#قلبي_شاريك❤
بقلم زهور جمال الدين 🌷
الحلقة الثالثه عشر
شرين تليفون حسين مرة ثانية
لقاه صاحبه ناجى يتصل ..
-حسين: خلى القهوة توة وجيبى الغدى للصاله .. الصغار جاعو نرد عليه ونجيكم
وطلع للجنان من باب المطبخ وقعد يرد على صاحبه
وهيا وتت الصحون .. جايبين غداهم دجاج محمر وبطاطا مقلية ومشروبات وحاجات معاهم من برة
بعد ما وتت السفرة لمت حنان شعرها بشدادة وقامت السفرة وطلعت مشت للصاله
-حنان : هيا تعالو تغدو
-رياض : وين التشيبس متعاى
-حنان: مش توة .. توة غدى وبعتالى ساهل
حنان واقفه وتنادى فيهم جى حسين وقف جنبها وقام يده وحول الشدادة من شعرها
طاح شعرها ..
-حسين:هكى احلى
-قامت صبعها السبابه واشرت بيه فى وجهه : هات التوكه خيرلك 😏
-قرب فمه بينتش صبعها : انا ندير اللى يعجينى 😁😁😁
وقعمزو عالطاوله بدت تعطى لصغارها وتوكل فى امولا ..
-حسين: كولى انتى
-حنان: نوكل صغارى قبل
-رياض: اول مرة ندوقها الدجاجه المحمرة يا بابا
-حسين: كيف
-احمد: حتى انا اول مرة
-حسين مستغرب: بالك ماما مانعتكم من اكل الشارع
حنان وجعوها صغارها .. تى هوا من بيجيبهولها اكل الشارع بيش تمنعهم عليه بالله
"يانارى صغارها قلبو عليها المواجع" 😁😁😁
المهم ماعلينا توة
تغدو ورقدو الصغار القايلة .. وحسين رقد .. وهيا قعدت اضم وتحوس فالحوش
العشيه ناض حسين دارتله قهوة .. وطلع مشى لخوه سعد بيحكيله ع الانتقاله متع خدمته
__________________
صلى حسين المغرب مع خوته
وكلم حنان بالتليفون
-حنان: الو
-حسين : انا طالع شوى تبو حاجه للحوش
-حنان: لا ماناقص شى
-حسين: باهى تو نروح
-حنان: باهى
-حسين: شن منقولك .. بتراجينى ولا بترقدى
-حنان سكتت شوى وبعتالى ردت :الحق منرقد
-حسين: مش مشكلة معناها تو انوضك انا لما نروح😁😁😁😁😁😁😁
-حنان: اما انت....😁😁😁😁
طلع حسين بالسيارة وروح عشرة ونص فالليل
________________
خش للحوش لقاهم راقدين
قعمز عالصالون
فتح تليفونه ..كلمها
-حنان: روحت 😊
-حسين: روحت وجيعان هلبا وملقيتش عشى ..
-حنان : عشاك عالطاولة فالمطبخ
اممممم فشلت السبله 😁😁😁😁
-حسين:و نبي شاهى
-حنان : تلقاه مع العشى
-حسين: باهى نبيك انتى
-حنان: انا رقدت من الساعه 9
-حسين: لكن توة نوضتى خلاص تعالى للمطبخ
-حنان تضحك : حاضر
وسكرت الخط ...
عاودلها .. شرين تليفونها
فتحت الخط : الووو
-حسين: مش تجينى بالحجاب وقعد يضحك 😁😁😁
وسكر الخط
_________
حسين مقعمز عالكرسى ع طاولة الاكل ويتعشى ..
جت حنان لابسه فستان نوم اللى شراته الصبح ... لونه ابيض فيه وردات عالاصفر .. كمامه قصار .. وهوا قصير بس الركبه مغطية
اول ماخشت قعد حسين يشبحلها
-حسين: تعرفى انك حلوة هلبا ..
-حنان:عيونك الحلوات .. وهيا بتموت بالحشمه
قعمزت عالكرسى قدامه وهيا زى البيبي
-حسين: تعرفى انك تبانى اصغر من عمرك
-حنان: والله
-حسين: مايبانش حتى عندك صغار
وهوا يشبحلها وبياكلها بعيونه .. ناض من مكانه قعمز عالكرسى اللى جنبها وتلفت جيهتها
وحركها خلاها تتلفتله
قام ايده اليمين ودخلها فى خصلات شعرها
قعد يلعب بشعرها منغير مايتكلم
خلى صوابعه الاربعه فى الخصلات وصبعه الخامس الابهام قعد يحرك بيه فى فمها
وطلعت منه تنهيدة .. آآآآآآه
خافت هيا
وقفت
-شدها من خصرها : خليك ماتمشيش
-حنان: خلينى نمشى
-حسين: بنلحقك للدار
-حنان: احنا مش هكى متفقين
-حسين: يلعن هاديكه الساعه اللى اتفقنا فيها
-حنان: لكن انت وافقت
-حسين: لكن انتى توة مرتى
-حنان: وحتى يوم اللى اتفقنا كنت مرتك ومع هدا وافقت
-حسين: انتى قوية وهدا اللى عاجبنى فيك
-حنان: خلينى نمشى
-حسين: لكن انا من حقى نرقد معاك فى دارى
-حنان بصوت هادى: وانا منقدرش نمنعك .. بس انت متقدرش تجبرنى انى نكون راضيه عن اى شى انت بديره
-حسين: ليش مترضيش.. انا منعجبكش ولا شنوو
-حنان: ياراجل قلتلك طريقك غير طريقنا وانا منبيش نحمل و ندير منك صغار
-حسين: وشن اللى يمنعك تحملى منى وتجيبيلى صغار .. وبعتالى ياستى من قال تحملى طول
