مشافج شكد ناعمة ومو حمل هالاذية
مكال اكو احد يموت بلياج
هيج هو خبيث من صدك
- متغير هواية انت
- ذبلت ببعدج ردت شي ينسيني وكتلت روحي بالشغل
- فريد
- عيون فريد
- احضني
حضنتها واني ابجي وهي تبجي و تردد اشتاقيتلك واشتاقيتلك واشتاقيتلك
- لا تعوفني فريد بس هاي الايام
- كل الايام اذا صارلج شي اموت وراج والله
- شكد محتاجتلك
- واني يمج روحي تروح فدوة لانفاسج بس ارجعيلي
- ما اكدر ارجع خلص كل شي هاي نهاي....
- اششش لا تكولين هيج
هذي بدايتج واني يمج لا تخذليني مرة ثانية
اذا تحبيني اريدج قوية
- ما اكدر بعد تعبت
وخرت نفسها من عندي ورادت تكوم كومتها على كيف ووخرت وصلات الاجهزة منها واخذتني كدام الكنتور وفتحت الباب مالتة وخلتني كدامة ع المراية
- شوف هذي در ؟؟
هذي اللي حبيتها ؟؟
هذي بس بقايا انسان ما عندي شي
ولا شي
الزم راسي ماكو شعر
شوف وجهي ما بي ملامح
شلون حكدر اقاومة
جسمي هلك من الجرعات
تعبت من النار اللي تمشي بي كل ما اخذ جرعة
صوتي اللي جنت احبة لان اني مذيعة واكعد ادربة واسويلة تمارين
هسة متغير مو هو مو نفسة
ما اكدر بعد اقاوم اكثر
محتاجة ارتاح ومحتاجة للموت هواية
لزمت ايدها وصحت عليها
لا تجيبين هالسيرة بعد لا تحجين هيج مراح تموتين انت وحتعيشين
علمودي والي والج ولاهلج
تعرفين العالم شلون تسال عليج وينها مذيعتنا الراقية وينها ام صوت الحلو شنو ليش توقف برنامجها
- توقف لان اني بعد ما انفع لشي اني حتى مو مرة ولا بنية
- انت احلى مرة شفتها
- لا تحسسني بشفقة مو بحاجتها
- در اني فريد اشفق عليج !؟
اني اللي تخبلت بغيابج وحالي صار حال
اني اللي مستعد هسة يكلولي انطيها كلبك وروحك واكول اخذوها
يا شكل ويا صوت ويا جسم تحجين عنة وانت عايشة هنا بروحي
انهارت ووكعت بالكاع وهي تبجي
- فريد ما اريد اموت خايفة
وتعبت بنفس الوقت
صار شكد كاتمة هالوجع اريد اصرخ وكلما احس نفسي مدا اقاوم اتذكرك واشوفك وارتاح بس خلص تراكمت علية ماكو شي دينجح لا ابر لا حبوب لا كيمياوي
شراح يصير هسة
- حتسوين العملية وحتنجح وحتكومين وتطيبين وغير هالحجي راح ازعل ولا اسامحج طول عمري
- ما اكدر
- كولي احبك
.... -
- يلة كولي احبك
.... -
- اخر مرة حكلج كولي احبك
.... -
- انت كذاية وبس حجي ومتحبيني
لان لو تحبيني صدك متبيعيني كلام
جنتي تكولين الحب افعال واذا الشخص ما ثبت حبة لحبيبة ولو بتصرف معناها هو بياع كلام وكذاب
تذكرين من سالتج شلون تتاكدين المقابل يحبج ؟
هيج جاوبتيني
وهسة كل شي واضح صار
كمت وخطيت حتى امشي هي كامت من الكاع و بجت وكالت احبك والله احبك
انداريت عليها ورجعت حضنتها قوي وبصوت هادي طلبت منها تقاوم لخاطر هذا الحب ومتتركني ولا تستسلم ابد
وهي وعدتني
رجعتها لفراشها وخليتها تنام وتغفى لحد ما رخت ايدها من لزمة ايدي وطلعت وعفتها نايمة
شفت ايسر واهلها برة وكلش تعبانين واني تعبان اكثر منهم
عاتبتهم ليش مكالولي وشلون سمعو كلامها وخلتهم يسكتون وحجولي الصار
بعدين كتلهم رايح اشوف الطبيب
رحتلة بغرفتة سلمت علي وكعدت كدامة هو يباوعلي واني اباوعلة
- اعرف ليش صافن علية دكتور عامر
- بيك شبه مني كلش قوي
- صحيح تعرف ليش
- يخلق من الشبه اربعين
- لا
- لعد ليش ؟؟
- قبل لا اكول اي شي ويمكن تصدك ويمكن لا
بس اني بالصدفة عرفت انت طبيبها ل در
- انت من اقارب در
