واخيرا حبينا بعض

البارت 7

(البااارت السابع)

في الجامعه (الساعه 7 ونص الصبح)
حمد كان مستعيل ويمشي بسرعه يخاف انه الدكتور دخل الساكشن قبله وبدا المحاضرة وهو شبه يركض صعق إلي جدامه وكانت خلود
حمد وهو مستعيل: آه سوري
خلود وهي تتميع: لالا عادي إلى شخبـ..
ماكملت لانه حمد تركها ومشى بسرعه ودخل الساكشن ماله وطنشها وهي هني عصبت : ما ادري على شنو مصدق روحه هين اراويك عيل انا تهدني وتمشي ولا وتحقرني ولا كأني اكلمك اراويك
--------------------------------------------------------------
في بيت أبو زياد (الساعه3 العصر)
في الصاله كان زياد قاعد يطالع التلفزيون لكن الحقيقه انه كان سرحان في عالم ثاني قطع عليه تفكيره صوت اخته منيره: زيووود ويعييه اكلمك انا اشفيك
زياد وهو يتعدل في جلسته: افففف نعم خير اشتبين
منيره وهي ترمش هدب عيونها بسرعه: ابيك اليوم توديني بيت رفيجتي
زياد وهو يتهفهف: اففف ومن ذي بعد لا يكون الطويله المعصقله ولا ذيج الدبه السوده ولا ام الكشه والكرش
منيره وهي تضحك على تعليقات اخوه: ههههههههه لالا ولا وحده منهم هههههههه والله عليك تعليقات ههههههههه بصراحه تحـــفه ههههههههه
زياد: ههه طيب اذا ولا وحده عيل منو انا خبري هذيله ربعج
منيره: لالا هذي الله يسلمك غييير مميزه الي الله يسلمك يات لي امس
زياد على طول طالع منيره ويحس انه فرحان ما يدري ليش بس يحس بشي يجذبه للبنت : الي شعرها قصير وعيونها سودة وحلوه
منيره وهي تطالعه من فوق لي تحت: اوه اوه بعد تتذكر لون عيونها والله منتي بهينه يا مي
زياد بدون شعور: حتى اسمها حلو
منيره ماقدرت تمسك ضحكتها: هههههههههه واي بطني ههههههههههههههههههههههههههههههههههه
--------------------------------------------------------------
في بيت أبو سعد (نفس الوقت)
كانوا يجهزون روحهم علشان بروحون يخطبون رغد حق سعد اليوم وسعد الدنيا مو سايعته من الوناسه وكان اول واحد يتجهز فيهم وكل دقيقه يصرخ: يلاااااااا تأخرناا حشى شتسووون يلاااااا
اأبو سعد وهو يهز راسه: اركد يا ولد ليش مستعيل على رزقك ترى مو زين الحنة
ام سعد وهي تنزل من الدري: هههه خله منك الولد ملحوس مخه خلااص لا تاخذ منه لا حق ولا باطل
سلطان وهو ينزل ورى امه: هههههه يلا انا خلصت
وراحوا الكل وركبوا السياره وكان أبو سعد هو الي يسوق وفي الطريج ام سعد: اقول سالم (أبو سعد هو اسمه سالم) مر على هيام قالت تبي تروح معانا
سعد: يما مو لازم ترى تأخرنا والله
ام سعد: هههه لالا توه الناس اشفيك انت اصلا هم راح يستغربون منا لانه رحنا لهم من وقت بيقولون هذا ما صدقوا على الله يزوجون ولدهم
سكت سعد وما علق ومر أبو سعد بيت أبو مشاري وخذوا هيام معاهم
--------------------------------------------------------------
في بيت أبو مصعب (الساعه 4 العصر)
في غرفه مصعب كان مصعب توه مخلص الصلاه العصر لانه كان نايم وفاتته وقعد يقرأ قرآن كم صفحه وبعدين طلع من غرفته ونزل للصاله وهو للحين على الدرج سمع امه تكلم مرام أخته
