Mirasol
Nakaupo sa isang sulok
Tila bulaklak na nakayukyok
Hinahanap ni Mirasol ang araw
Ngunit tila di niya ito matanaw
Naghahanap ng liwanag
Ngunit wala siya maaninag
Hindi dahil sya ay bulag
Sadyang ang ulan sa loob niya'y ayaw lang patinag
Paano siya titingalaKung pilit siyang pinapayuko ng madla?
Paanong ang ulan ay titila
Kung patuloy sa pag-agos ang kanyang luha?
Tulad ng mirasol na sa araw lang nakatuon ang direksyon
Kailangan niya ng liwanag na pagbibigyang atensyon
Ikaw
Ikaw ang hinahanap ng aking mga mata
Ikaw ang hinahanap ng pusong nagdurusa
Ikaw, at ang sinag ng matamis mong ngiti
Ang papawi ng nadarama kong hapdi
O, Sol, haring araw, ikaw ay nasaan?
Sumilip ka sa ulap at ako'y iyong hagkan
Liwanag mong taglay, kailangan ng aking puso
Ilahad ang iyong mga kamay upang luha'y matuyo