الخاتم

اكتشاف الخاتم

الخاتم (الجزء الأول) :-
- أحمد مش ملاحظ حاجه ؟؟
- ايه يا محمود ؟؟
- الخاتم ده انتا من يوم ما لبسته والمصايب بدأت تحصل .. فكر كده كويس .. لازم تقلعه .. صوباعك اللي بيتلبس فيه الخاتم بيسخن بشكل مش طبيعي .. بقيت بتحلم بكوابيس .. حتي كلامك بقي عنف مع الل... .
- خلاص يا محمود متكملش لو سمحت .. انا مش هجري ورا خرافات واصدقها .. ده مجرد خاتم واللي بيحصل ده طبيعي نتيجة لإن منار سابتني .
- حتي منار سابتك بعد ما لبست الخاتم ده .. لسه مش واخد بالك ؟؟
- بقولك ايه يا محمود انا مبؤمنش بالخرافات دي سامعني ويستحيل هقلع الخاتم ده .. بقولك ايه انا زهقت انا مروح .
.
.
.
- هوا ده الحوار اللي دار ما بيني وبين محمود .. بجد يا طنط انا خايف عليه من الخاتم ده .. وقولت مش هيقدر عليه غير مامته ...
- كتر خيرك يا محمود يا ابني .. فعلا احمد بقي عنيف جدا اليومين دول بس انا قولت انه بيحصله كده بسبب ان منار سابته .
- بصي يا طنط انا عارف ان ممكن اللي بقولهولك يكون خرافات بس انا والله شوفت حاجات زي كده .. الخواتم ممكن يبقي ليها خدام من الجن وبيتعمل عليها الكلام ده زي الاعمال .. انا عارف ان يمكن احمد ميكونش مصدق ولا انتي تصدقيني بس انا مش طالب منك غير انك تروحي لشيخ او حد ليه فالكلام ده وتتأكدي .. واهو حتي لو عليه حاجه وهوا عجبه الخاتم ده طلعوا اللي عليه وخلوه يستخدم الخاتم عادي .. يا طنط احمد بقي بيمد ايده عليا وبيشتمني فالشارع وده عمر ما كان سلوكه .
- شكرا يا حبيبي انك نبهتني وانا اوعدك اني هتصرف .
- ده رقم شيخ عالج قبل كده حد من قرايبي لو احتجتي انك تتأكدي ياريت تبقي تروحيله ...
- شكرا يا حبيبي ربنا يخليكم لبعض .
- العفو طبعا يا امي .
.
.
.
قبل 20 يوم من مقابلة محمود لوالدة أحمد :-
في احدي البنوك المشهورة بالقاهرة :-
أحمد :-
- تحت امرك يا فندم .. نورت .
محمود بيقرب من المكتب اللي قاعد عليه أحمد وبيقعد علي حافته وبيقوله :-
- ايه يا معلم هنخرج فين النهاردة ؟؟
- اي حته يعني مش فارقه .
- ايه رأيك نطلع علي joy stick اقطعك كام ماتش بلايستشن ونشرب حاجات فريش كده .
احمد وهوا باصص للشاشة :-
- اشطه اجهز بقي عشان تتغلب .. اشطه هقوم اشوف العميل ده وارجعلك .
احمد بعد ما محمود قام خد باله من حاجه بتلمع عالمكتب .. لقي خاتم بفص احمر بيلمع وشكله مغري جدا محطوط علي المكتب .. احمد كان بيعشق الخواتم .. جربه فصباعه لقي شكله حلو جدا .. محمود قال لأحمد :-
- ايه ده انتا جبت خاتم جديد ولا ايه ؟؟
- هوا مش بتاعك ؟؟
- ولا اعرفه .
- يبقي بتاع حد مالعملاء نسيه .
يقرب منه محمود بعد ما خلص مع العميل ويقوله :-
- لا بس شكله حلو ف ايدك .
- لو جه صاحبه سئل عنه هديهوله .. مجاش يبقي رزقي ونصيبي .. بس عموما هحاول اخده منه لو حب يبيعه .
- شكله خاتم عادي مش فضه .. بس عموما يعني اقصي مبلغ فخام زي ده 300 جنية لو الفص بتاعه مش حجر كريم .
- هوا فيه حد فمصر هيلبس خاتم بأحجار كريم .
- هههههههه علي رأيك .. بس عموما عاجبني .
- بقولك ايه مبلاش تستخدمه .. اصل انا سمعت ان الاحجار دي ممكن يبقي عليها جن وكده .
- يعم فكك م الخرافات دي .
- انا بس بقولك اللي سمعته .
- مش هتيجي عالخاتم اللي يعجبني يعني يا محمود .
- اشطه مبروك يا نجم .
- حاسس اني دايخ شوية .. بقولك ايه متيجي نأجل البلايستشن النهاردة .
- اشطه مفيش مشاكل .
- خاصة اني دايما بخسرك يعني فهرحمك مني المرادي .
- ههههه لا يا عم انا جاهزلك .. وبعدين منا مخسرك المرة اللي قبل اللي فااتت .
- مرة وسط ست مرات .
- اشطه يعني مسيري اخسرك .
- اما نشوف .. بكرة نطلع .
.
.
.
بعد ما يوم الشغل خلص ومحمود كان مروح فالطريق الخاتم سخن ف ايده جدا لدرجة انه بدأ يلسعه .. بس هوا قال ان الخاتم بيتأثر بالحرارة .. وفضل الخاتم سخن لحد ما رجع البيت .. قبل ما يوصل البيت اتعرض انه كان هيتخبط من عربية وكان دايخ شويتين .
بالليل وبعد ما خلص محمود الصلاة وكل اللي عليه .. راح عشان ينام ولما جه ينام طفي النور وقرب من السرير لكن وهوا ماشي تجاه السرير حس انه بيخبط فحاجه مش موجودة اصلا فالأوضه حاجه الخبطة بتاعتها وجعته كإنه خبط فحديد .. رجع فتح النور ملقاش حاجه .. طفي النور وشغل كشاف الموبايل وقرب من السرير ونام عادي .. قعد يضحك وقال هوا الواحد مرهق ولا بيخترف ونام بعد ما نسي انه يكلم خطيبته منار ...
صحي من كابوس مزعج .. انه بيتاكل من تمساح كان بيجري وراه .. صحي بيتنفس بصعوبة وكإنه كان بيتخنق .. والغريب انه صحي بعد ساعتين بس رغم انه كان ميت من التعب ...
#يتبع
#الخاتم
#ابن_عشري
#دمتم_سند ❤❤
يشرفني متابعتكم علي يوتيوب قناة ابن عشري :-