واكدر اكللكم العملية نجحت بنسبة ٧٠ % وبعد ما تصحى حنشوف النتيجة بشكل اوضح من خلال التحاليل
ارتاحو هسة لان هي حتبقى بالعناية لحد ما تصحى وشوية تطول
عن اذنكم
شكرناه كلنا وانملت المستشفى بفرحتنا بكلامة واحضاننا واصواتنا ..
#ع_الهوى٢٦
Shahd Alsalman
حاسة بخوف وحيرة وقلق من مصير مجهول
اترك كل الاحبهم !؟
امي ابوية فريد اصدقائي اذاعتي حتى احلامي
لو ارجع واكوم من هالعملية بالسلامة !؟
وينتهي كل هالالم العانيتة
اكثر خوفي جان على فريد شلون حيكمل بدون ما اكون وياه هواية جنت اراقبة واشوف على خدة دمعات تنزل غصب عنة وابقى اتأملة وهو نايم بالليل وكم مرة اصحي من كوابيسة بية
اهلي ! شلون حيكون مصيرهم بعد ما اروح !؟ ولو اعرف فريد ميتركهم
كل شي جان بداخلي مشوش وما اعرف شنو اريد بين احساسي براحة اذا سويت هالعملية وممكن تنجح ويختفي السرطان
وبين تعبي وضعف قدرة تحملي حتى اتخطى اخر خطوة و مو اي خطوة
جانت هي خطوة الفصل بين حياتي و موتي ...
اتشجعت اكثر بكلام فريد وجية اصدقائي واهتمامهم بية حسيت نفسي جنت زينة ويا الكل وما اذيت احد على كد محبتهم الي وهالشي خلالي حافز ثاني انه اكمل واخلي كل شي على الله واسوي العملية لو شنو تكون النتيجة المهم اكون حاولت ..
ودعت الكل وحاولت كد ما اكدر اخفي دموعي والمي وخوفي بابتسامة وضحكة اخيرة قبل لا ادخل صالة العمليات
اكثر مكان موحش ومخيف بالدنيا
جان الدكتور يمي وبدة يحضر نفسة ويباوعلي
- خايفة !؟
- كلش
- لا تخافين انت بايد امينة
- حتاذيني العملية ؟
- مراح تحسين بشي انت حتنامين وتحلمين بايام جديدة حلوة بعيدة عن هالمرض واني راح اوخرة عنج
- اكيد !؟
- اكيد
لا تبجين ولا تخافين
واتذكري كلهم ينتظروج برة حتى اني حنتظرج
- دكتور عامر
-نعم
- اذا لا سمح الله صار شي ومنجحت او مجابت النتيجة اللي نريدها
خليني اعيش اخر ايامي بدون علاج ولا ادوية و لا جرعات اريد ارتاح
- لا تحجين هيج هسة من تكعدين بعد العملية اذكرج واكلج كل الخفتي منة مصار
- واذا ما كتبلي الله اعيش اكدر اطلب منك طلب
- عمرج طويل بس مع هذا اطلبي
- اني اعرف انت ابو فريد
لا تتفاجأ هو كالي وطلبي منك انك متترك فريد لوحدة
هو صعب بالتعامل وميكدر يتقبل انك موجود لان ميعرفك
بس حيحبك بمرور الايام متاكدة
فريد بحاجتك دائما هواية جان يكولي لو عندي اب او يشوف نفسة ناقص بدون اب و بدون حنان
- اتمنى يتقبل وجودي ويعذرني على غياب هالسنين
- حيعذرك بس خليك قريب منة
- ان شاء الله حبيبتي
يلة هسة راح نخلي هاي النفاخة الصغيرونة بحلكج واريد تعدديلي اسامي اصدقائج البرة حتى اجرب التنفس
- ماشي
حطت الممرضة النفاخة على حلكي واجاني منها شي مثل الهوا بديت اعدد اساميهم
ايسر
نادين
شفاء
وبعدها محسيت على شي غير لون اسود وجسمي ارتخى ...
فتحت عيني جان كل شي مو واضح بس احس بالم خفيف و دوخة كانه راح اميل
اسمع اصوات بس ما اعرف منو هم وشكد موجودين وحسيت بلزمة ايد الدكتور وسمعت منة طلبة حتى اباوعلة واركز وياه فحص عيوني وبديت اصحى تقريبا
سوالي فحص شامل لكل شي بما فيهم احساسي باطرافي وجان كل شي ممتاز حسب كلامة
كتلة اريد فريد و راح صاحليا
دخل علية لابس بدلة خضرة و مغطي راسة ولابس كفوف وكمامات
اول مشافني كام يبجي ونزل يبوس ايدي حركت ايدي باتجاه وجهة ومسحت دمعة
- شكد تبجي
- متت لحد ما صحيتي
- صارلي شكد هنا
- يوم تقريبا وويا العملية يومين
انت زينة حبيبي شتحسين !؟
- موجوعة شوي
بس زينة
- اشتاقيتلج
- واني هم
فريد
- عيوني و روحي كولي
- شو نعسانة حيل
- نامي اني يمج
بعد ايام من الفحوصات بداخل العناية المشددة قرر دكتور عامر يطلعني بغرفة وحدي وهذا الشي اعتبرة انجاز بخلال هاي الفترة القصيرة لان جسمي بدة يستقبل والخلايا بلشت تنطي دفاعات
بس بعد ٣ شهور بالضبط حتبين النتيجة الكاملة اذا تشافيت تماما او بنسبة بسيطة
و بعد فترة طلعت من المستشفى وانطاني الدكتور ضوابط وتعليمات ولازم التزم بيها وجدول مراجعات وسمحلي ارجع لبغداد
والحمدلله رجعت للبيت بس جانت اثار التعب مال عملية وفترة العلاج مسيطرة علية اول كم يوم بعدها بديت اتاقلم ع الوضع
اهلي وفريد وكل اصدقائي ممصدكين نفسهم من الفرح وطايرين بية
على طول يجون يزوروني ويتطمنون علية
بس الشي اللي قهرني هو وفاة خالة ام فريد مجان يريد يكلي حتى لا انقهر او تسوء نفسيتي
اتاذيت على فريد اللي جان يعاني لوحدة وانقهرت عليها لان هي طيبة كلش اصلا حتى معرفت شلون ممكن اواسي بهيج مصيبة بس هو جان متقبل ومتجاوز مرحلة الحزن الجبير عليها ومرتاح حسب كلامة لان هي راضية عنة .. بقى تواصلي ويا الدكتور عامر علمود العلاج وجنت احاول اخلي فريد يحجي وياه حتى يكسر حاجز الغرابة بينهم وشوي يتقرب منة وبرغم فريد يتصنع القوة كدامة بس جنت اشوف ابتسامات خفيفة ولمعة عيون فرحانة واضحة علي بس يحاول يكابر وما اعلق شي حتى ما اضغط علي ولا احرجة ...
صار موعد اروح واسوي اخر تحليل اللي حعرف من خلالة رحلتي الطويلة تكللت بالنجاح وانتهى هالمرض الخبيث لو رجعت لنقطة الصفر
بس النتيجة جانت ...
