- راد يحضني وابتعدت عنة
- ليش ابتعدت فريد هذا ابوك
- در اني ما اعرفة يعني هو غريب بالنسبة الي ماكو اي صلة بيناتنا غير الاسم والدم ماكو شي بينا مشترك عدا الشكل لا اعرف هو شنو من بشر لا هو يعرفني شخص اقل من عادي
بس حسيت بغربة تجاهة كلش ولا كأنه ابوية ومفروض افرح من اشوفة
- والله فريد ما اعرف شكلك بس هو يظل ابوك واكيد فرح بيك
- ميهم يفرح او لا المهم عرفني وعرفتة وهذا كافي
- اي بس
- اكلج مراح تنامين
- لا خل نكمل حجي
- در اني صارلي ٣ ايام منايم وكلش احس بتعب
خلي نام
- وحتنام يمي هيج
- اي طبعا بعد انت صرتي الي
- لا كوم افتح هذا السرير ونام بي
- هاي ليش هيج
- اول شي عيب اذا الصبح شافونا هيج وثانيا ما اكدر تنام يمي لان هسة بعد شوية حتجي الممرضة تخليلي محلول
دتحجي وفاتت الممرضة سوت مثل مكالت در وشوي وغفت واني هم غفيت ...
#ع_الهوى٢٤
Shahd Alsalman
صوت عصافير الصبح تنبه اذاني حتى اصحى من نومي واكوم اشوف اشعة شمس ضوت المكان واول شي توكع عيني علي هو فراش در حتى الكاها غافية مثل الطفل من ينام ويغط بالنومة
كمت يمها وبست راسها لاعبت خدودها حتى تكوم من النوم بس شفتها بردانة جسمها بارد غطيتها وصلت الغطا يم ركبتها مجان اكو نفس ولا حتى حركة بجسمها شفتها صايرة زركة والجهاز يقرة خط مستقيم بس ميطلع اي صوت ولا تنبيه
لزمت وجهها وبكل قوتي احرك بيها عفتها ورحت صحت حتى احد يساعدني
اجة الدكتور واني ابتعدت كم خطوة ورة
يجيكها ويفحصها وينعش كلبها بس ميفيد حتى جهاز الصدمات ما ساعدها حتى تعيش
وكعت على حيلي من شفتة ديريد يغطيها وابجي واصيح علي بصوت عالي بس مخنوك ميطلع صوتي ميطلع حتى الدمع بس خنكة نفس واحس انشليت بس حضن وايد در احس بيهم
احاول احجي وياها ويوصلني منها صوت مكطع ومو واضح
لحد اخر صيحة منها باسمي خلتني افز وافتح عيوني واني اشوف در كبال عيوني لازمة ايدي وتهدي بية تعرف اني جنت بكابوس مزعج لزمت ايدها بيدية الاثنين وابجي بحركة
للحظة حسيت كل شي حقيقي واريد اتخلص من هالشعور مكدرت
خلت ايدها على راسي وبدت تقرالي ايات وتنفخ بوجهي لحد ما هديت وحسيت براحة برغم خايف بس كمت اوعى على نفسي واكول من داخلي كوم هي بحاجتك لكن اني محتاج الها اكثر
رحت غسلت وبدلت هدومي ايسر اشترالي كم قطعة كالي انت مراح تقبل تفارك المستشفى وبس على كد اروح لبيت عمتة اسبح وارجع ما اتاخر عليها ابد وهسة هو رجع لبغداد لأن صارلة كم يوم هنا وتارك الاذاعة فرجع حتى يسد مكاني وياخذلي اجازة طويلة رسمية بعد ما اتصلت ع المدير ومجان مصدك الخبر اللي سمعة وطلب مني ادز ايسر وكالي شكد متريد ابقى وراتبك جاري واكيد تشكرتة على مواقفة ويانة ..
