حكاية سمر(عاده اعدمت حياتي)الجزء الاول والثاني

البارت 36

حكاية سمر( عاده اعدمت حياتي )
للكاتبه/رانيا شكسبير
البارت سته وثلاثون🌹💙

كعد اركان خطيه و هوه يسولفلي على شغله وبعثات من الحوزه بالنجف وهيج دنسولف واني كاعده كباله...
طبت مرته وشافتنه كاعدين سوه يبوووو هههه. شراح يخلصنه.. تخصرت كبالنه وكالت هاااا شجاي تحجون..
هوه ولا كأنو طبت ابد منتبهلها وكمل سالفته.. اني ابتسمتلها ودرت وجهي عليه وهوه يسولف.. باوعتلي..
وكالت اكلج انتي ما تستحين.. دارلها هوه خزرها خزره.. خلاها تطلع من الغرفه كلها.. طب احمد
اني كمت.. وكعدو ياكلون.. رحت للمطبخ لكيت امي كاعده يم مرت اركان وهيه تبجي..
شافتني.. تكولي عود انتي شني اطلقتي حتى ترجعيله تحلمين تشوفين اضفره
-حتى ضفره ما اريده شسوي بيه خلي الج.. صاحت امي سمررر
عفتهم ورحت لغرفتي.. نجوى تحجي بالفون ويه مازن.. اخذت الجهاز منها.. وحجيت ويه مازن
-اكولك اشو انته زودتها .. يعني بس هليومين هيه ويايه وانته ساكن اذنها اباتصالاتك..
-هههع اي شسوي غير اشتاقلها..
-اي ابقى اشتاق احسن يله باي.. وسديته
-ههههههههه ليش سديتيه
- اختج الجبيره بكيفي..😝
-سموره ما اعرف شلون حفاركج..
-باع العياره صارلها ساعه تاركتني ولاطشه بيه وهسه جاي تتلوكلي.. كولي اني شلون راح افاركج.. انتي تكابلين مازن اني اكابل منو
-تكابلين بكر 😉
-اخذت نفس .. بكر اوووف بكر.. احسه اقرب اليه من دمي.. وابعد عليه من حلمي..
نجوى ما اعرف سالفتي ويه بكر شلون حتصير..
هوه يريد نتزوج بالسر واني ما اقتنع بهسالفه.. ما احسها تليق بيه واسوي هيج باهلي واحطهم بهلموقف.
-لحضه شنو طلبج للزواج
-اي
-وليش ميتقدم لابويه ويخطبج
-بعد وكت طلاكي من عادل مصار هواي ما اكدر اخليه يتقدم.. هسه الحجايه تلطش بيه. ويكولون اطلكت من رجلها علمود تاخذ اخوه. .
-زين شنو زواج بالسر ليش بالسر طلبه..
-يكول اتزوجج شرعا وقانونا هسه واضمنج اليه. ومن اتقدملج اذا قبلو خير على خير واذا رفضو ما بيدهم شي يسوون احنه متزوجين وبالغين
ميحق لاحد يعارضنه.. شرعا وقانونا احنه ممخالفين فقط نخليهم امام الامر الواقع .
-زين وليش متوافقين..
-نجوى صعب.. بابا بس هيج شك اكو علاقه عندي ببكر ما تحمل وانجلط.. اروح اتزوج بالسر ويعرف هوه يموت والله..
تعتقدين اكدر اعيش مرتاحه وابويه يموت بسببي غير اموت وراه.. لج نونه احبه لبابا ما اكدر اكسر ضهره هيج..
ما اكدر اصير انانيه وافكر براحتي وانسى وضع ابويه.. وشراح تحجي الناس عليه لو عرفو اني متزوجه بالسر..
هزيت راسي.. مستحيل مستحيل اسوي هيج بأبويه.. لج هوه غير عن امي.. تتذكرين شلون جان حنين ويانه وشكد يدللنه واحنه اصغار وابد ما فد يوم مد ايده علينه واحنه اصغار
ويحير شيجيبله وشيرضينه. باحسن الاكل والملابس.. هسه لما كبرت بفضله اكوله اني احب واحد وغصبا عليك تقبل واكسر كلبه علمود كلبي ما احسها راهمه حتى الله ما يبارك بزواجنه
ومن صفحه اكول بكر شلوون ما اكدر اعيش بدونه.. وامي شوفت عينج.. منو الجاي تعرضني كباله وطلعني اسلم علمود يتقدمولي واتزوج واني ما صار اشهر من اطلقت..
حيره والله حيره..
