اصابع الندم..

(2)

بعد قبولي في الشركة..دخلت وعملت اجرءات وتوقيعات عقد واستمارة بيانات ووو.زحمة..طلعت وقفت في العربي عشان اركب مواصلاتي..جا الشاب الموظف في الشركة ووقف جمبي وشايل ليهو شنطة لابتوب ..قال لي...

ازيك يانهي انا اعرفك علي ..انا اسمي خليل من ابناء العمارات.خريج جامعة الخرطوم ودرست ماجستير في تركيا..اها انتي ماشه علي وين..

نهي:انا ماشه علي امدرمان ..

خليل:ماف تشرفنا ولاشي😊

نهي :اهلا بيك..عن اذنك الحافله ديك متحركة..وخليتو واقف واتحركت..

بقيت اتكلم في نفسي..اها دي حركات وبدايات وعوارات عشان يلقي لي مدخل..ابقي راجل وتاني اتكلم معاي الا اديك في نص راسك ده ..ماانتهبت الا والكمساري..طق طق يابتنا ارح يلا ادفعي...

وصلت البيت لقيت امي شغاله غسيل ملابس جريت حضنتها وفرحتها اني اتقبلت في الشركة..

دخلت المطبخ ظبطت لي محشي وسلطة اسود ومكرونه حلوة..ومليت السيرمس شاي ساده بقرنفل .وفرحانه ادندن داخله ومارقه..وغسلت المطبخ فل..

دخلت علي دولابي طلعت كل عباياتي وطرحي وملابسي ودخلتهم الغساله..

جو اخواني اتغدينا وشربنا الشاي..كنت مبسوطه وفرحانه ..

طلعت مشيت سوق ام درمان عندي زول طيب بتاع بوتيك ..فتحت عندو حساب في الدفتر شلت كريمات وعطر ومزيلات وكم طرحه ومكياج وكلمتو اصرف الراتب واجي احاسبك..

جيت البيت كويت عبايتي وعلقتها وحضرت شنطتي ورقدت بقرا في حصن المسلم..جاتني رساله في الواتساب.تررررن

بعد كملت ازكاري.فتحت الرساله..

مسا الخير نهي..

عاينت صورة البروفايل لقيتا صورة خليل وهو في مكتبو الخاص في الشركة..

عملت للرساله seenوقفلت النت ورقدت افكرّ.ده مرسل حسي معرفة بتين استغفر الله الزول ده عشوائي شديد وانا لازم اوقفو في حدو..

الصباح لبست وطلعت المواصلات وانا في الحافله فتحت النت نزلت رسايل كتيرة منو..منها ملصقات ترحيب ومنها فديوهات مضحكه..فتحت الرسايل لقبنو متصل الان..قلت الزول ده شكلو مابنوم وفارغ ساي ودردشاتو كتيرة..طوالي دخل لي

خليل:اها اليلا اول يوم حنجي ولاحنغيب...

قريت الرسايل قريب عشرة دقايق وقفلت الشبكة..نزلت وبقيت ماشه علي الشركة..

اول مدخل باب الشركة لاقيتو قاعد جمب ست شاي بشرب قهوة وفي ايدو سجاير..

عاينت بطرف عيني وعملت نفسي اني ماشفتو وطوالي دخلت الشركة ومشيت علي مكاني العبارة عن مكتب متكون من اربعه كمبيوترات كل كمبيوتر فيهو موظف..قعدت في كمبيوتري وادوني اليوزرنيمّ..وبديت ادخال واخراج ملفات..
اشتغلت بحماس لاني كنت متشوقه لوظيفه شديد..بعدها طلبو مني اوراق من المكتب التاني..

مشيت المكتب ودقيت الباب ودخلت لقيتو زولكم خليل اللايوق..وبتكلم بالتلفون وبضحك..وقفت مسافه وهو بتكلم مع بت صوتا واضح بالتلفون..اشر لي اقعدي..اشرت ليهوشكرا ..قفل التلفون وعاين لي شديد

نهي:لوسمحت عايزين منك ايصالات البضايع المستورده..

خليل:اقعدي اجهزم ليك..

انا قعدت وبعاين في مكتبو عبارة عن كومة سجاير في الطربيزه..

هو جاب علبة شوكلاته وضيفني واداني ملف ايصالات..

وانا طالعه..قال:ع فكرة نحن عندنا قروب واتس خاص بموظفين الشركه ممكن نضيفك ..ولشنو مابتردي الرسايل..

نهي:عن اذنك منتظرني..وطلعت مشيت

يتبع