بارت5
اخذت الفراش للحمام وردت ارجع انام ،اتذكرت الغدا والصلاه عزااا اني صارلي يومين تاركه الصلاه لازم ارجع التزم ربي ماعافني بمحنتي وسخرلي مصطفى يحميني ،رحت صليت وافكر مال هسة اروح اگله گوم انت اطبخ غدا مابيه حيل!!
ههههاي اتخبلت اني، اصلا اني مااكدر اباوع بوجهة، جهزت الغدا تمن وتبسي عالسريع ورحت اصيحه، لگيته نايم وايده ع عيونه اقترب احاجيه شو هذا بسرعه ينام هنيالك عمي، همست بصفه ..اا مصطفى اكعد تغدا، افففف نايم، مديت ايدي ندسته مرتين فز باوعلي..هااا
..متتغدا؟
..شنو سويتي غدا؟بهالسرعه
..اي ، طلعنه للصاله نتغدا و عيونه محاوطتني فد احراااج احس جسمي حااار گوة كملت اكلي وكمت الملم بالمطبخ واسوي جاي اكيد يخلص ويصيح ع الجاي،
و فعلا شويه وسمعته صاح: جاي جاي
..صبيته وطلعت جان متمدد عالقنفه وعيونه ع التلفزيون اني طبيت وعيونه تحولت عليه، اليوم جان يباوعلي و كأني كائن غريب وكأني فضائية!! واني منا شلون متوترة احس نفسي مجردة من ملابسي،
مديتله ايدي بيها الجاي، وهو يباوع بعيوني لزم ايدي يتحسسها واخذ الجاي بايده الثانيه ،انتبهت گاطعه نفسي وواكفه وهو لازمني،كأنما حس بيه اريد افلت و هو ابد مايحب يخبث وياي ويحرجني سحبني من ايدي كعدني بصفه ودار ايده على خصري ويتحسس بجسمي يباوع عليه ويشرب بالجاي ،گلبي يرجف خفت لايعيد عليه الالم، و انوب كلها بجهة وخجلي بجهة، حط الكوب ع الطبله الصغيره الكدامة وحضني! انشليت من الصدمة نبضات گلبي تسارعت و كأنما سباق، جان احساسي هالمرة بالراحه والامان اتمنيت يبقه حاظني دوم، حسيته يفتح بشعري وينثره . ابتعد باوعلي عيونه جانت غريببه ونظراته تريد تفترسني قرب وجهة لرگبتي مديت ايدي ابعده عني، انتبه هو ولزم ايدي عصرها حيييل خازرني سحبها عظ ايدي حييل و دموعي تنزل بتوسل...اووي عفيه ايدي
يمكن شفق عليه وكسرت خاطرة بدموعي سحب نفس وباسه وصعد يبوس بكتفي وبعيوني ووو شفايفي انتبهت اني دأظيع باحظانه بس ساعة الالم لا افز وانتبه، يبوسني ويشمني حيييل واحس اعصابي رختتت ،مااعرف شنو الي جان يخلي يزيد رغبه بيه ..ابتعد عني وجرني لحظنه جنت مستغربه اشو ماتوجعت مثل مساع! وكالعادة يقرأ افكاري، همس بأذني
..ماتوجعتي هواي موو
..اممم
..اي الصبح لان اول مرة تتوجعين ودم بس خلص بعد ماتحسين بهيج شي ،جر نفس وهمس دااااافيه مثل ماتوقعتج
اسمعيني مااريد اسمع اعتراض من اريدج تعوفين كلشي وتجين
..هزيت راسي ب اي،شويه وحسيته نام جريت ملابسي لبست ورحت للحمام اسبح اباوع اثاره بجسمي رگبتي زركة واحمر مانتبهت الا هسة؟ ، طلعت اغسل اماعين والملم بالبيت وانظف اني بطبعي انظف ورا ورا ماحب يتكدس ويشلع گلبي التنظيف بعدين، رحت للغرفه اتفرج ع تلفزيون وهو بعده نايم بالصاله ع القنفه لهناك وسمعت الباب يندگ فزيت متفاجأة ياصلاة محمد واخيراا اشوف بشر غيره، طلعت اركض اريد افتح الباب انتبهت ماموجود بالصاله ،توني اطلع للطارمة سمعت صوته وراي صاح بيه طالع من الحمام
..تعااااي ،جرني من ايدي طببني للصاله يخزر بيه منو سمحلج تطلعين انثبري بمكااانج
عافني وطلع معصب، يووو هسة اني شسويت! ظليت واكفه بباب الصاله اباوعله فتح الباب وطبت مرة جبيرة سلمت وهو باس راسها ويضحكون ويسولفون ب الربع ساعه واكفين واني اباوعلهم شفت اشرلها بايده للصاله والمرة فاتحه عيونه وتبتسم ،اشوو هذا طب والمرة طبت وراه! واني واكفه بمكاني اجه شافني واكفه دار وجه عليها ويرحب بيها وهي باوعتلي تضحك وعيونها مامصدگة اجت سلمت عليه واني بادلتها السلام ورحبت بيها اكلتني اكل بالسلام وتكول:ياا يا ولك مصطفى وين لگيت هالحلوة، بس تدري مامصدكة تزوجت ولك شبسرعه ولو اني زعلانه جا غير تعزمني
