حكاية سمر(عاده اعدمت حياتي)الجزء الاول والثاني

البارت 21

حكاية سمر
للكاتبه /رانيا شكسبير
البارت واحد وعشرون❤💙

كتله بس شوفني عينك بكر.. بس اشوفها.. اريد الزمه.. وهوه كدامي يصيح ومدنك.. شال عينه..

وشفتها سوده وتبجي دم.. يمه فرفحت روحي كمت الطم على خدي وابجي راحت عينه رااااحت.. يربي عمت عينييي..

اريد الزمه روحه تفرفح من الالم يروح منا ويجي هنا.. التمو اهله بس يردون يشوفون عينه..

ما يوكف وبس لازم عينه .. احس روحي خلصت متت واني اشوفه هيج.. عادل كاله بس ابدل واخذك.. طب عادل

وبكر يصيح عااااادل وينك عاااااااااادل.. عادل كال يله اجيت.. امه لبست عباتها ومشت.. اني جريت لفاف علشباك خليته على شعري وطلعت..

كالت اميره سمر اني راح اروح اكعدي.. ما سمعتها.. طلعت وراهم وروحي طايره.. احسه وجعه. بيه..

كعدت عمتي هيه وعادل كدام.. واني صعدت بكر وره.. يشيل براسه ويرجعه من الالم.. لزمت ايده.. وخليت ايدي الثانيه على كتفه..

يعصر ايدي بقوه.. ويكلي سمر عيني دمرتني سمر خلصيني من الالم.. دموعي تنزل واباوعله.. يروح سمر انته اصبر هسه نوصل..

عمت عيني ولا عينك بكر.. احجي وهوه يعصر بايدي حيل من الالم.. ودموع تجري بقوه.. اريد اباوعله..

حسيت الطريق صار ساعه من كد ما حسيت بألمه.. رغم عادل يمشي 140..طاير بينه.. بس يريد يوصل..

وصلنه لمستشفى ابن الهيثم نزلناه.. عادل كال سمر اخذيه بساع.. اكصله باص واجي وراكم..

اخذت بكر وعينه تجري دم.. مشيته بيه للطوارئ مال ابن الهيثم.. تلكوه الدكاتره.. كالو شبيه..

كتلهم اشعال ناري انفجر بأيده.. وشضايا نار دخلت لعينه.. ودتنزل دم.. وحيل ديتوجع.. كعدوووه.. كالو الباص مالته وييين..

كتلهم هسه.. دنحجي عادل كال هذا هذا جبته.. عمتي تبجي وليدي يمه بكر عيوني التعمه ولا انته يمه يا ضوه عيون امك..

كاللها الدكتور اهدي حجيه انشالله خير.. عاينه وهز راسه.. كال شكد نحذر من هلشعالات يابه خطره يابه لا تستخدموها..

ماكو فايده.. وهاي العالم رايحه بيها.. كتله سنه كشره مو سنة خير طلعت.. هاي بدايتها الله يستر من تاليها..

احجي و اباوع لبكر.. ودموعي تجري وامسح.. كال الدكتور.. الشضيه مخترقه جفن عينه وواصله للعين.. ومأذيتها..

كتله دكتور وتالي.. كال حاليا راح ننطيه الازم.. ونخضعه الصبح للاستشاريه.. علمود نقرر موقفه شنو..

كتله زين دكتور.. نروح اختصاص افضل لو نبقى هنا.. كال واللهي طبعا الاختصاص افضل ياريت.. تودوه طبيب عيون.. يشرف حالته..