الحلقة 8
علي جي لحوشنا بدون علمي لان توقع لو جي مش ح نفتحله الباب ولا نطلع نتهرب جي لحوشنا فتحله بوي قعدو هدرزو عليا نسمع ف صوته وقلبي يدق م الخوف
علي: عمي ممكن تناديلي ع مروة نبيها ف موضوع شوي
بابا: حاضر شوي وناديهالك
بابا طق ع غرفتي طلعتله كلمني قتله حاضر وتيت روحي ونزلت طلع بابا من المربوعه وخلانا نهدرزو ع راحتنا
علي: مساء الخير
أني : مساء الفل
علي: خيرك
أني:؟؟
علي: لاحظتك تغيرتي عليا فترة لفاتت شن في غلطت ف حقك اني وداسة عليا
أني: فكنا علي من الدسكة المخبشة متاعك لا تغيرت لا شي ولا غلطت فيا لاشي
علي: توا وليت علي حاف وينها علوشتي لتناديلي فيها ديما وخيرك تدوي معاي هكي
أني:هفففففف بنمشي ونخليك ره كان بتدويلي هكي من غير شي راسي يوجع فيا
علي: باههي خلاص اني جيت بنقولك ع موعد العرس شن فكرتي
أني : اي فكرت ياعلي وبنقولك شي
علي: تفضلي ان شاء الله خير
أني: أني معاش نبي العرس هدا ونبي نفسخ الخطوبة
علي والصدمة ف عيونة : كيف وليش
أني :فكرت ف موضوعنا واني منبيش نتعب معاك وانت شوف حالتك المادية ولو حتى صار عندنا ولاد حيعذبو اكثر أني بنت متربيتش ع جو هدا وكل منقولك شي تقولي نجمع ونشريلك واني نصبرلك بس بعدين لامتا بنصبر اني بنت نحب نشوف حياتي سامحني بس اني منبيش نظلم روحي ونظلمك معاي صح عشت معاك احلا ايامات حب بس خلاص توا وقت الجد وحبي ليك مش حينفعني بعدين
علي : ههه ولتوا تقولي الكلام هذا
أني: حاولت نفتح معاك بس مقدرتش أني أسفة
علي: نقولك شي يابنت الناس صح اني حالتي المادية تاعبة بس لعلمك الفقر ماهوش عيب المهم يكون راجل ويصونك واني حبيتك وتمنيتك حلالي وفلوس الدنيا تمشي وتجي عقيلتك هادي مسوسة أني حنفد طلبك مع انه صعب عليا بس زي مقلتي تبي تعشي حياتك واني مش حنمنعك بس ردي بالك بعتالي تطرقي بابي مرة تانية لان بابي مصكر ليك للابد
طلع علي ودموع نزلوله م القهرة واني مدورتش وقلت تفليم وجوو مش ح توقف عليا سيورة تو يحب مرة تانية نقعد غير حاصلة فيه اني ولأول مرة نحس انه اني انسانه بلا ضمير واحساسي نعدم
اتصلت بأمير وهدرزنا وكانت فرححتي تسع الكون كله ومدورتش علي بكل وكنا نحكو ع الخطوبة انها غدوة وحيتم الشي ع سريع بدون اي عراقيل
اتصلت بصاحباتي قتلهم لازم نتلاقو اليوم عندنا ف حوشنا بنحكيلهم ع موضوع
الساعه 6 العشية
جوني البنات فتحتلهم الباب ودخلتهم ف داري هدرزنا بعدها حكيتلهم ع كل لصار بين علي وبين امير
أسيل وبيسان مصدومات بكل انه اني نكون انسانة بلا ضمير لهذه الدرجة
أسيل : بجديات قولي نبصر تي مستحيل انتي تموتي ف حاجة اسمها علي كيف صار اني منصدقكش
أني : ههههه ده كان زماااان بالله هدا مناقص ناخد واحد فقري ونعيش معاه عيشة الفقر
أسيل : مصح وجهك وتقولي فيها والله حرام عليك انتي من امتا تغيرك الفلوس من يوم يومك عايشة ف عز وعمرها مغيراتك الفلوس اصحي اصحي ع روحك ولد عمك مخداكش الا لانك غنية وطمعان فيك كانك فقرية زي متقولي ع علي راه متلفتلكش بكل
بيسان : وليتي زي معاذ بالضبط عيلة زيه متوقعتكش ف يوم م الايام تقولي هكي تضحكي ع ولد الناس وتعلقي فيه وتخليه بكل سهولة بحجة الفلوس ياخامرة
أسيل :خليها خليها تو تندم ولو بعد دهر
أني : هاهاها ضحكوني وانتي يابيسان احترمي نفسك انتي الخامرة مش اني يامضحكة لعب بيك ولد جاي من الشارع وخلاك تحبيه وهوب سيبك وانتي زي الحمارة لتوا تحبيه بري شوفي واحد فلوس وعيشي حياتك يامهزبة ولا انتي يا أسيل دايرة روحك تحبي وتتمعشقي تي ياماما لو خداك واحد زي علي تو ديري زيي واحرف هي مع السلامة وبدون مطرود حق فيا اصلا لحكيتلكم وفوق ماتوقفو معاي جايين ضدي هي بسلامه
وأشرتلهم ع الباب
أسيل وبيسان : حق فينا احني اللي صحبنا وحدة زيكك الله يمهل ولا يهمل
طلعو وسيبوني واني ولا على بالي نفكر شن بنلبس غدوة رقدت واني فرحانة ولا فكرت ف كلام صاحباتي ولا ف علي
يتبعع ...
زعممهه شن بيصير لمروة ولعلي وهل مروة حتندم ولا حتعيش حياتها مع امير وحتنسى علي وصحباتها
أنت تقرأ
الضالمة ( روايات ليبية )
Romanceمن اغرب الروايات الليبية رواية #الضالمة سرد القصة 👇🏻 تدور الاحدات حول بنت احد العائلات المحافظة يقف في طريقها رجلين احدهم ابن عمها تقع في العديد من المشاكل مع زوجة عمها وصلت لتفريقتها من أصدقائها مما يجعلها تحب احد من الرجلين و الآخر تضحك عليه...