..ههه والله خاله تعذريني ظروف صارت وتزوجت ببغداد واجيت زواجنه سريع وماكدرت اعزم بس تددللين الكم مني احلا عزيمة ومايكون خاطرج الا طيب يالغاليه
..ابتسمت بوجهة وكالت بعد گلبي خاله الله يسعدكم ماريد غير راحتكم الله يهنيكم يارب، عوفك مني گلي هسة هذا صاحبك شلون راح تراضيه اذا دره هههه
جاوبها هو: هههه سيف يددلل اراضيه عمي وارضي عشيرته
باوعتلي المرة تبتسم و گالت: شسمها الحلوة
جاوبتها: ايه
..فدوة لعمرج حبيبه صدك ايه الله يحفظج
..تسلمين خاله الله يخليج، انتبهت عليها لسه واكفه، تفضلي خاله استريحي خلينا نضيفج
باوعتلي تبتسم وكالت لا خاله بعد گلبي اني سمعت صوت بالبيت من امس گلت اجه مصطفى خل اشوفه اجيت دكيت الباب لمن مليت محد فتحلي وهسة هم رديت دكيته الحمدلله طلعلي مصطفى من عشه هههههه وهسة اني اترخص ازعجتكم خاله وانتي حبيبه اني هذا بيتي بصفج اي شي تحتاجينه تعاي ترا مصطفى مثل ابني وانتي هسة صرتي بحسبه جنتي
رد عليها هو..ماتقصرين خاله الله يحفظج، راحت المرة واني واكفه فرحت حيل بيها وحبيتها مبيه خوش مرة ...
بارت6
طلعت المرة واني واكفه بمكاني فد استحييت المفروض اطلع وياها اوصلها للباب بس خفت منه هو طلع سد الباب وراها ورجع معصب
توجه الي بقوة سحبني من زندي عليه
..سمعي لللج الطارمة ماتوصلينها فاهمة انتي شلون تردين تطلعين هيج لاحجاب وثوبج مخصر تردين تخبليني
احاول افك ايده مني لان اذاني ظاغط على زندي حيل احس دمعتي راح توگع كلش شنو هو سجن!
همست، ااي مااطلع والله بس هدني دتأذيني
نتر ايدي بقوة وراح للغرفه ،فركت زندي احس ايدي انخلعت
رجعت للغرفه اتفرج ع التلفزيون شفته كاعد ع السرير ومفكك تلفونه مدري يمسح بيه
تمددت ع السرير اباوع افلام كارتون ،شويه وكال
..شنو هذا، فلام كارتون! صدك جذب طفلة انتي؟
..ضوجه ماكو شي شي يخلص وقتي غير التلفزيون
رفع حاجبه وكال: المفروض تخلصين وقتج وياي بس يلا عود من ارجع هسة طالع اني گومي طلعيلي ملابس،
گمت حضرتله ملابس بدل واني دايره وجهي اسمعه يحاجيني..الباب لاتفتحينه اني من اجي عندي مفتاح، الطارمة ماتوصليلها بدون حجاب واصلا لاتوصلينها هسة هذول اكو ناس يصعدون ع السطح ويشوفونج من تطلعين واذا شافوج انهيج نهي، ماوصيج بعد
..اوك
طلع واني رجعت للغرفه، تقريباا بديت اتعود ع هذا الوضع ،اتذكرت الغرفه مانظفتها كمت طايرة لكيتلي شي يشغلني، نظفتها ومسحتها والبخور وياي عجبني اغير بيها درت ميز التلفزيون كدام السرير وغيرت الفراش ،ورحت سبحت للسته يلا خلصت ،المغرب كلش اسمعه فتح الباب بمالمفتاح وطب بيده علاكه تلكيته ،هلوو ،باوعلي احاول ابعد الجو المشحون بيناتنه
واكفه بالمطبخ اتقرب حاوطني من خصري وباس خدي وحط العلاكة يمي همس باذني هلا ،شم رگبتي بقوة وصار يبوس بيها ويتجرأ ببوساته احس خدرت وحأوگع لحدما فزينه على اذان المغرب صاح الله اكبر ابتعد متضايق واني ارجف مدنگة عافني وطلع ركضت غسلت وجهي داستعيد وعيي، جهزت العشا واخذته نتعشه ساكتين وعيونه عليه كل شوي احس بايده تلمس ايدي او رجلي او ظهري ويسوي نفسه مامنتبه ..
