ستلاحقكم أرواحُ الشهداء أينما ذهبتم، حتىٰ في الجحيم سترىٰ مساوئُ دموع والدةٌ فقدت أبنها الذي لم يكمل الثامنة عشر من عمره .
■ تعرفون ليش الشعب العراقي من أكثر اللشعوب الشجاعة، الغيورة، الطيبة، أهل الخير، وأهل الايثار، وأهل الكرم، فقيرنه غني بـ أنسانيته وعطاءه؟! لأن أحنه من أكثر الشعوب الي عانت ولسه جاي تعاني وتنطي تنطي كلشي ارواح ودماء وخيرات ومجاي تاخذ شي. لأن أهلنه ما ذاقوا طعم الفرح عاشوا بحروب واجالنه أحنه الدور هم أنو أنولدنه بزمن الحصار وعشنه بزمن صدام وشفنه كل الجرائم، وراها أستلمونه داعش وجرائم سبايكر وغيرها وغيرها وشفنه ظلم الحكومات المتتالية علينه وطلعنه مظاهرات وخسرنه وضحينه بشباب وبأطفال وبنساء وبشيبااات وبجنود شجعان بس لسه أحنه #بلد_يحب_الحياة ويتمنى يعيش بسلام وراحة، ولسه الأمل عايش بداخلنه أنو راح يجي يوم نعيش مرتاحين رغم كل المعاناة بس الأمل #ما_مات. ● شايفين شعب يطلع بمظاهرة سلمية يشيل علم بلده بالمقابل يشيلون قنابل ورصاص ويرمونه؟ ● شايفين طفل يلزم هالعلم ويروح قريب ع المكان الي تنطلق منه هالقنابل بدون ميخاف؟ ● شايفين شباب بعمر الورد يتسابقون منو يلزمها للقنبلة المسيلة للدموع علمود يبعدها عن الناس؟! ● شايفين رياجيل عاشوا طول عمرهم بالفقر يطلعون يشتغلون #بالتوك_توك ويحصلون باليوم ١٠ الاف او أقل يعيشون بيها أهلهم يجون بكل شجاعة ينقذون ويسعفون الجرحى ويخلص بانزين سياراتهم وميقبلون يگولون #محتاجين ويرفضون ياخذون أجرة يجاوبونك جواب واحد "احنه كلنه عراقيين عيب اخذ منك فلوس، واني جاي اخدم بلدي" ● شايفين أمهات تضحي وتضحي بهالاولاد وتگول "وليدي فدوه للوطن" 💔؟ ● شايفين نساء هالبلد الي رفضت الخضوع ورفضت التبعية وقيود اصحاب المؤسسات التعليمية الفاشلة وطلعت تتظاهر لأجل بلدها؟ وتواجدهن وهن يسعفن، ويطبخن، وينظفن، ويساعدن، ويتبرعن، ويعالجن وأكثر وأكثر؟ ● شايفين شيبة بلدنه الي محني ضهره وملابسة بالية ومعنده مصرف يعينه ومكسور ضهره يركض يشتغل في سبيل يحصل ع ٥ الاف يعيش بيها ابناءه، بالمقابل ابن المسؤول ميقبل ب٥ لو تنطي باليوم يصرف ملايين؟ ● شايفين طفل ميتعده عمره ال ١٠ سنوات يشارك بالمظاهرات يگولوله: بعدك صغير ارجع يگوللهم: "لا مو صغير اني اخويه انقتل قبل يومين وجاي اتظاهر بمكانه"💔 ● شايفين ناس محافظاتها منكوبة وعايشين تحت رحمة ناس متخاف الله وتهدد بيهم بس مخايفين وطالعين يحتجون كل يوم وجاي يواجهون الفصل من المدارس بس مو هامهم شي "موصلنا🇮🇶♥️" - وشايفين وشايفين وشايفين... الخ لو أبقى أحچي مدى العمر ما أوفي بحق بلدي وشعبي. الي اني فخورة بي حيل حيل، فخورة لأن اني بين هيچ ناس يضخون شجاعة، وغيرة ومرجلة، وأنسانية، وفخورة أكثر لأن اني بنت هالارض وبنت هالبلد الي يستاهل ويستحق لقب بلد العطاء، بلد الحضارة، بلد الامل، بلد التفاؤل، وبلد الثورة، بلد الحرية والاحرار بلد الحب، بلد الحياة..وأكثر وهذا بلدكم الي لازم تفتخرون لأن انتم تنتمون اله 🇮🇶♥️ صدگوني العراق فخر بين كل البلدان🇮🇶♥️
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