-يحبيبتي لتهمين الله موجود.. الله ما يحير عبده بس كاتبله قدر وانشالله قدرج لبكر وترتاحون..
-بوستها.. وكتلها يله نامي مو زين على وجهج السهر انتي عروس لا يروح يصير سواد جوه عيونج..
نمنه و كعدت ثاني يوم.. رحت للمدرسه الصبح جبت راتبي واجيت.. صعدت انطيت نصه لاحمد.. جان كاعد..
كتله شنو ما تطلع للشغل اليوم.. كال مابيه حيل.. كتله اريد اروح للسوك..
عقد حاجبه وكال شعدج بالسوك..
-اي يا حمودي شعندي قابل غير باجر حنة اختي لازم اتحظر ..
-اخذي وحده من خالاتي وروحي.. واحسبلج ساعتين انتي هنا.. ماكو اصلخ جلدج
-شنو ساعتين ما الحك..
-لعد لا ترحين..
-اخذت نفس وكتله ماشي.. طلعت منه.. روحي طالعه اضوج بتحكمه بحياتي هشكل وهوه ياخذ نص راتبي ومان عليه بعيشاي بيت اهلي
.. ابويه ما يحاسبني بكده..
اعرف ساعتين ما تكفي للسوك.. وهذا مدام كال احسبلج يعني صدك يحسبلي اروح لبابا اكوله احسن..
صح يسمحلي بس اعرفه من يحجي احمد يكوله عفيه ف خل اكول لابويه علمود من يحجي اكله كلت لبابا واشمرها براسه ابويه واطلع منها..
رحت لابويه.. بابا اريد اروح للسوك..
-روحي بنتي..
-بس بابا احمد يكولي ساعتين. اذا ضل يحجي مو تكوله عفيه تدري احنة بنات واحتاج مواد الحنه وتحظيرات اليه كووومه
-روحي بنتي اني احجي وياه..
-بست راسه وطلعت.. كلت لامي راح اروح واخذ خاله ..
كالت مو هسه خل تصير ب5 وروحن هسه ضهر.. تانيت لحد مصار الوقت صعدت سبحت وحظرت روحي.. دا اطلع .. صف سيارته اركان..
كال وين.. كناله للسوك.. كال امشو اوديكم.. صعدنه وياه.. نزلنه يم السوك وشافه ازدحام..
كال هاي وحدجن راح ادخلن.. كتله اي.. كال تانو اصف السياره واجي.. شوفوها كلها زلم ونسوان صايره ملحمه مو زين ادخلن وحدجن زحمه..
بقينه واكفات تانيناه صف سيارته واجه.. كال يله.. كتله لو تدري زهوره انته ويانه خخخخ.. ابتسم.. حجت خالتي..
-يبوووو غير تخبصنه وتصفطلنه العكل وتكلهم يريد يتزوج علي..
اركان.. على كد عقلها هلزهراء عوفوها اني صابر اريد اشوف وين تاليها..ههه
خالتي.. صدك اركان ليش ما تخليني اخطبلك..
اركان.. ابالي بس مو هسه.. من اريد اكلكم
-حجه ويباوعلي.. اهوووو هذا بس لا يفكر يتقدملي.. غلست وكأني ما سمعت.. دخلت للمحل دورت ملابس..
ملابس سهره وحفلات كلها مدلعه.. اركان كال سمر عود تحجين صدك تلبسين هيج دمشي يابه اخذيلج بنطرون وقميص مستورات..
- يمعود هيه حنه بناتيه ماكو رجال.. وحنة اختي.. اركان فده روح هناك استحي اختار كدامك تشلع كلبي
- ههه ما تبطلين سوالفج انتي.. دوم مخبله
- دورت دورت ما عجبني فستان.. ذوقي صعب بالاختيار ..ما احب الالوان الفاقعه.. اريد لون مال حفلات
درنه ولفينه اشترينه مكياج ومواد الحنه واكسسوارات واشكال الوان والفستان ما لكيت اليعجبني..
اخير شي لكيت فستان يفلج اجيت اتمدد وانام يمه.. من الجمال.. كلت لو هذا لو ما اخذ..
كلت لصاحب المحل بيش... عبالي يكولي..100 150 .. جان يكولي 300 الف 😐 واني البقت عندي بس 200 كل راتبي..
كتلها خاله امشي ما مقسوملي.. طلعنه واني عيني عليه بودي ابجي جن مفاركتلي عزيز دخل كلبي بساع 😢 اريييييييده😭..
كالت خاله .. سموره اذا عاجبج اني اداينج وعود على راحتج رجعيه..
