بعد صلينا العشاء جيت البيت غيرت ملابسي واتجهزت للحفلة بآخر شياكة قميص كيف كيف وبنطلون رجعت ودخرطوم تب،،عشان ابقي ظاهر للامورة ملاذ لانو ذاتو ما متعود علي لبس الملابس البلدية ديك،،اتوكلت علي الخلق السماء وبقيت مارق،،لاقاني جدي علي قال لي ماشي وين متجيه كدة تقول ماشي تخطب!!!!هههه ناقش الوهمة جدي،قلت ليهو ماشي الحفلة دي الواحد يغير جو وينطرب مع نغم البلد الحنين دا،،قال لي نغم البلد الحنين ولا في حاجة حنينة تاني؟؟؟قلت ليهو انت عارف وانا عارف ياجدي فشنو خلني النمشي احصل النغم الحنين من بدايتو.......
طلعت علي مكان الحفلة والكشافات دي مولعة تديك احساس انو الليلة في كورة عالمية في الساحة دي،،شوية كدة وجا بتاع الساوند وركبو الساوند وبدا *ون ون تست تست* والحركات بتاعتم ديك بعد شوية جا الفنان آخر شياكة والفرقة اترصت والحفلة بدت،،غناء راقي وبمزااااج يديك احساس الفنانين الكبار،،اتمنيت انو يدخل ليهو في حاجة لمصطفي سيدأحمد مع ظهور ملاذ لكن مافي حاجة فشنو قلت امشي ابشر واطلب لي منو حاجة لمصطفي مع انو عارف انو زي مصطفي مافي لكن الضرورات تبيح المحظورات،،لمن ظهرت ملاذ وبقت واضحة لي طوالي مشيت علي الفنان وطلبت منو أغنية لأبو السيد فناني المفضل لكنو إعتذر لي اعتذار جميل قال لي دا ما بهبشو دا الكبير،،والله الساعة ديك اتكيفت منو اكتر من انو كان يغنيها لي،،وبقيت راجع وبقعر عيني متابع ملاذ لقيت متابعاني ياربي صدفة ولا قاصدة!!!!البت دي بتودي وتجيب،،قلت انا ازح بعيد من محل الحفلة لو عندها لي حاجة بتلحقني،،لو ماعندها لي حاجة ما بتلحقني وبكدة انا ذاتي ابعد طيفا من خيالي،،فعلا مشيت مسافة انو تاني مافي زول بشوفني شوية وحسيت بزول جنبي ولقيت الملاك الابيض بجلالة قدرو واقف جنبي ما عرفت اقول شنو لكن هي قالت لي،،انا بشكرك كتير علي الكلام القلتو أمس لابوي....
-ياتو كلام دا؟ *وانا عارف هي تقصد شنو بس حبيت اطول الكلام بيني وبينا*
-انو البت اصلا لقرايتهت والزواج ملحوق ومادام البت عندها هدف وطموح الناس تقيف معاها لمن تحقق هدفها،،وجد كلامك كان ليهو أثر عند ابوي،،وحقيقة بشكرك من كل اعماق قلبي.....
-العفو يا ملاذ لكن انتي مادام رفضتي كل عروض الزواج فلازم تحققي هدفك بأي شكل كان اوعك من تراجع اوفشل او استسلام *ولد دا وكمان بقيت ادي نصائح وارشادات ههههه*
-ايوة ان شاء الله ودعواتك لي، لانو حأقدم في جامعات الخرطوم وخايفة من عيشة الخرطوم بالحاجات البسمعها عنها....
-بالمناسبة الخرطوم مافيها حاجة تخوف كل حاجة علي رغبة الزول لو عايز تعيش في امان او انك عايز تعيش في خوف......
-لكن لقيت عندك رد سلس لكل حاجة ما شاء،،يلا انا امشي عشان طولت علي البنات بس حبيت اشكرك.....
-لازم يكون الرد سلس خصوصا في حضرتك يا بت ياحديقة،،،ومشت خلتني مابين الترقب والاندهاش وفي اللحظة ديك حسبت انها بتين تجي للخرطوم واكيد في الجامعة الواحد حيلقي ليهو فرصة يتكلم معاها،،من محلي وطوالي البيت جاك زول وبغني ومبسوط لقيت الجماعة نايمين وجدي راقد في عنقريبو وماسك سبحتو ويسبح لمن سمع حس حركتي قعد في نص السرير وقال لي اها ان شاء الله الطرب كان حنيين؟؟ قلت ليهو حنين وبس!!!طرب جميل طرب أنيق،،أخد ليهو ضحكة كدة ورجع لتسبيحو تاني...
كانت ايام العيد موزعة علي اخوالي وخالاتي وآخر ضحية كانت ضحية ابوي كانت في بيت جدي،،بأنتهاء العيد بعيد في الحاجة التبعد عني حبوبة إسعاد لكن مافي مفر،،اليوم الخامس بالضبط نشرب في الجبنة جات وقفت فوقنا وقالت لي يلا اجهز عشان ماشين للشيخ اب سوار 《في سري بقيت اطنطن ،،لاحولا ياخي دي حبوبة شنو واليقنعا شنو انو انا ما مجنون ولا حاجة والغريبة انو انا نصيح وهي شايفة انو انا نصيح يعني مافي اي حاجة ظاهرية تدل علي انو انا ممسوس،،لكن الله غالب》 خلاص خير ياحاجة بس مسافة اشرب الشاي والقهوة واستحم ونطلع،،قالت لي سريع وفاتت خلتني للخوف والترقب من اب سوار دا الله يقطع اب سوار وسنين اب سوار ياخي،،جدي شافني زهجان قال لي:- اصلا انت ما خسران حاجة احسن تمشي معاها منها تكفي شرها حبوبتك الصعبة دي لانو ما حتقتنع ليك لو نططت ومنها تنتهي من الموضوع دا والشيخ حيقول ليك نصيح زي الطلقة تجو راجعين قبل الفطور كمان،،غايتو كلام جدي شجعني شربت الشاي والقهوة ومشيت استحميت وبقينا مارقين علي اب سوار......