كملت العشا سألني: شمسويه بالغرفه
..ماكو بس نظفتها ودرت ميز التلفزيون
باوعلي ثواني ودار وجهة شويه وكال جبتلج تلفون وسيم كارت فقط رقمي بيه اي رقم بيه مااريد وبرنامج الوتساب لاتنزلين برامج اقضي وقت بيه وتسلي لمن اكون ماموجود، گالها وتمدد واني ودي اكوم اركص من الفرحه ابتسمت وهمستله :شكرااا شكرااا
هزلي راسي ودار وجهة للتلفزيون ،نزلت اغسل الاماعين واسمع صوت التلفزيون عالي،شويه نصه الصوت واسمع يحجي ويضحك الظاهر ديخابر، خلصت الاماعين ورجعت للغرفه فضولي قتلني دأعرف منو اتصل عليه، دأصعد وصادفني نازل، استغربت هذا شنو وين رايح لابس ومتعطر، قاطع صفنتي گال:طالع لصديقي سيف شفتيها امه مساع اجت ماوصيج لاتطلعين وانتبهي، عافني وراح واني تمددت فد ضوووجه ،اتذكرت التلفون مالتي اكيد بالعلاكه رحت طلعتها جايب كرزات وفواكه بس مالكيت التلفون ضميتهن ورجعت ادور لكيته ع ميز التلفزيون اخذته ابحوش بيه لكيته مسويلي وتساب وضايف رقمه بدون اسم والشبكه موجودة مالتنه كعدت اتفرج باليوتيوب وفيديو ورا فيديو لحدما حسيت التلفون انجر مني، شهكت متفاجأه شفته واكف يباوعلي،
..صار ساعه من طبيت هاي بدايته هيج ماتعرفين تتلگين رجلج مساع شحلاتج شنو بدينه؟
دنكت بخجل، ااسفه مانتبهت والله، اخر مرة
رجعلي التلفون وشغل التلفزيون وكال جيبي الكرزات جبتهن مساع وتعاي
طفرت ذبيت التلفون يمه وحظرت صحن الكرزات وفواكه قطعت وحطيتهن بصينيه الساعه بالعشرة خاف ينام مو مال فواكه، بس اني جعت يلااا عود اكلهن اني، رجعت للغرفه شفته يگلب بتلفوني حطيت الصينه گال:شنو هاي المسلسلات التركيه ارجعي لافلام كارتون احسن، سكتت ماجاوبته كعدت ع السرير مطلع مباراة وياكل كرزات وفواكه واني كاعده اخاف اخذ التلفون ويعصب ضليت افكر واتذكر حياتي السابقه وحياتي حاليا اباوع بوجهة اسمر عيونه مثل المكحله لحية خفيفه نظرة برووود دمرتني، انتبهلي صافنه بيه بسرعه درت وجهي وهو التها بالمباراة شلت الصينيه فارغه. ورجعت اجاني احساس اجمل نفسي گدامة بس مااعرف شلون حتى ملابس ماعندي، وكفت بنهاية الدرج قبل لا اصعد فتحت شعري الطوييل وعدلت ثوبي ورحت للغرفه اسوي روحي ادور ع المشط لكيته وسرحت شعري وخليت عطر استحيت اروح يمه رجعت نزلت غسلت وجهي واتوجهت للسرير اباوع بكل مكان الا عليه وادري بيه عيونه عليه، همس طفي التلفزيون، كمت طفيته وتمددت بصفه، سحبني لحظنه دقايق هدوء ودفن وجهة برگبتي يبوس بيه ويشمني لاول مرة ينطق. ويسمعني كلام غزل رغم ما بسيط بس احس صرت مثل الماي بايده فصلت عن العالم مااحس بس بوساته ولمساته الجريئه، ابتعد عني لمني بحظنه يشم برگبتي حييل، همس شنو نمتي؟
..تؤؤ
..همم ليش دتغيرين بترتيب البيت
..همست هيج اقضي وقت وعاجبني اغير بيه، اا ليش معجبك التغيير؟
..لاا عجبني كلشيي عاجبني منج
جنت ظامة وجهي بصدرة بخجل، سمعت گال: ههه مثل ناديه ولاتكعدن
