اصابع الندم..

(1)

في مدينة ام درمان في حي من الاحياء البسيطه ذات الطابع السوداني الممزوج برائحة النيل تسكن نهي مع عائلتها المتواضعه المتكونه من بنتين وولدين ووالدها متوفي ووالدتها ربة المنزل....نهي وندي..الاولاد نبيل ونادر..

نهي خريجة جامعة الخرطوم تثابر من اجل ايجاد وظيفه تحمل يوميا اوراقها زات حبر التوقيعات الذي كان من ضمن دنائس الحكم
البائد..اما اختها ندي كانت مازالت تدرس بالجامعه واخوها نبيل موظف بشركة قطع غيار سيارات ونادر كان سائق هايس خط مواصلات...اما امهم كانت ربة منزل اسمها نعمات..

العائله دي ماحتخلو من الطابع السوداني في تربية البنات ..وبقولو الماعندو كبير يشتري كبير..نبيل ونادر كانو حريصين جدا علي اخواتم..لكن بنفس الوقت بخافو شديد عليهم وبحبوهم وصريحين مع بعض...

في شخصيات في الروايه دي حنتطرق ليهم بتسلسل الحلقات..

اعرفكم ع نفسي اكتر...انا نهي عبدالعزيز انا ماحاقول قبيلتي وماادراك ..اتفقنا نكون في السودان الجديد لاجنس ولالونيه✌ملامحي سمراء قد قال الجمال لها قفي لاانال من عينيكي نظرة محتضر...متوسطه الطول زات قوام ابنوسي مشبع بالانوثة ..لااقول انا جميله وقصص الوهم التي تلطخ من خلف الكيبورد..انا اتخرجت من جامعة الخرطوم وقضيت خدمتي بعد جهد جهيد مع اخواني نادر ونبيل. ديل ماشاءالله ماشه وين وجايه من وين..بس احلي اتنين في حياتي...
انا مهوووسه بعشق الجمال ومكدسه بالمواهب..ممكن تلقوني في اي شي..طبخ ورسم وميكب وكتابات وامتلك صوت قوي في الغناء..يعني اليوم كلو بدندن داخله ومارقه ..بس من اشوف نادر بقطع الصوت وبشتغل صايلن لانو مانعني اغني نهااااي..

ندي اختي بتلاقوها عكس تياري ده..يعني مهوسه بحاجه اسمها صحبات ..لكن انا بكتفي بصحبة وحده ومابحب التكلفات والتجمعات...

نهي:(وانا برتب في شهاداتي)امي انا ماشه العربي في شركة عاملة اعلان وظايف في.. تطبيق السوق المفتوح ...

امي:كلمتي اخوانك ولاطالعه بدون اذن..
نهي:كلمتهم ..يلا يمه دعواتك ..

انا لبست لي عبايه وطرحه فقط لااكتر ..وميكب خفيف باابداع ..طلعت ووصلت مقر المعاينه..
كانت شركه كبيرة بشراكات عالميه..

دخلت لقيت البنات مااشااء الله برقشن..شي فساتين وشي بناطلين وشي شعور مسدله وطرح ماف وشي حاجات كده ماعرفتها ده ياتو نوع..المهم وانا داخله مقر الشركة علي الرسبشن والكراسي كلها ملانه بنات..انا ضامه علي فايلي المحتواهو شهادات..وشايله شنطة صغيرة لابساها سيافي من اليسار لليمين...انا انبهرت واندهشت واتكشمت..قلت خلاص ديل واسطات واهاليهم راسطات..والعندو واسطه امورو باسطه...رجعت لورا وقلت يانهي اتخارجي المزز ديل ماتخشي وسطهم..ومدام هم بالمنظر ده اكيد طالبين المظهر..تاني اتراجعت وقلت ع الاقل تكون من ضمن التجارب الفاتت..قعدت وصلحت طرحتي وراجعت اوراقي ومشيت قدمت الفايل..كان بنادو الاسماء وبنخش اتنين اتنين ..جا دوري ودخلت والكانت معاي عباره عن مول ماركات متحرك..قلت في نفسي حسي دي جايه لشنو ومحتاجه الشغل لشنو ..اهو لابسه ماركات ومدلعه ومفتاح العربيه في يدها..

دخلنا مكتب وكان فيهو الانترفيو..عباره عن اربعه رجال تلاته شياب وواحد شاب كده في سن التلاتينات..انا قعدتا اقرا في سري اي سورة حافظاها..

سالوني اسأله كتييييرة ومزحومة منها انجلش وعربي ومعلومات وووو..
والبت المعاي بتعاين لي نظرة استهتار وكانها بتقول لي ماتتعبي نفسك ..

قالو لينا ننتظر في الرسبشن ونتيجة القبول حتطلع بعد ساعه..

مشيت ع الكفتريا واشتريت فطيرة طعميه وبارد وانا باكل جا الشاب الكان من ضمن الانترفيو وقعد قصادي وطلب فطور..بدا يشاغل ويتكلم بالتلفون مع زول وبقول الغاز وحركات بالوش...انا عاينت ليهو شديد في عينو لدرجة انو مارمشت مساااااافه وبعدها عملت ليهو حركة😤بمعني اخرس...وقمت علي حيلي طلعت بره الكفتريا..جا لاحقني وبعاين بطرف عينو لحد مامشي دخل المكتب..

انا قلت خلاص كده كده مرفوضه وماحاتقبل...دخلت الرسبشن ولقيت القبول طلع والبنات مزحومين عليهو..حاولت اخش علي المكان ماقدرت ..جا زولكم المنفسن ده من بعيد بعاين لي وبتكلم مع عمو كبير شغال في الشركة عامل..عمو جاني واداني ورقه في يدي..
فتحتها لقيت مبروك اتقبلتي من ضمن الثلاثة المطلوبين في الشركه وده رقمي اتصلي عليهو...

عاينت ليهو اشر لي👍اديتو ضهري وطلعت حولت رصيد..قلت اليلا اوريهو انا منو...

اتصلت طوااالي رد قال عارفك حتتصلي..

قلت لو سمحت يااستاذ انا مابالمفهوم الفي راسك ده ولو مفتكرني عشان الشغل ممكن اتصل عليك لا انا ماعايزه اشتغل في شركتك دي ممكن تدوتي اوراقي ..

هو:ابردي ياام عبايه اولا انا مااستاذ انا موظف زيك دخلت معاينه واتقبلت واترقيت بمرور الزمن والشركه ماحقتي ولاعندي فيها غير مكتبي الخاص بس..وتاني حاجه انا عايز البنات المحجبات ذيك كده في الشغل وانتي الوحيده جيتي محجبه والاتنين الباقين الاتقبلو واسطات فوق...اها وعرفتك لاني ركزت ع اسمك وصورتك..وجيت الكفتريا ولقيتك صدفه. وماتاخذيني اذا اتعرضت ليكي بكلام او مشاغله ..انا عادي ممكن اهظر مع البعرفو والمابعرفو..

انا:عن اذنك ماشه المواصلات..
هو:خلاص اولا خشي شوفي معلومات وظيفتك وموقعك وامشي...

يتبع