- تكدر تكول هيج شي
المهم معرفتك على اسمي الكامل
اسمي فريد عامر
فريد عامر مفيد حسن
- فريد عامر مفيد حسن!؟
ههههه سبحان الله حتى الاسم
- الاسم واضح وهذي مو صدفة
واني ابنك انت و اسماء
بس اكيد مراح تعرف انت عندك ابن او لا
باعتبارك تركتة هو وببطن امة ومسالت عنة
لا اسمة لا شنو جنسة لا شكد عمرة
- صدك انت ابني ؟؟؟
- هذي هويتي
واذا تريد نسوي تحليل حتى تصدك
ولواني ما اريد منك شي بس جايك حتى تعرفني مثل ما طلبت امي والا خليني اكون صريح وياك انت متفرق بحياتي موجود او لا
- ابني
كام على حيلة وعيونة ماليها الفرح يريد يحضني و ممصدك ابتعدت عنة شعور لا ارادي مني حسيت بي حيل غريب علية برغم الشبه بيناتنا بس مكدرت اتقرب منة هو افتهم ورجع لمكانة
- امك شلونها ؟
- توفت
- الى رحمة الله شلون ؟وشوكت ؟
- ليش متأثر هلكد !؟
-لان هي زوجتي
- قصدك جانت بيوم من الايام زوجتك
ع العموم عدها امراض هواية وتوفت
- الله يرحمها
- امين
بما انه انت عرفتني واني عرفتك
هسة اريد اسالك على در شنو وضعها
سكت وباوع علية بخجل وفشلة وكام يشرحلي على حالتها والعلاج والفترة اللي حيطول بيها
شكرتة وردت اطلع وكفني وكالي حسوي كل شي حتى هي تطيب وتتشافى من المرض هزيت براسي بالم و طلعت من يمة . اريد الطريق اختصرة كلة واطير يمها حتى اشوفها من وصلنا على حدود الشمال كالو لازم تباتون للصبح لان اكو اخبارية عن مهربين مخدرات والسيطرات مستنفرة وبرغم ايسر يروح ويجي بس مخلوه يفوت
كلت امري لله وخلص اصبر للصبح كمت اتمشى بعيد عن السيارة وافكر بكل شي وكل الشغلات اللي غابت عن عيني او خليت الشك يسكن محل الثقة بيني وبينها
منتبهت و لا مرة هي دائما تتمرض بالفترة الاخيرة معرفت شنو سبب تعبها ولا مرة حسبت ممكن تكون مريضة شلون محسيت بكل هذا
يعني من كالتلي احبك وشبكتني وهي تبجي جانت تودعني ومن طلبت مني ما انساها جانت تريد تكلي حروح عنك
متخيلت ممكن بيوم اسمع هي مريضة ولا تخيلت راح اواجه هالاحساس كدامها
مطلوب مني اكون قوي وبنفس الوقت اني منهار
ولازم اشجعها واحسسها بالحياة واني كلشي ميت داخلي
و كل هاي الفترة اللي راحت حسبتها تحب ايسر و بينهم علاقة وهو ديساعدها
واني اقرب الها منة محسيت بيها اصلا
تركت نفسي لظنوني وشكي و دمرت نفسي بكبرياء كذاب
وباول دمعة منها انهار واركع مسلم كل شي بلا ما استوعب ليش وشلون
بين هاي افكاري والملامة ومشاعري المختلطة علية اتقرب علية ايسر وبلش يحجي وياية
- فريد خويا لا تسوي هيج بنفسك كل شي بيد وامر الله
- ليش الله يختار اللي احبهم
- استغفر ربك الله ينطي والله ياخذ احنا ملك لله مالنا حيلة ولا يد
- استغفرك ربي واتوب اليك
ايسر متحس بالنار البية ومتدري شكد تعبان
- ميخالف اتحمل واصبر وادعيلها تكوم بالسلامة
واصلا اني من كتلك ردت شوية يرجعلها الامل بوجودك
لان تقريبا بدت تفقدة
- ايسر
وكع شعرها ؟
- اي
- و لونها صار ابيض ثلج مو ؟
- اي
بس تدري بقت حلوة
- هي طفلة كل شي بيها حلو حتى لو جانت هيج
- تدري فريد هي قاومت هواية يعني الجرع اللي الدكتور ينطي بيها نسبة تقبل بسيطة هي تتخطى النسبة وتتجاوزها
- لعد ليش كتلي فشل العلاج الكيمياوي
- لان بالنهاية كامت تقل مقاومتها وحسب رأي الدكتور الموضوع نفسي وماثر بيها
- من شنو متاثرة
- حعترفلك بشغلة