ام مصعب: والله ودي أشوف أعياله بس اخوج عنيد وما يبي يبرد قلبي وأنا أشوفه معرس وإلا أشوف عياله
مرام وهي تتنهد: الله يهديه بس أنا إلي مستغربه منه ليش اهو رافض فكره الزواج ودوم يتهرب يعني بصراحه يما انا بديت اشك فيه يعني غريبه انه واحد كبر اخوي ما يبي يتزوج ولا المشكله هو متدين يعني يعرف انه الزواج نص الدين
ام مصعب: بصراحه ولا اكذب عليج حتى انا بديت اشك ما ادري ليش بس شي غريب كل ما يبت طاري الزواج يتهرب
عكس قبل لايسافر ويروح يزور صديقه الي يتعالج برا كان دوم
اذا ايب طاري الزواج يبتسم ويقول ان شاء الله جريب
آآآآه يا حسرت شبابه بس مضيعه في العزوبيه اكوه سعد الي اصغر منه ان شاء الله بيخطب اليوم وبيتزوج وولد جارنا أبو صلاح هم ولده اصغر من اخوج متزوج وعنده ضنه واخوج يا حسرتي عليه بس
مصعب الي كان واقف في مكانه ويسمعهم حس بالحزن لانه هو ما يدري شنو يسوي يتزوج ويسعد امه واهله ويعذب نفسه وينقض بوعده لحبيبته او يريح نفسه ويوفي بوعده ويخلي امه تتحسر عليه وعلى شبابه هو بين نارين نار حبيبته الي طول الوقت في باله ونار امه الي يطلب رضاها وبين افكاره سمع تلفون البيت يدق وردت امه: الو ..هلا والله هلا بأم سعد ...تمام
الحمد لله انتي شخباج ... الحمد لله العيال تمام ... خير .. لالا مبروووك وان شاء الله تشوفين عياله وعقبال ولدج سلطان بعد...هههه تسلمين...آآآآآمين الله يسمع منج يا رب ... هههه ان شاء الله .. يلا مع السلامه
سكرت ام مصعب التلفون وتنهدت بقوه: آآآآه
مرام وهي مستغربه: يما شفيج
ام مصعب: خليها على الله .. المهم ام سعد توها تكلمني وتقول انه سعد خطب البنت وبعد اسبوعين الملجه وداقه علشان تبشرنا وتعزمنا على ملجه ولدها سعد يوم الخميس
مصعب الي تضايق ورد ركب الدرج وراح غرفته
و
مرام الي استانست من قلب: يااااي واخيرا في عرس ههه.. الا يما شلون وافقوا عليه بهالسرعه
ام مصعب وهي تهز كتوفها: والله ما ادري بس الي اعرفه انه ام سعد قالت لي آخر مره انه هالبنت تصير اخت رفيجه ويمكن لانهم يعرفونهم والبنت تبيه فوافقت
-------------------------------------------------------------
في بيت اأبو مي (في نفس الوقت)
كانت مي قاعده تطالع التلفزيون في الصاله واأبوها توه راجع من الشغل اول ما شافها كشر: السلام عليكم
مي:.....
أبو مي :اقوووول السلام عليكم
مي بدون ما تطالعه وتتصنع البرود وعدم المبالاه: وعليكم السلام
أبو مي ما يحب هالاسلوب وعصب على ردها البارد له
وتجاهلها وعلى طول راح لها ويودها من شعرها وقال بغضب: انتي سمعيني عااااااد موو كل مررره ارد واعييييد سااااامعه قلت لج هدي هالاسلوووب عنج ودزها على الكرسي مره ثانيه وطلع وراح حجرته اما مي فكانت تحس بالحزن على حالها عايشه بلا ام ولا اب على انه عايش لكن عمرها ما حست بحنانه نزلت منها دمعه كسيره حزينه على خدها وعلى طول مسحتها وقامت ووقفت وهي تقول في نفسها "لا انا ما راح اصيح انا قويه ومحد يقدر يكسرني انا مو محتاجه له ولا لغيره" وراحت حجرتها