كتلها هاااا والله خاله روحي تشكلت بيه بس شسوي ما اريد اتكلف ما عندي اوفي 😢
اركان.. شنو وينه.. كتله ذاك.. فتح عيونه وج هذا تشتريه😰 .. كتله لاااا ما اشتري دمشي يمعود ما مقسوم..
لااا اتشاقه وياج والله عادي اشتري..
-باع هذا يكولي عادي اشتري دمشي لا اجرم بيك.. هوه عدي وما اشتريت.. شسوي ما عندي ابن خاله كريم اقطه واشتري الفستان 😶 ههههه
-هههههه امشي اني اشتريلجياه
-لااا جذب والله دا اتشاقه وياك.. خطيه عافني وراح للمحل صدك خجلت لما اشتراه بس هلكد فرحت اجيت اركص بنص السوك 😍😍😍
اخذته هوه و اكسسواراته هديه مجانيه وعقد كرستال وياه.. ورحنه للبيت شافته امي كامت تسوي هيج 😱😱 كتلها اشتريته بعد ما يترجع 😝
الحمدلله عدت.. واحمد باقي يحجي ورانه ومتحلف بيه شلون تأخرت.. بس من شاف اركان ماخذنه.. سكت .
اما مرته.. اني عفتها وصعدت ما ادري عنها.. واركان ما دار وجهه عليها.. يمكن زعلانين لان ابد ميحجي وياها.. بس هيه عادي كامت تحجي.
حلفت خالتي متكولها اركان ساعدني بمشترات الفستان تهجم بيته والله..
كملنه الليله على خير.. واخيرا صار يوم الحنه.. بس بين الفرح والحزن.. فرحانه لان حنة اختي واخذت اللي تحبه بس حزنانه ع فراكها..
كعدت الصبح.. تريكنا ورحت ويه نجوى للصالون.. فستاني جان اسود جلد بدون ردن من فوك حتى خيط ماكو مكشوف
فستان هره او قطه يسموه اسود جلد قصير ومكشوف الضهر.. ولبست وياه جاروب حياكه وطوك مثل اذانات القطه وسرحت شعري وشلته ..
والمكياج اسود العيون والحمره حمره مسوده .. صرت اخبل.. 😅 لبست عبايه لفيت نفسي ورجعنه للبيت
دخلنه للحنه مسويها بالصاله.. كل رجال شامرينه برا البيت حتى ابويه طاردينه لبيت عمو.. البيت صاير بس نسوان...
دخلت ولكيت الجماعه كلها ملتمه ..الدنيا مكلوب عمتي ام بكر و رنا موجودات .. كيفت كلت خل يشوفوني فرحانه من خلصت منهم.. وباحسن حال
امشي واتمايل كدامهن ورنا تباوعلي صفح.. رحت شغلت دي جي.. اغنية هيدي هيدي ..
كومت نجوى وكمنه نركص اني وياها ودوكلي يا سيمو دوكلي عل مجوس دكلي ووكعنه ردح اني والبنات
.. كامت رنا ويانه تركص وتكولي ليش مسلمتي عيني..
كتلها اووو سوري منتبهتلج وربي شفت بس عمه رويده وسلمت عليها.. وبكلبي اكلها اهمداج حتى صوتج مو طابقه اسمعه يذكرني بايام الضيم👐
ببس ضايقتني شركص تركص مثلي وعود شوفي اني احسن منج اركص خرررب هزيت خصر ويه البنات هزت وتباوعلي لا هاي تخبلت رسمي حسيتها تتسابق ويايه ضجت وعفتهم وكعدت
بقن بنات كومه يركصون.. كعدت علكرسي.. جان عمتي ساميه تكلي.. شلونج سمر.. كمت اسلم عليها.. وبودي ادفرها من كد مو طايقتها..
كالت شنو حاليلج الجو بعد الطلاك.. كتلها طبعا رجعت لدلالي ابيت بابا.. حجت امي.. كالتلها والله كومه يجون عليها خطابه بس ما تقبل..
كالت رنا وهيه تكعد اي كالوها حظ الزركه كاعد.. ردتها امي.. سمر زركه اشو جنها كمر باعيها..
كالتلها غير جايبه ومخليه مكياج مكومتهم باعي عيونها تكول باندا.... عمتي كالت هيه سمر من يوم يومها المكياج ميفارك وجها..
اهووو رجعت الهم ولحجيهم.. اكووم احسن لي.. كمت كملت ركص وي البنات.. شوي كالو اجو اهل العريس..
ركضت لبست بنطرون اسود وجاكيت ولبست حجاب استشرفنه ههههههه.. طبيت لكيت مازن كاعد يم نجوى فرحت حيل بيهم..