اني جنت كل يوم اصورك بدون متدري او اسجلك تسجيلات صوت وادزها الها جانت ترتاح واتقصد بيوم جرعتها ادزهم حتى تكون مرتاحة وحتى من جنت متداوم وتسالني ليش ما كتلها والدتك توفت او تركت الشغل كتلها مسافر سياحة تغيير جو اعرف حتتاذى عليك وعلى الحجية الله يرحمها من بديت تداوم كمت اصورك حتى تشوفك
بس باخر ايام اعتقد صارت بحاجتك اكثر والاشتياق خلاها تفقد مقاومتها
- فكرت بية اكثر من نفسها حتى لا اتوجع بقت هي لوحدها
- ان شاء الله تشوفها ويرجع كل شي طبيعي
- هسة شنو علاجها ؟
- حيسويلها الدكتور زرع نخاع وكال هذا يفيد بس تحتاج شوية صبر ووقت لحد ميتقبلة جسمها
- بعد شكد ويدخلونا ؟؟
- ما ادري صارت ب ٦ الصبح
كمت حتى احجي وياهم بس كلهم يحجون بطريقة باردة واني بعد ما اتحمل اكثر كمت اصيح واريد اتعارك و اكللهم راح تموت بلا شعور مني ولا وعي اصيح واعيط واريد اكسر كل شي
اخذني ايسر من يمهم لان رادو يعتقلوني لوما اكو رجال جبير كردي ويعرف عربي وطلع يعرف ايسر لان هو جوارين عمته
حجة وياهم وفهمهم شبية بعد ما كالة ايسر مرتة مريضة ووحدها
دخلنا على مسؤوليتة وبعد ساعة تقريبا نوصل المستشفى كلما نتقرب اكثر كلما احس بدكات كلبي مسموعة اكثر
ورسمت الف صورة وصورة بخيالي شكلها نومتها كاعدة لو على كرسي شون ححجي وياها راح تبجي راح تضحك راح اتحمل هالحال لو ما اقاوم تتقبل اكون وياها
ما ادري شكد فكرت وشكد سرحت بس حسيت بايد ايسر على جتفي يكلي يلة وصلنا
جريت نفس قوي و غمضت عيوني ومشيت باتجاه باب المستشفى الجبير
رجلي ثكيلة وخايف ما اكدر اشوفها وكلبي يكلي يلة مو متنا اشتياق وحنين
وصلت غرفتها شفت امها وابوها ع الباب ابوها حضني وبست ايد و راس امها و طلبت افوتلها
فتحت الباب ولكيتها متمددة على سرير جراجفة بيضة و زركة
ايدها موصولة باكثر من جهاز مغمضة و راسها مغطى
ماكو اي شعر على وججها لا حاجب لا رموش عبارة عن جسم ابيض على صفار وضعفانة كلش رحت للجهة الثانية لزمت ايدها ومجنت احس بدموعي شلون تنزل
بستها بباطن ايدها حتى تحس علية مفتحت عينها
- فريد
- اني اجيت يمج
وظلت مغمضة عيونها يمكن متخيلة دتحلم
- مشتاقتلك
- اني ميت شوق الج
- ليش تاخرت علية
- جنتي منتظرتني
- حسيت بريحتك تتقرب مني
حسيت بروحك دتجيني قبل جسمك
- ريتني اني بمكانج حبيبتي
فتحت عينها ممصدكة اني هنا بس بجيت متحملت واشهك
وهي تمسد على راسي وشعري
- الحمدلله يا رب
شفتك اخيرا
- ليش هيجي سويتي !؟
ليش ؟
- ما اكدر اشوف نظرات الالم بعينك
يكفيني اللي شفتة باخر يوم بيهن ..
#ع_الهوى٢٠
Shahd Alsalman
رادت تجلس نفسها حتى تكعد بس مكدرت كمت من الكاع وسندتها وكعدت كدامها واني اتامل وجهها وايدها بيدي
- هالمرض ما رحم هالعيون البريئة سلمت عليها وبوست البنات ورحت
- انت من يومك تحب النسوان
- شسوي افقد كدامهن مو بيدي
بس جانت ايام حلوة واحلى شي جنت اغار على در عود لان محصلتها ومكدرت اجيبها للدرب ههههههه
- ليش تحجي هيج انتو مو واحد حب الثاني
- ها اي يعني
اقصد يعني بايام الكلية
- اي
- شبيك ؟
- ما بية
حتى من اريد ما افكر بيها تطلع كدامي بذكرياتي كل الحجينا بي هي ويانة و الصورة الاخذناها هسة استهضمت اخذها وهي مو ويانة متعودين ناخذها جماعية بوجودها
- صحيح
و حلت علينا كآبة وحزن خلانة نعوف الاكل ونروح كلمن البيته