(أبو مي كان انسان حنون قبل لاتموت زوجته لكن بعد موتها كره كل شي وصار قاسي وخصوصا على مي لانه دايما يقول انها هي السبب في موت امها ودوم يتهاوش معاها ويضربها ويقسي عليها ولا يسأل عنها بعض الاحيان ما يجوف ويها اشهور ولا هو مفتكر بالعكس كل ما تطلع من البيت يقول روحه بلا رده)
--------------------------------------------------------------
في بيت أبو سعد ( الساعه 6 المغرب)
سعد الدنيا مو سايعته من الوناسه الي هو عايش فيها يحس انه ملك كل شي في الدنيا ومزعج امه واأبوه كل ساعه يقول لهم: يما والله اسبوعين وايد يبا (ويلف على اأبوه) انا قلت لك قول لهم يوم الخميس هذا مو الي بعده
أبو سعد وهو يهز راسه ويضحك على ولده: ههههههههه ياأبوك شفيك مستعيل بكره ان شاء الله بتتزوج مو زين الحنة وبعدين اسبوعين ترى ما تكفي علشان البنت تجهز حالها احمد ربك انهم رضوا انه الملجه تصير بعد اسبوعين
--------------------------------------------------------------
في سياره زياد ( في نفس الوقت)
كان موقف زياد سيارته يم بيت أبو مي موصل اخته منيره
منيره: اففففف ياربي شلون الحين ادق عليها
زياد لف لها: شفيج شسالفه
منيره:ابي ادق عليها علشان تيي تفتح لي الباب بس ما عندي رصيد نسيت اشحن
زياد وهو يعطيها تلفونه: مو مشكله دقي عليها من تلفوني
منيره خذت تلفون اخوها ودقت على مي وبعد ما ذبحت تلفون مي من كثر ما يرن ردت: الو
منيره وهي معصبه: وينج انتي ليش ما تردين هااا
مي وهي تبعد التلفون من اذونها: ويعيييه ان شاء الله ترى اسمعج وبعدين انا ما ارد على ارقام غريبه
منيره: انزين المهم انا عند الباب تعالي فتحيه يا مال الاضعفه
مي: جــــب لا تغلطين باي
سكرت مي من منيره وراحت وعدلت نفسها بشكل سريع ومهمل وطلعت برى علشان تفتح الباب ويوم فتحته جافت رفيجتها طالعه من السياره سوده موديل 2008 همر جيب
مي وهي تسلم على رفيجتها وتبتسم لها: هلا والله بالكريها منور
منيره: كريها بعينج وحلوه بعين الناس "تحرك حواجبها"
مي وهي تسكر الباب وتضحك وقبل لا تسكره كله جافت اخو منيره للحين موقف سيارته وفاتح الدريشه الي مجابلتها ويبتسم لها هني مي تذكرت الموقف الي صار لها وابتسمت لزياد بطريقه تضحك وسكرت الباب اما عند زياد فما قدر يمسك ضحكته على حركة مي لانها بجد تضحك وبعدين حرك سيارته وهو يقول في نفسه "والله انها حلوه واحس انها مرحه وايد بس في شي يخرب عليها لبسها وحركاتها احس انها تتصنع الدفاشه وكأنها تقلد ولد"
--------------------------------------------------------------
بعد ما مر اسأبوع ما صارت احداث تذكر عن ابطال القصه غير انه سعد مستانس حده ويتمنى تعدي الايام بسرعه علشان يملج على حبيبته رغد و حمد الي كل يوم تتلصق خلود فيه وهو مطنشها وجاسم كل يوم يقول انه بيعترف حق ساره ووقت ما تصير عنده فرصه يتراجع ليش ما يدري والبنات كل يوم يروحون السوق الي يشوفهم يقول انهم هم العروس وهيام ومشاري عايشين بسعاده مثل عصافير الحب على قولت هنادي ومي كل يوم يمر عليها
