الباب طق طق طق
ماما من المطبخ : صبي وحده منكن تفتح الباب بوكن في الحمام
روان صبت : تو نفتح انا
وطلعت وشويه هكي وسمعنا صوت هرجه برا
رويدا : حيا حي يا بنات حس هرجه بره ووو علياا كان مايقعدو هما
انفجعنا انا وريناد وطلعنا نحنا الثلاثه نجروو ونلقو روان مصبيه عند الباب
ماما طلعت من المطبخ منفجعه : شن في يا روان من ع الباب
روان قلبت عيونها : ولد سلفك
ماما فنصت في روان وردت بحتت في الباب : تفضل يامحمد خش
محمد : نبي عمي ضروري ياعمتي
ماما : خش راجيه في المربوعهه قاعد يدوش تو يجيك
محمد : باه
و طبس سلح كويشه وخش للمربوعه ولحقاته ماما
ونحنا مصبيات عند الباب ومصدومااات
ريناد بحتت في روان : شن في ياروان شن صاير
روان : واللهي فتحت الباب طلعلي الواطي هضا قالي كلميلي عمي قتله توا عرفته عمك تما يعيط علياا ويقولي كلميه مش ناقصه راه خلاص الي هي على جيتكن انتن
على طلعت بابا من الحمام
بابا وهو ينشف في شعره : روان كنه حسك عالي ياباتي
روان شافت الباب : لا شي يابابا غير في واحد يراجي فيك في المربوعهه
بابا بستغراب : من!!
روان : خش شوفهه بروحك احسن
بابا هز براسه وخش للمربوعهه
~~~~~~~~~~~~~~~~
في المربوعه
محمد مقعمز ومقابلته ماما وقاعدين ساكتين على خشت بابا
بابا قعد يبحت في محمد وهو مستغرب
محمد صبا وقرب من بابا وسلم عليه
بابا مدله يده وهو مزال مستغرب جيته
سلم عليه
بابا : تفضل قعمز
وقعمزو هما الاثنين
ماما صبت : خلاص هي انخليكم بروحكم
محمد : لالا قعمزي مرات عمي حتى انتي نبيك تسمعي
بابا : يامحمد كانك جايني على الموضوع المبدري راه انا سكرت عليه خلاص معش يندوا فيه
محمد : غير اسمعني بس وخليني نكمل للنهايه
بابا : باهي احكي
وبدا محمد يحكي البابا وماما ونحنا قعدات في الصاله نحرقوو وعلى اعصابناا بنعرفو شن في
~~~~~~~~~~~~~~~~~
مقعمزات في دار المعيشه ويهدرزن
سعاد : صبي يا امل ديريلنا قهوه
امل حطت فونها وصبت : حاضر باه
ومشت للمطبخ ولحقتها هاجر
هاجر : شن جوك
امل : ميه الميه
هاجر : دوم عليك
امل وهي مصبيه ع الغاز : سلمك
هاجر قعمزت ع الطاولهه : انساعدك في حاجه
امل : لاصحيتي بارك الله فيك
هاجر سكتت شويه وبعدين قالت : وين ايه
امل : في دارها
هاجر صبت : تو نعديلها
امل ماردتش عليهاا وتمت توتي في صفرة القهوه
طلعت هاجر من المطبخ ومشت لدار ايه ولما وصلت عند الباب سمعت ايه تحكي بالفون
ايه : شنووو
قصدك وصلت
باهي خلاص تمام هي
لالا ديرلي رنه تو نطلعلك طول
هي تم تم
باي
وفتحت هاجر باب الدار بلا حتى ما ادق وهي بتموت من الفضول بتعرف من الي كانت تحكي معاه
التفتت ايه وهي مصبيه ع الزيانه اتلف في شعرها وشافت هاجر
هاجر : خير ياحنه كيف حالك
ايه : كويسه وانتي
هاجر : الحمدلله
ايه : به كويس
هاجر : وين وانتي ديما كارسه كنك ماطلعتي عليناا
ايه : والله عندي ماندير مش فاضيه للمجاملات
هاجر بستفزاز : اها والله عندك ماديري نين خلاص يا متاع التشليط
وطلعت وسيبتهاا
اما ايه معدلتش عليهاا وكملت برمت على روحها خذت فونهاا وطلعت سلمت عليهم و ردت قعمزت في الصاله لعند مارن فونها ردت عليه وبعدها طلعت بسرعه للصور ولحقتهاا هاجر فتحت ايه الباب
ووووو
هاجر : هيييييييييييي
~~~~~~~~~~~~~~~~~
محمد : وهضا كل شي صار ياعمي
ماما : عليش يا احميدا ادير هكي عليش تخسر في رضا بوك
محمد : والله ياعمتي الموقف صار قدامي وماقدرتش انتحمل مفش راجل بدمه يصير قدامه موقف زي هكي ويسكت
ماما : ربي يحفظك وينجيك سلم وليدي ياربي لكن نا قصدي مانبيلكش الغضب بس
محمد : لا ياعمتي كنك على باتي هو اصلا على سبله وانا كنت ناوي نطلع ونسيبها لاه بككل مغير كنت انظم في اموري وتوا خلاص كل شي تمام
بابا بجديه : شن دوته تطلع لا تطلع لاسو من يوم وغادي هضا حوشك انا باتك وهذي امك والي جوا خواتك ولالا ياريم
ماما : يانعلي ياريت ياربي هضا اليوم المبارك واخيرا ربي حن علياا وحصلت ولد
وتمت ماما اتزغرت
لولولولولولولولولولولويييييي
محمد رفع راسه بصدمه مع احراج
بابا تما يضحك : هههههههههه مغير اس ياوليه خلينا نشوفو راي الوليد الاول
وشاف المحمد : ها شن رايك ياوليدي
محمد وهو متحشم ومطبس : والله ياعمي شن نقولگ
قعد ساكت وبعدين رفع راسه وقال ...........
#يتبع