لحد ما دمعت عيوني واني اشوف فرحتها بيه وهوه يخلي الحنه بيدها.. ويوكلون بعض بالكيك..
يربي شلون راح افاركها.. شافني مازن. صاحلي.. وكفت بينهم وكلتهم كيك ووكلوني واخذت وياهم صور
لزمتني مره.. كالت يمه ما تقبلين بعمار والله خوش ولد ودره.. كتلها خاله شايله فكرة الزواج هسه مو ابالي مصار هواي من اطلكت اريد ارتاح..
كالت متعبيج جانو.. كتلها الله موجود ونجاني ووالحمدلله على كل حال.. كالت فدوه يمه اريدج لوليدي.. ابتسمت.. سمعت ماما تصيح ورحت .
ساعه وطلع مازن لان حنته ويه الشباب ابيت اهله.. بس اهله النسوان بقو ويانه مكملين الحفله
.. رجعت بدلت وكفت اني ونجوي نركص وهيه تكولي سمر متتوقعين شكد فرحانه..
ابتسمت.. بس دموعي اتجمعت.. كالت يعمري والله مو قصدي اضايقج.. كتلها عوبه انتي تضايقيني بس فراكج صعب..
الغرفه تاكلني بوحشتها بدونج. حظنتني وبقت تبجي. كتلها ها ها هسه تكولين فرحانه لتضوجين نفسج عمودي.. معليج بيه..
كملنه الحفله.. وبدلت وكمنه علبيت غسل.. احس انتهيت.. حيلي نهد صعدت ب11 هلكانه من التعب وكفه من الصبح وركص وصوت الديجي وهوسه متت
دا انام.. كلت خل اخابر بكر. اسمع صوته قبل ما انام.. جريت الموبايل ولكيت 34 مكالمه من بكر.
كمزت من مكاني. اسم الله شصاير وياه وهيج مخابر.. خابرته بساع رد..
-سمر شنو هل مهزله
-لحظه بكر لتصيح شكو..
-شلون تقبلين يصوروج وانتي بالحنه تحجين صددددددددك ..
- بس لتصيح ..محد صور والله كلت لامي ما تخلي احد يصور
-لج هاي بموبايل امي .. واكفه تركصين ومصورتج وتشوفه لعادل تكله شوف شصارت وراك يل اغم..
-بكر والله ما خليت احد يصور.. هاي عمتي شلون صورت.. صورنه بس بكاميرة العرس الخاص بنجوى..
-وبعدين تعاااي صدك اركان خاطبج..
-منيلك هلحجي مخطبني..
-سمر لتجننيني.. خالتج كايله لامي نريدها لاركان..
-ما عندي علم بهلموضوع..
-مشتريلج الفستان هوه موووو..
-اهووو بكر والله تعبانه وحيلي مابيه.. حتى مابيه ابرر مهدوده من التعب فدوه غير مره وافهم..
-انتي الج خلك وحيل للكل من توصلين يمي ما بيج حيل موو. اوك روحي
-لحظه لحظه.. بكر لتسده بس كولي شنو التريده..
-اريدج انتي بس ما اريد تهتمين بغيري لج موتينيييييي..
-مهتمه بمنو بكر الله يشهد بعيوني ما اشوف غيرك لا اركان ولا عشره منه
لتكعد تعددلي ناس مماخذين جزء من تفكيري..
-تردين تقنعيني بس اني شاغل تفكيرج.. سمر هيه مال كلاوات.. يوم كامل ما رفعتي خط وحاجيتيني واني كل فكري بيج وانتي مو يمي..
-بكر تقتنع او متقتنع .. براحتك.. هذا العندي ودا اكوله الك.. نمت علمخده.. وهوه يزفره. ابتسمت وكلت شلون عصبيه تخبلني..
ما حجه.. يمه من يزعل يقفل.. ما رد.. بكررررر
-همممم ..
-تعبانه
-حقج من الركص عيني.. ذابه لحم بالفيديو..
-هههههه مو عيب تشوفه.. متخجل..
-ما شفته بس سمعت امي تحجي ويه عادل وتكله تعال شوف سمر شلون تركص جريته من ايدها..
لمحتج بالفيديو تركصين.. مسحته بدون ما اشوفه.. وكتلها محرم عليها بعد متستحين تشوفيها
- اموت عليك..
-جذابه واكبر حياله
- تدري كل الاحتاجه هسه شنو..
-شنو.. ؟؟؟
-اخلي راسي على كتفك وانسى العالم وارتاح
-اجيج..