مع اأبوها تحس بالحزن والكآبه لدرجه انها خايفه لا تنهار من كتمانها للحزن حتى مع نفسها واأبوها الي طلع بشغله جديده وماعد يرجع للبيت الى في نص الليل وسلطان الي تعرف على وحده في السوق وصار دوم يكلمها ويطلع معاها وزياد الي قرر انه يرسل اوراقه للجامعه الي في بريطانيا لانه ناوي يخلص دراسته هناك لمده 4 سنوات
ومصعب الي خذاله فتره طويله وهو يفكر بسالفه الزواج وبعد تفكير قرر انه يتزوج علشان يفرح امه وبعد اسبوع قال حق امه انه يبي يتزوج وامه استانست وااايد وقالت له راح ادور لك على وحده تناسبك وبعد يوم قالت ام مصعب حق مرام علشان تساعدها انها تحصل وحده حلوه واخلاق
--------------------------------------------------------------
في بيت أبو مصعب (الساعه 2 الظهر يوم الخميس)
في الصاله .. مرام: اهااا يعني تبين وحده حلوه ومؤدبه ومتدينه و ماتحب العقره مثل خيوه وما تأخر صلاتها هم مثل خيوه و طيبه وتنحب بسرعه وتسمع الكلام لانه خيوه ما يحب احد يعانده
ام مصعب: اي والله يبيله وحده جذي بس ما اعتقد انه بنحصل وحده فيها كل هالمواصفات الزينه
مرام باصرار: إلا بنحصل
ام مصعب وهي تعدل جلستها: من ؟؟
مرام: امممممم هنادي هي الي تناسب اخوي مصعب
ام مصعب: اي بس هي وااايد صغيره عليه
مرام: يـــــــما بس ماراح نحصل له وحده احسن منها وبعدين الجريب اولى من البعيد وهي تناسب اخوي وايد وانتي تعرفينها زين
ام مصعب: اي والله ما في احسن منها كامله والكمال لله وانا اليوم بقول حق اخوج واشوف رايه
مرام على طول: لالا يــــما
ام مصعب وهي مستغربه: لـــيش !!!!
مرام: يما انتي تدرين انه مصعب بيقول انها صغيره عليه وايد وما يبيها
ام مصعب: انزين والحل يعني لايكون تبيني ازوجه وهو ما يدري
مرام: ههه لالا يـما مو جذي قصدي بس قبل لا تقولين له خليه يشوفها ادري انج بتقولين انه احنا عايشين في البحرين مو في السعوديه انه البنات متنقبات لا بس انتي تعرفين انه مصعب من يلمح بنت جدامه على طول يقض النظر خبرج الاخ واايد متدين وعلشان جذي فاكيد هو بيرفض بسبب صغر سنها بالنسبه له بس لو هو طالعها حلوه وسمع عنها كل الزين بالاول وبعدين تقولين له انج تبين تخطبينها بجذي اكيد راح يوافق من دون ما يفكر بعمرها
ام مصعب الي فعلا عجبها كلام بنتها و اقنعها:
اي والله وانتي الصاجه بس شلون نخليه يشوفها وبعدين انتي تعرفين هنادي خجوله وايد شلون بتقبل تكون معاه في نفس المكان
مرام وهي تبتسم بخث: انا اقول لج سمعي ...........
--------------------------------------------------------------

شنو خطه مرام؟؟ وشنو راح تكون ردت فعل مصعب؟؟

شنو نهايه مي من كتمان احزانها؟؟؟ وهل راح تقدر تخلي اأبوها يحن قلبه؟؟؟

شنو موقع زياد في حياة مي ؟؟ هل راح يكون له دور؟؟؟

هل سعد ورغد راح يتزوجون وله راح يصير شي ويمنع؟؟؟

خلود شنو تبي من حمد بضبط؟؟

كل هذا راح نعرفه في البارت القادم ودمتم في صحه وعافيه :)