اصابع الندم..

(3)

واصلت دوامي عادي وماشفت خليل ده تاني نهائ الا تاني يوم...

من هنا بدات قصتي مع خليل..قصه محتواها الندم والحسرة والضياع...

خليل ممثل بارع وبتفنن في حب البنات..وانا اصلا ماشغاله بتصرفاتو ناحيتي..

كان بعاين لي نظرات وابتسامات وضحكات بطيئه كده...يعني لو اتلاقينا في اجتماع مابشيل عينو مني..او اذا اتلاقينا في كفتريا الشركه بعاين وبتبسم ..

بشاهد حالاتي الفي الواتساب كان بنسخا وبعملا في حالة الواتساب تبعو وقصص الايمو..

انا بديت احس انو عندو شي تجاهي...بس اتقاضيت حركاتو وبقيت ماانتبه معاهو كتير..
..بشتغل بعدم انتباه حتي لو جا مكتبنا مابرفع عيني بعاين ليهو بكون مشغوله في الكمبيوتر ..

في البيت جهزت ملابس دوام بكرة ..واتمسحت بكريماتي😂ولفلفت شعري كعكات ...رقدت نشطت نت زين يومي..فتحت صفحة الفيس لقيت في طلب صداقه من خليل ..انا كنت داخله باسمي كامل..وافقت ع الطلب..بعد ثواني جاتني ملصقات ترحيب من خليل....

بعد دقيقتين نزل منشور ....كاتب تاق لN:

((ُهي كأول قطرة مطر بعد شهور من الجفاف♡ُهي كاستحابة لدعاء يئس صاحبه♡ُهي  كسجدة لشخص مثقل بالهموم اراحه الله وابدل همه راحة♡ُهي  كهدوء الارياف وخضرة الاعشاب ُهي كاول جرعة ماء بعد صيام مؤمن في يوم حار ومتعب ُهي كل شي جميل في حياتي بل ُهي حياتي♡❤
هي شي جميل كنافذه تطل على كون اخر غير هذا الكون (جاءت على شكل حياة جديدة)
هي كروح طاهره بنفحه ملائكيه سقطت ف الارض لحكمه يعلمها رب العالمين 😴💙))..

شاهدت المنشور وماركزت كتير ..ونمت..الساعه اتنين كده تلفوني ررررررن...

اتهجمت وقمت فازعه علي تلفوني وماعاينت المتصل منو فتحت الخط وبخلعه الو الو الو...ونفسي كاتم..

خليل:براحه براحه مالك يانهي مهجومه..

نهي:منو معاي.
خليل:كدي صحصحي وركزي انا خليل..

نهي:خير ياخليل حاصل شنو..

خليل:عايز اتونس معاكي حبه..

نهي:نعم..عن اذنك ياخليل..انا حاقفل الخط....وقفلت الخط ..

الصباح نفس المكان البقعد فيهو خليل بشرب شاي جمب الخاله .جيت ماره ..واتزكرت انو باليل خليل اتص علي..

مشيت المكتب وقعدت اراجع الحصل باليل ..جاتني رساله واتس من خليل..

خليل:انا اسف يانهي بس والله
عايز اتفاهم معاك..

نهي:جاري الكتااابه.....علي شنو يااستاذ خليل..

خليل:ممكن الاقيك بعد الدوام

نهي:لا...

وقفلت البيانات ..

(مساخه حامضه😁)

جا خليل المكتب ونهااائي مارفعت عيني عاينت ليهو..وكاالعاده يتثاقل ويتونس مع الموظفين ..وحتي ان قال كلام مضحك بتحكم بنفسي ومابضحك..

وانا طالعه علي البيت جا لاحقني وقال لي ممكن ثواني من وقتك..

نهي:خليل لو سمحت انا اخوي نادر شغال خط مواصلات لو لقاني واقفه كده عادي ممكن تطير رقاب..

خليل:خلاص ارح نمش الموقف ومن بعيد بعيد نتمشي..

اتحركنا وكل واحد بعيد من التاني ..وخليل متقدم مني خطوات يعني البشوفنا بقول مامع بعض..

وقفنا جم مواصلات ام درمان..
ّ
واثناء ما انا واقفه جا اخوي نادر بالهايس والكمساري المعاهو بنادي الثورة الثورة..

ناديت خليل خليل اديني الفايل الفي يدك ده سرعه وزح بعيد خالص..

مد لي الفايل وانا غطيت بيهو وشي زي المتضاريه من الشمس..

اخوي نادر بعاين يمين وشمال ومركز مع الركاب العايزة تركب وانا حسيت انو هو بعاين لي وبتفحص فيني..انا ثبتة ومااتحركت ..وكان عادي ماحيحس انو معاي زول بس ماقدرت اتصرف وخفت...الهايس ملا واتحرك بعيد..حتي اتنفست ومديت الفايل لخليل.

خليل:مالك مرتبكه وفي شنو..

نهي:ده اخوي نادر السايق الهايس خط الثورة..

خليل:ههههههههه منظرك صعب.....
يانهي انا بحبك وعايز ارتبط بيك

نهي:😨خليل انا اتاخرت ..اتقدمت سرعه وجريت ركبت الحافله..خليل جا وراي وقعد في نفس مقعدي..

نهي:خليل لو سمحت انزل ..ارتبكت واتلفت يمين وشمال ..خفت يكون في زول من حارتنا ..

خليل:حانزل قدام وحارجع العربي عشان اركب مواصلاتي..نهي فكري واديني رايك انا والله جاد معاك

نهي:مارديت وبقيت افتش جو شنطتي وطلعت محفظتي وبقيت اتاوق للكمساري..

وخليل خاتي يدو في خشمو وببتسم بالبطئ ع تصرفاتي..

خليل:عيب يانهي انا بدفع ..وبعدين ياخ اعتبريني ماموجود واتصرفي عادي..

عاينت ليهو بغضب واتلفت علي الشباك..اقرا في اللافتات..يعني عندي هوس كده اسمو قراية لافتات لحد مااصل البيت...

خليل:نهي انا حانزل المحطه دي وحاواصل معاكي واتس وماسنجر..

نهي:ليه بتعمل كده مش انت عندك وحده في حياتك وع طول بلقاك بتتكلم معاها..انت عندك حب البنات ده لعب يعني..لو مانزلت انت انا الحانزل..

خليل:طيب يانهي نتفاهم بعدين...

يتبع...