اني كال هيج واني كمزت من حظنه فاتحه عيوني ع وسعهن، باوعلي متفاجأ رجعني لحظنه و اني افكر منو ناديه؟ احس انقهرت واريد ابجي مااعرف ليش؟ اريد اسأل منو ناديه بس استحي نزلت دمعتي ،شافني وعقد حواجبه، مسحتها بسرعه ودنگت بحظنه همس بأذني، ناديه مرت اخوي الجبير هم جانت هيج ماتكعد ابد دائما ترتب بالبيت وتخطط وتفكر مثلج
..صدمني بجوابه وشنو يعني شعندك تذكر مرت اخوك خفت عنده شي وياها كتلني الفضول مااعرف شي عن اهلة، ظليت احوس اريد اسأل، گتله:اممم يعني ماعندك خوات
..جر حسرة طويييله و كال:اني الابن الثاني لامي وابوي عندي اخوي الاكبر مني رياض زوجته ناديه وعدهم بنات اثنين صغار
ويجي وراي وائل مامتزوج وورة وائل نور طالبه جامعيه وبسمة طالبة اعداديه چنه گاعدين كلنه بسد امي وابوي مرتاحين وگلب على گلب. جانن اخواتي حيل مدللات عدنه مرات يخطأن ونصيح بيهن ونرجع نفهمهن الصح من الغلط بعمري مامديت ايدي عليهن لو زعلتهن هواي اقل شي نص ساعه وارجع اراضيهن، لحدما فد يوم صديقي سيف خطب اختي نور مني ..
بارت7
صديقي سيف خطب اختي نور مني، فرحت حيل بوكتها لان سيف انسان كل بنت تتمناه اخلاق كلها تحمد بيه عاشرته من الصغر مايوم شفت منه شينه وكفلي بالمرة قبل الحلوة صارلي اخ ثالث، اجيت فرحان خبرت اهلي وگالو يسألون نور، لمن سألوها فاجأتنه فورا رفضت يابه فكري ابدد ماريد يومين نحاول نقنهعا تفكر وهي قافلة، رجعت الرفض لصديقي حيل مقهور وفشلان منه حسيته ضاج بس كال بوكتها هاي هي مامقسومتلي، رجعت للبيت جانت نور كاعده بالصاله وحدها حاجيتها ليش هيج نور خسرتي والله ماريد اجبرج بس ع الاقل لو مفكرة مو احسن، ردت عليه بوقاحه اول مرة اسمعها تكلي لا ماريده ولا افكرهذا صديقك واكيد مثلك ماتنحمل شوازاني اقبل بيه ماعرف شلون راح تكون بيت وعائلة، شعلت نار بداخلي لزمتها ضربتها راجدي حيل وكعت ع حافة القنفه وانضرب راسها وفقدت شفت الدم ملأ راسها والتمو اهلي اخذوها للمستشفى كلها تصيح وتلوم بيه واني مامصدك السويته، ماتحملت الصار كرهت نفسي بوكتها حييل اتمنيت ميت ولاماد ايدي عليها رحت لميت غراضي وكل شي يخصني وطلعت، بالطريق اتصل عليه والدي يصيح ويغلط ويرزل وكال ماريد اشوفك گدامي اعرف بساعة عصبية گالها، گتله صار اصلا انه طلعت وماراح تشوفني بعد، ماعرفت وين اروح لحدما اتصل عليه سيف ورحتله حجيت وياه وهو يهدي بيه و يحاول يخليني اغير رايي بس ماكو قفلت، گلي على هذا البيت بصف بيتهم أجرته وبعدما لميتلي كم فلس شتريته وعدلته وكعدت بيه. و صرت اروح لبغداد لشغلي وارجع لهنا. ام صديقي سيف تروح وترجع تسألني شمحتاج تدز الاكل وتعزم وواكفتلي وكفه اصيله والله، اهلي مرت شهرين وگامو يتصلون ويحاولون يرجعوني ماكو حتى مكاني محد يعرفه اكثر من سنتين ونص اخر شي قبل تلث اشهر اتصل عليه ابوي يعتب بس جان قراري اعتذر مااكدر ارجع ولااكدر اشوفكم سداه وبعد محد اتصل، اسئل عن اخبارهم كل فترة الحمدلله عايشين بخير..
