نبض _ دافي
Nabà _ Baqer
الجزء الحادي عشر....
__________________________________
وكأني العينه الوحيده التي يجري عليها الكون كُل تجاربه...😢
____________________________________
بعد شهر كملت امتحانات والمفروض ابدي أجهز لعرسي..واليوم قررت افاتح اسامه بالموضوع لان ملحة مهيمن بدت تخنكني وصرت اكره حياتي من كد ما يسأل لهذا خابرته هسه حتى اخصم السالفه
الو
الو هلو نبضي شلونج كبد
الحمدلله زينه انته شلونك خاله وعمو وروان
كلهم زينين ويسلمون عليج وامي كل ما شافتني سألتني عنج...
تسأل عليها العافيه
أسامه ..ايي شكو ماكو ؟؟
نبض ... ماكو على حطة ايدك كملت الامتحانات وسبع حصوات وراهن وهياني هسه بديت اخذ نفس ...
... زين حبي بالعافيه انشالله النجاح بس نبضي عندي موضوع اريد افاتحج بيه واريدج اسمعيني للنهايه ماشي ..
... تمام احجي اسمعك
.... بخصوص دوامج ترا بس السنه وتبطلين بعد ما كو جامعه!!!!!!
... شنووووووووووووو؟؟؟ شنوو ماكو دوام شنو ماكو جامعه اسامه شتحجي نسيت شرطي الدوام خط أحمر
لووو شنووو
.... نبض اني مو اكلت خ....ا وحجيت وكتلج لا تقاطعيني وسمعيني للنهايه ولو ما اكلت خ.....ا (عذراً )
... اسمعك بالله احجي
... تنهد وحاول يضبط اعصابه حتى يقنعها بكلام امه اللي هو نفسه مو مقتنع بيه بس امه أصدرت الأمر ولازم يتنفذ والا تلغي هذا الزواج من أساسه...
نبضي حبي اعرف دوامج جان هو شرطج الوحيد واعرف صعبه عليج تتخلين عن احلامج ومستقبلج بس بنفس الوقت اعرفج واعيه وفاهمه وادكدرين اتقدرين المواقف .. سكت شويه ورجع كمل نبض امي وضعها صعب من وكعتها لليوم وهي موهي تخيلي كومتها كوه عليها حركتها بصعوبه كله من وره ضهرها حتى الدوام راح اتركه وتطلع تقاعُد وروان تعرفينها احنه اهلها ما تدري عنه ولا احنه ندري عنها امخلصتها جامعه دراسه دراسه جامعه وكلش ما الها بشغل البيت وباقي كله على امي ...
وامي الله يسلمها مليون مره كتلها اجيبلج خدامه ماتقبل بحجة شنو ادخل غريبه لبيتي ما اعرف شسوي ما اسوي...
تخيلي صرنه احنه نخدم نفسنه في سبيل لا نشوف امي تتحرك وتتأذه لهذا اني اريد استعجل بزواجنه وبنفس الوقت اريدج اتركين دراستج مؤقتاً بين ما اصير امي زينه او اني الكه صورة حل وارجعج الجامعتج لان صدكي اني نفسي موراضي بس مجبور وعيونج السابيات ليلي....
أنت تقرأ
نبض دافي
ChickLit..هي فتاة عراقيه من بيئه شعبيه تعيش في ظل اخوتها الثلاثه... لتزهر كالورده... وترتبط بصاحب الجاه الرفيع والعيش الرغيد ثم تجد نفسها بين احظان الفقير وذو العيش البسيط... نبض دافي 🖤💔