-ويييين.. 😱
-للبيت
-علمود يثرمونه.
-جبانه..
-اكول سؤال بروح اهلك.. انته عقلك عايش بالعراق لو وين.. تفكيرك مو عراقي ابد
-ههههههه دروحي يابه روحي ارتاحي.. وهاااا احسابج بعدين..
-امووت على احسابك ههههه باااي
-ام لسان صايره اويلي منج اخخخ
-راح انام..
-نامي منو لازمج..
-متقفل خط..
-ما عاجبني
-رصيدك حرامات..
-ام فليس ما ماخذ من راتبج
-هههههه يا راتب غير كون اشوفه لربع الشهر ميبقى
-ما بيج حظ غيير
-وشسوي.. ما الحك..
-دروحي نامي يابه صوتج كوه يطلع..
-تعبانه
-افتهمت والله..
-عاابت
-ههههه باي
-بايات. قفلت الخط.. وباوعت لرقمه.. ياربي حتى رقمه اعشقه..
نمت ثاني يوم الساعه ب7 سبعه كعدت.. كتلها ماما شنو عمتي مصورتني واني اركص..
كالت لااا يمكن رنا.. شكيت بيها.. وكتلها خاله لا تصورين.. كالت لا جاي اصور نفسي..
وانتي شمدريج مصوريج.. غلست سويت روحي ما سمعت.. ورحت للحمام ركض..
انوب تريكنه.. وكملنه ورحت ويه نجوى للصالون.. لبست فستان عندي وردي بدايته كرستال والباقي تور..
حلوو واسع ومستور لان زواجهم بقاعه ومختلط.. ما اكدر البس براحتي.. نجوى طلعت تجنن.. عيوني موكفن من البجي عليها..
بس ما بينلها.. بس واضح بعيوني.. صارن حمر.. بس اكولها من العدسات موالمن عيوني..
اجينه للبيت وصفكنه وضحكنه.. وكلتها شوي خاف تجوع وهيه عروس تستحي.. وكلتها شوي شوي علمود لتخرب حمرتها..
للساعه 3 اجت الزفه.. اخذولنه سياره اني وامي وخالاتي وبيبي ومرت اركان بقت بالبيت حامل متكدر ..
اخذونه للتصوير صورنه وياهم شوي.. واساعد بنجوى بوضعيات التصوير كملنه طلعنه..
ولا كأني متزوجه قبل كل هلخطوات والشغلات مسولياها بعرسي من عادل.. عرس اسود صار عليه..
واصلا بعمري وياه ما حسيت اني متزوجه.. لان الزوج يداري مرته يصرف عليها يغار عليها.. هوه كل هاي ما سواها وياي...
توصيلة جامعه جان يتعاجز ياخذني يكعد بكر من الصبح كل يوم ياخذي.. كل هلذكريات مرت واني بزفة عرس نجوى..
مو احسدها بس اكول شبيه حظي مو مثل البنات.. ماكو فرحه الي كملت.. لازم يطلع شخص بحياتي ينغص عليه
وصلنه للقاعه.. الدنيا مكلوبه. جماعة مازن واقرباءه ..ودي جي وهوسه هوسه الشباب هوستهم مو مثل البنات
عياطهم هالي وصوتهم خشن يدوخ.. امي ما تحملت. شويه وتخربطت.. رجعوها هيه وبيبي بسياره.. كالت امي ابقي ويه نجوى لتعوفيها.. خالاتج يمج را يبقن
كتلها روحي هاهيه
وكفت اخر الحفله واصفك بمكاني. لان بنات نزلن يركصن وشباب .. وهوسه.. بس نجوى كل شوي.. وصاحتلي واروحلها..
وكفت يمها.. مره من اهل العريس. كالت اليشوفج البارحه ميكول اليوم هاي انتي. شنو صفكي اركصي..
كتلها هناك بيتي والعب بيه. ما اكدر اركص كدام الناس استحي.. بس عود يفك مني مازن..
مشغلين شعر شعر ويهز جتف ويكولي هزي سمرمر هزي ههههه.. بس اني اصفك ما هزيت.. كلها شباب لو اموووت .
لشوي اجه ولد عرفني عليه مازن.. كال هذا ابن خالتي عمار.. ابتسمتله.. ما اعرفه عشنو يعرفني بيه.
واكفه اضحك واصفك ومندمجه بالجو.. جان اسمع صوت من وراي..بأذني يهمس
-احس الفرح ضحكات مخلوقه بس لخدودج.. التفتت هههههه....يتبع
🌺🌺🌺🌺🌺