-حنان: انا نوعى نحمل طول ..صغارى طول نحمل بيهم من مرة وحدة
-حسين: كيف مكنتوش ترقدو مع بعض
-حنان: ممكن الثلاث مرات الوحيدات اللى مسنى فيهم هما اللى حملت بيهم
-حسين مدهول: معقولة ولا مرة جى جيهتك
-حنان: لا يجى لكن بطريقه الاغتصاب
-حسين: كيف وانتى ليش تمنعى فيه
-حنان : انا منمنعش فيه لكن هوا ديما مش واعى ونوعه مريض نفسى يحب ياخد كل شى بالقوة
-حسين: وانا مستحيل نمسك وانت مش راغبة
وعهدا عليا مانقربك ولا نجى جيهتك لين انتى تكونى راضيه
-حنان: متواخدنيش بالله عليك .. الله غالب انا شفت هلبا فحياتى ونفسيتى مدمرة .. لكن نقاوم على خاطر صغارى
-حسين: لا انتى قوية وشجاعه
-حنان: تعرف فالدول الاوروبية اللى زينى انا يتعالجو فى مصحات نفسيه
-حسين يضحك : لا مشاء الله مثقفه وتعرفى حتى ثقافات المجتمع الغربي
-حنان تضحك : بلا تعليق عاد
-حسين : هكى نبيك ديما تضحكى
وزى ماقلتلك عهد عليا من اليوم ماندير حاجه الا لما تكونى انتى راضيه
-حنان: حسين زى ماقلتلك زمان .. ارجع لحياتك واحنا مسامحينك
-حسين: لا مش حنسيبكم .. هيا نوضى خشى دارك وارقدى
خشت حنان دارها وضميرها ايأنب فيها... وبات حسين فى ليله حرفه يتخايل فيها فى جنبه
______________
ومر اسبوع ...
وكان يوم خميس
الشغل طلبو حسين انه يبدا فالشركه يوم الاحد الساعه 7 يكون متواجد فالمقر ...معناها مفروض يمشى السبت فالليل بيش يصبح عندهم
-حسين: حنان خديتلك شفرة ثانيه
-حنان : ليش خيره رقمى
-حسين : هدا رقم فاتورة
-حنان : باهى
-حسين: وجبتلك تليفون جديد آيفون ...
-حنان: وشنهوا الايفون
-حسين: الايفون هدا اسم التليفون ..ونبى نفتحلك فيس ونديرلك ماسنجر وانزلك فايبر بيش تكلمونى على راحتكم
-حنان: غير بالشوى عليا فهمنى وحدة وحدة .. مفهمت شى من اللى قلته كله
قعمزت حنان جنب حسين يوريلها فالجهاز واينزلها فالبرامج وفتحلها فيس ...سماه نسمة الربيع 😁😁😁😁😁😁😁 زمان لازم اسم مستعار مايكتبوش فى اساميهم النساوين ..
__________
ومشى حسين لخدمته يوم السبت ...
وباشر الاحد
وكلمها الاحد فالليل ... كيف حالكم شن حالكم ..وشن حال الصغار ومن هالهدرزة ... وهيا تبي تنهى المكالمه
-حسين: خيرك تبى تسكرى
-حنان: الرقم عطيته للعيله كلها
-حسين : باهى وكان هدا
-حنان: منقدرش نقعد شاده التليفون هدرزة الساعه واحد فالليل وكان حد كلمنى يلقانى انتظار
-حسين: هبلة انتى
-حنان: ايه هبله
-حسين: تى ماهو قوليلهم نكلم فحسين
-حنان: وكان مصدقونيش كيف بتبدا سمعتى بعتالى
-حسين يضحك : والله هبله ونية
-حنان: هبله خودنى على قد عقلى
وقعدو يتناقرو هكى وحسين يضحك عليها وبعتالىى سكرو التليفون ورقدو
يوم الثلاثاء العشيه كلمها ..
-حسين: شنو توة تمام هكى اهو عشيه
-حنان تضحك : ايوووه الخوف باهى هههه
-حسين : وحشتينى
حنان ساكته
-حسين: ردى خير مانجيك راهو
-حنان: ياريت تجي عطلت علينا الحق
-حسين يضحك: تى انا السبت معاكم مسرع اللى يسمعك يقول ملهوفة حق .. ميقولش فالحوش تصدى فيا
-حنان تضحك : واااك مسود قلبك ماتنساش شى شورك
_________________________
ومرو 15 يوم كأنهم 15 سنه عليها وعليه
وروح حسين ..
خش للحوش الصبح ..
لقاهم يفطرو
جوه الصغار يجرو يبوسو ويسلمو
-حنان فرحت : حمدالله ع سلامتك حلوة المفاجئة
-حسين: مابيتش نقوللكم بنروح قلت نديرها مفاجئة
-حنان : واحلى مفاجئة
-حسين: يعنى هكى سلام من بعيد وخلاص
-حنان جت مدت يدها لحسين سلمت عليه .. جبدها عنده وقامها من الارض بيد وحدة لانها اقصر منه ..
-حسين : ياودي خلينا عالاقل نبوسو خدك الشريف
..وخدى بوسه من خدها ونزلها
😁😁😁😁😁😁😁😁
وحنان وين تلقيها فرحانه على متحشمه
___________
دوش حسين وغير حوايجه ..
يمشط فى شعره عالمراية
- حسين: حنان
-حنان: ايوة
-حسين : بنمشى نسلم على امى ..وبنطلع نشريلك حاجه
__________
زعما شن بيشريلها
🤔🤔🤔🤔🤔🤔🤔🤔🤔🤔🤔🤔🤔🤔
غدوة نكملو القصه ونعرفو ...
انتو شن رايكم شن بيشريلها زعماااا 😍
نحبكم❤
