبد وهكون انا السبب...ببص حواليا....الدنيا ظلمه والجو مطره مش شايف حاجه حواليا..نفسي كان متقطع من الجري...وقفت بنهج وببص حواليا...عنيا بتدور عليها في كل ركن في الشارع ....لمع نور البرق لثواني من حواليا بس في خلال الثواني دي وعلى ضوء البرق شفتها ومكانتش بتتحرك....

جريت عليها وكنت سامع عمرو ورايا بيصرخ...مسكت ابديها ومحستش في جسمها بأي نبض....
...............

ريم: فتحت عيوني وكنت في المستشفى وسامح كان واقف جنبي وماسك ايدي...مكنتش قادرة اصدق اني لسه عايشه....مديت ايدي التانيه وحطيتها على ايده...مكنتش قادرة اتكلم لكنه بصلي وابتسم...كان شكله متبهدل قوي وقالي..انتي كويسه متقلقيش...رفعت ايدي وقلت بضعف شديد...جميله...
قال بسرعه...جميله مع عمرو متقلقيش...حاسه بأيه احسن دلوقت...
ابتسمت وقلت...جسمي مكسر ومش حاسه باي حاجه بس بدام جميله وانت بخير يبقى هكون بخير...
حط ايده على راسي وقال...انا مش عاوزك تقلقي تاني ولاتشيلي اي هم انسي الماضي بهمومه والمه...مبقاش في اي حاجه ممكن تعذبنا تاني...
قلت بحزن...ياريت الزمن يرجع بيا انا خلاص بموت...
مسك سامح ايدي وباسها وقال...متقوليش كده خلي عندك امل زيي وأيمان بربنا...اوعدك كل لحظه جايه هيكون كلها أمل وتفاؤل وهتكون اسعد لحظات حياتنا مع بنتنا جميله...
ابتسمت في أمل مكنتش عارفه اذا كنت هخف او هموت لكن وعد سامح ليا الجديد كان مخليني في قمه السعاده وعد بالأمل....

تمت