قلبي شاريك

20

#قلبي_شاريك❤

بقلم زهور جمال الدين

🌱🍃🍀الحلقة العشرون🌱🍃🍀

الحاجه خديجه بدت قاعدة بروحها
ولازم السلفات يديرو عليها بالدور.. كل يوم تجيها وحدة من الصبح لليل
ويباتو معاها حفيظ واكرم

______________________________

حسين فالعمل وبيقد ثلاث اسابيع ...

يكلم فيها كل ليله .. يسهرو مع بعضهم للساعه 3 ..

بالتليفون الثانى طبعا

  تمشى لحوش اختها احلام تعجنلها فالعجينه

الفصعون اكرم يخنب فى تليفونها مرة مرة يكلم فى مرام لان تليفون حنان فاتورة  رصيد فرى 😁😁

____________

فاتو اربعه ايام بعد العرس

الليله الخامسه ..
-حسين: كلمتك امس لقيت تليفونك مشغول قريب نص ساعه..
-حنان: لا لا مكلمتش حد انا امس مشيت لاحلام ماهو قلتلك
-حسين:مش عارف امالا الشبكه تخرط
-حنان: والله مانى عارفه
-حسين: كيف حال الصغار ستاحشتكم هلبا
-حنان: حتى احنا ستاحشناك يا عمرى
-حسين: محلاها من فمك
-حنان: انت بجد تحبنى
-حسين: قولى تعشقنى.. تموت فيا
-حنان: نحبك
-حسين: زيدى قوليها
-حنان: نحبك
-حسين:اه مسمعتكش
-حنان تضحك:  ن ح ب ك 
-حسين: اسمعى بنروح بعد 12 يوم ..ولازم كل واحد مننا يفهم اللى ليه واللى عليه هههه
حنان تضحك : اممممم باهى
-حسين: شنو باهى
-حنان: باهى غير روح وبعتالى ساهل
-حسين: باهى اشري مخدة ثانيه جنب مخدتك ع السرير
-حنان بدلع: وووك عليا روح وبعتالى نحكو خلاص
-حسين: باهى تعالى فحضنى
-حنان تضحك : وسع هى اهو جيتك
___________ 

حنان  قبل المغرب بنص ساعه مخليا الصغار يلعبو  فى الحوش وماشية تشبح فى عمتها

جى بعدها احمد ولد اختها ..

فتح رياض الباب خش احمد

-احمد: وين ماما
-رياض : فى حوش حنينه

خدى احمد تليفونه واتصل بيها ..

سمع تليفونها يشرين فى المطبخ

لقاها فرصه خداه واتصل بمرام

-مرام : ايوة حنان
-احمد : هدا انا يا حبى
-مرام: حمودتى ستاحشتك
-احمد: وانا اكثر يا حبى
-مرام تضحك : ياسر خنبه يا خناب .. معش تاخد تليفون خالتك
-احمد: تى هادى راجلها معبى دايرلها فاتورة .. نكلمك منغير منفكر ان الرصيد بيتم لا نمى

وقعد يهدرز عليها ...

___________

حسين مكسد  يتفرج على فيلم مصري قديم رومنسى فالتلفزيون  ..

خطرت عليه حنان ..

كلمها ...

تووت توووت الخط مشغول