نوفيلا عشت معاه حكايات * مكتملة *

١١'١٢

الفصل الحادى عشر

الحب الحقيقي ‘‘ موقف تعمله تبين فيه انك فعلا جدير انك تتحب و جدير انك تبقي حبيب ‘‘

اجتمعوا جميعا علي الغداء في منزل رؤوف و خرجت الثلاث بنات يضحكن سويا مما زاد فرح رؤوف واستقبلهم بحبور قائلا

رؤوف : اهلا اهلا اهلا برياحين الجنة الي منورين البيت ‘‘ ربنا يسعدكم يا بناتي و يألف قلوبكم علي بعض و تفضلوا مع بعض طول العمر ‘‘ ياااه يا هدير يا بنتي لو كان عندي ابن تاني كنت جوزتك ليه ‘‘ بس عندي خالد بس ..

قاطعته هند ضاحكة

هند : ومحجوز يا ديرو للأسف ‘‘ للست حلا صاحبة هدي اكيد هيجي يوم وتشوفيها ‘‘ هي اي نعم مكلكعة حبيتين زي اختنا هدي كده ‘‘ بس يلا ربنا يكون في عون خالد بقي ..

ضربتها هدي علي رأسها قائلة

هدي : مفيش فايدة فيكي انتي ايه لسانك ده ملوش غطا ‘‘ يا بنتي اعقلي

ضحك رؤوف وحياة ودعوا لهم بالسعادة

بدأوا في تناول الطعام ‘‘ وبلا وعي من هدير كانت تصدر صوت يدل علي استمتاعها بالطعام

مما جعلهم ينتبهون لها ‘‘ لتنظر اليهم وتشعر بالخجل وتتوجه بنظرها الي حياة

هدير : بصراحة يا طنط حياة اكلك طعم اوي اوي بجد ‘‘ انا مع كل معلقة بحس بمزيكا ‘‘ بجد تسلم ايدك ‘‘ وانت يا عمو رؤوف حقيقي انا حبيتك جدا وشكرا انك مخلطش بيني وبين اني بنت خليل شرف الراجل الي سبب لك كل المشاكل ‘‘ و تركت الطعام ونظرت للأرض في خجل

مد رؤوف يده اليها ورفع وجهها بحنان كبير وعطف فمنذ ان رآها وهو يشعر انها بنته الثالثة لا صديقة هند ‘‘ فهي تتمتع ببراءة و طفولة الهية تجعل كل من يراها يحبها .. ابتسم لها قائلا

رؤوف : اسمعيني يا بنتي كويس ‘‘ مش معني ان ابوكي اذاني و مش هيبطل انه ياذيني الا لما يقرر انه يتوب بجد ‘‘ ده معناه انه راجل وحش ‘‘ بالعكس يا بنتي ابوكي حنين حنية الدنيا والاخرة ‘‘ بس هي جدتك دلعته اوي اوي زيادة عن اللزوم لانه الولد علي اربع بنات زي ماانتي عارفة ‘‘ اقولك حاجة احنا هنتفق اننا نغير ابوكي كلنا سوا لازم نرجعه لينا تاني خليل شرف ابن الحج شرف تاجر الاخشاب والموبيليا الي الناس كلها بتحلف بحياته ‘‘ وهنبدأ من اني احكيلك عن حياة ابوكي الحلوة وصفاته الحلوة يمكن يابنتي ربنا يقدرنا اننا نغيره ‘‘ ده هيبقي افضل من اني احكي لك عن الوحش بتاعه ‘‘ كفاية عليكي الي انتي شيفاه من تصرفاته دلوقت

فرت دمعة من عين هدير ودون اي مقدمات قامت واحتضنت رؤوف وهي تبكي و تمتم

هدير بصوت ممزوج بالبكاء :
بجد حضرتك اعظم اب وعمو في الدنيا كلها ‘‘ مهما حاولت اشكرك او اعبر لك اد ايه انت فرحتني بكلامك ده مش هتصدقني بجد شكرا لحضرتك يا عمو ..