..دمعت عيوني تلقائيا لكيت نفسي ابجي عليه حظني حيل يهمس باذني، ليش تبجين بسس كافي هاي شبيج
..تشتاقلهم؟
جر نفس وكال
..اكيد امي وابوي واخوتي واخواتي بسس
..قطع كلامة وكال عوفج من هالحجي نامي
..بس انت خطيه وهمين اهلك هسة مشتاقيلك حييل وخاصه امك انت ليش
قاطعني بخزرة اششش كافي سد الموضوع معليج بيه
..ضجت منه شنو معليه بيه، جريت نفسي من حظنه ودرت وجهي ،ليش مايريدني اعرف عن حياته ولايشاركني بهمومة ليش الزواج مو مشاركة بالحياة بكل مابيها،
جرني لحظنه وهمس لاتعيدها احترمي نفسج وانثبري بمكانج ..
شاحجي وشكول سكتت منثبرة بمكاني بحظنه الي الگه بيه الامان ونمت..
كعدت الصبح بالعشرة ونص، كمت على كيفي وجهزت الريوك، بطني توجعني صفنت لحظه واتذكرت موعد الشهريه
فد خمووول بالعادة اول يوم بالشهريه اخلصها نوم ومسكنات وفعلا بلعت مسكن وكعد هو اليوم مبين ضايج وكأنما جروحه تفتحت احس كسر خاطري من اتذكر الصار وياه دموعي تنزل وحدها سمعت صاح من الصاله وينج جوعاان، اخذت الريوك وكعدنه نتريگ بسكوت خلص ريوك وگام بدل وطلع بسرعه مبين يريد يشرد عرفت عنه هالصفه مايحب احد يشوف حزنه يبتعد عن الكل بوكتها، لملمت البيت وسويت غده وضميته اخذت حبايه مسكن ثانيه ونمت..
كعدت بالثنتين اسمع باب الشارع انفتح طلعت شفته يغسل برا طب باوعلي وكعد بالصاله ع التلفزيون ،تمددت ع القنفه اباوع وياه وهو كل شوي كومي جيبي ماي كومي شحني تلفوني سوي هذا وسوي ذاك يحوس طول ماانه يمه، اتضايقت حيل بطني توجعني وهو كاعد كل شوي يسخرني لشي، لحدما كال شمسويه غدا؟
..باميه
..صبي جعت
كمت صبيت الغدا واني جبرت نفسي ع الاكل متململه من بطني وهو عكسي ياكل بشراهة كملنه وگمت اخذت المواعين غسلتهن ورحت للغرفه البرده مالت السرير متخربطه واني منا ضايجه جريتها حييل ونمت عززا همزين مانشكت، توني اغفه حسيت بنفسه برگبتي وحاظن ظهري ارتبكت حييل هسة شسوي شلون ابعده استحي اگله ع الشهريه، دارني اله يبوس بوجهي بهدوووء متعمد يذوبني واني ساعه استجيب وساعه ابعد بيه ضاج حييل ونتر بيه شبيييج لاتتحركين لا اكسر راسسج، رجع يبوس بيه واني بجيت محتارة شسوي، هو شافني ابجي وهو تخبل گام يعصر بيه ويصيح شجااج لانعل ابووج شجااج، ماترديني موجنتي شحلاتج شبيييج
..خفت حييل منه جاوبته اشهك، اا لاا والله بس. م مااكدر
..هو شنو الماتكدرين شو احجي عدل وفهميني لا احجيج براجدي
..مماكدر عفيه فهمني موبيدي والله
صفن ثواني ولزمني من زندي حييل كال، لاتگليلها معذورة
هزيت راسي ب اي، وهو صااح انتي غبييييه شبيج ماتفهمييين هو هذا هم حظيي انطاني وحده ثوووله ولج عرووس انتي ششفت منج شبيج ماتفهمين ماگلتيلي هو هذا هم حظييي
..عزاا كام يرعد عليه واني ابجي شمعرفني اني قابل بيدي، بقه يصيح ويرعد طلع برة ربع ساعه ورجع وجهة مدخن ويخزر بيه بسرعه ضميت وجهي عنه حسيته نام ع السرير ويتأفف جرني لحظنه باسني من عيوني ويشمني، الصراحه خفت شنو شراح يسوي ولايكعد راحه، شافني مستغربه اباوعله وخايفه همس ماسوي شي شبيه ماافتهم مثلج بس خو ما تشردين كلش ع الاقل خليني ع ريحتج
..يمه يمه ذاب گلبي لكلامه وابتسمت والله اجيت اضحك واكهكه عليه بس خفتت..
يتبـــع