يوم على يوم حالة در النفسية تتحسن بس الصحية تتراجع
جنا يمها كلنا اني واهلها وجانت تحس بخنكة او ضيق تنفس كالت الممرضة طلعوها بالحديقة تشم هوا نظيف
كومتها وطلعنا نتمشى على كيف اني وياها وهي تكلي اني تعبانة كلش واني احاول اخليها تقاوم لحد ما نوصل مكان المصطبة ووصلنا بعد جهد كلش جبير منها
- حبيبي
- عيوني
- اليوم احس بالم قوي بجسمي
- ليش حبيبي وين بالضبط؟؟
- كل جسمي ما اعرف عبالك واكعة من مكان عالي وجسمي متاذي
- زين مراحت منج الخنكة
- لا اريد ارجع لغرفتي وانام دايخة كلش
- كومي يلة
اشيلج شنو رايج ؟
- يا ريت؛ ما بية امشي
شلتها وخلت راسها على جتفي وايدها حوالين ركبتي وجتافي
- ايابة شكد جنت اتمنى اسوي هالحركة هاي اشوفهم يسووها بالافلام ويبدي خيالي يشتغل صدك ظلت بنفسي ههههههه
سكتت ومضحكت وياية وفجأة رجع راسها ليورة وانفكت ايديها عني فقدت وعيها كمت اركض بيها بسرعة واصيحها بلكت تسمعني وتحس وتتنبه
خليتها على فراشها واهلها خايفين وامها تبجي صحت الممرضة والدكتور واجوي عليها فحصها وطلعلنا
بلغنا انه هي هسة وضعها مستقر بس لازم نستعجل بموضوع العملية والافضل انه تكون عكب باجر حتى نجهزها هاليومين للعملية وافقنا وما بيدنا حل ثاني ؛
اتصل ايسر علية وكتلة ع الصار وع العملية جان كلش متاثر ومقهور سلم عليها وسد التلفون
ما اعرف شسوي حتى اساعدها وشنو يطلع بيدي غير دعائي و دموعي اللي مبيها نتيجة
رحت لدكتورها بغرفتة وجنت احس اني بحاجة اب اشكيلة كل همي محسيت باحساس الابن والاب وما اعرف شنو هالمشاعر اللي بداخلي تجاهة ساعة اكرهة ساعة احسة قريب مني وساعة ما اتذكرة وانساه
بس هو خلال هالايام اللي شفتة بيهن وشلون يساعد در ويعالجها كمت احب اسمع كلامة واسلوبة وتصرفاتة يمكن حتى كمت اتمنى هو يدخل بحياتي ونعوض كل شي عشناه واحنا مو قريبين من بعض
دكيت باب غرفتة وفتت كعدت كبالة وهموم الدنيا ماليتني
- ابني اني اعرف اللي تمر بي صعب كلش
وادري دتواجه احساس فوك طاقتك
بس در حتى لو تعبت من المرض ترة هي قوية
فلا تعب نفسك باحساسك بالفقد - واني مبقالي الا هي يعني اذا راحت حيصير الاحساس علية ثكيل حيل
- لا تكول هالحجي صدكني اللي بيدي واكثر حسوي حتى ارجعها الك ولاهلها
- بس هذا بيد الله
- واني الله سخرني حتى اساعد الناس
- اااه يا رب شوكت يخلص هالكابوس
- فريد
اني ما عشت اي لحظة وياك بحياتك لا طفولتك لا مراهقتك وحتى هسة بشبابك ما اعرف شي عنك بس حتى اثبتلك اني فرحت بوجودك و محتاجلك كأبن و صديق الي
مراح اوعدك در تتشافى ونسويلها العملية وتنجح لان يبقة امر الله اني ما اكدر اتجاوزة
لكن وعدي الك على كد ما اكدر واليطلع بيدي حسوي حتى لا تحس بهذا الوجع ابد شتتخيل ممكن اسوي حسوي
باوعتة وكلي انكسار وبنفس الوقت احس باطمئنان عفتة وطلعت لغرفة در ... مساء العافية والورد ...جمعه مباركه وطيبه عالجميع
