تفاصيل هواية عشناها سوة واتمنى الله ما يبعدني عنك ابدا ويخليك الي
وحابة اشكر كل اللي ساندوني من اهل واصدقاء وصديقات خاصة الصديق والاخ ايسر
وشكرا للمستمعين اللي حسسوني اني تركت بصمة جميلة الهم و انطوني طاقة ايجابية عالية وقوة حتى اتحمل واقاوم للاخير ..
حضن جبير وفرحة اكبر بحلقة رومانسية بحتة اتكللت بنجاح ونسبة استماع عالية جدا وهواية اتصالات ومسجات اجتنا اني و فريد تدعيلنا بتمام فرحتنا ورجوعنا لبعض بعد مدة غياب مرضي
واكو منهم صار عدهم حافز حتى يتعالجون واكتشفنا هواية منهم يعانون من هالمرض اللعين حتى اقارب الهم بس ما عدهم اي امل ولا قابلية للمقاومة وقصتنا اثرت بيهم بشكل ايجابي وانطتهم قدرة ع التحمل اكثر واكثر
باركولنة كل الاذاعة بخطبتنا و الكل جان يتمنى يشوفنا عرسان من اول ما جنا نداوم بالاذاعة وفرحتهم ما تنوصف بكلمات خاصة بعد دموع غالية نزلت منهم فرحا بية
جان احلى يوم بحياتي وكل سنة نسوي ذكرى سنوية لعيدميلادنا اني وفريد لان هو يكول احنا بهذا اليوم انولدنا من جديد وصار يوم رسمي لبداية كل شي حلو بيناتنا والنا ..
فريد ..
سامح والدة بعد ما حاول يتقربلة ويسال عنة ويحجي وياه حس انه ابوه ظلم نفسة بغلط وطيش شباب ودفع ثمنها غالي وخسر كل شي ولان هو يعرف بشعور الخسارة ما راد والدة يستمر بعذاب الضمير او احساسة بالفقد والوحدة
كملو طريقهم والباقي من عمر والدة كأصدقاء و كأب وابنة وعلاقتهم يوم على يوم تقوى وتتحسن واتعوضت بيناتهم سنين وايام فاتت من عمرهم بالحب والتسامح ..
فترة وبدة يرجع جسمي طبيعي وشعري يطلع وينبت من جديد ويوم على يوم انتظر يرجعلي كل شي يحسسني بانوثتي والحمدلله من بعد كم سنة رجع وضعي الاول واحسن من اول صحتي بتحسن مستمر وشكلي صار احلى خاصة بيوم عرس ايسر و نادين
و صار وقت الادارة والمشروع الجديد بين الاذاعتين استلمت منصب ادارة بس متركت شغلي كمذيعة ولا وقفت برنامجي بيها وبقينا اني وفريد بعد زواجنا نقدم حلقات وكل حلقة تكون احلى من اللي قبلها
و ع الهوا استمرت احلى قصة هوى ...
